Read Tzotzil Ezequiel 40 Bible Online

Ezequiel 40 - Tzotzil bible

Ezequiel 40

¹Ta yo'obal xa xcha'vinic (25) jabil ti jbeq'uelcutic loq'uele, ta slajunebal (10) c'ac'al yu'un ti ach' jabile, xchanlajunebal (14) xa jabil yech'el u'nine ti jteclume, ti sc'ac'alil taje, laj yac' talel sc'ob Dios ta jtojolal ti laj yic'un batel bu taj une.

²Laj quil yilel lic'ot yu'un ti Diose, c'ot sva'anun ta jun toyol vits. Laj quil batel oy c'usi meltsanbil co'ol s'elan jun muc' ta lum yilel ta yeloval ta yolon ti yac'ol xocon sloq'ueb c'ac'ale.

³Yic'ojun batel ti Dios ti bu taje. Laj quil jun vinic co'ol s'elan jun c'anal taq'uin yilel va'al ta ochebal ti'na. Sjopoj jchoj saquil xela, xchi'uc stsacoj jtel te' ta stunes ta sbisobiltac yu'un.

⁴Ti vinic taje xi laj yalbune: “Tuc'ulano, chiquintao, labano avil lec ti c'u s'elan ta xcac'bot avil scotole, yu'un Dios laj yic'ot talel li'e yo' ta xcac'bot avil. Ta ts'acal un, xalo'iltabe ya'i scotol ti jteclum Israel scotol ti c'usi laj avile.”

⁵Ta spat ti ch'ulnae, oy jun moc smacoj ta joyob. Yich'oj oxib (3) metro snatil ma' ti jtel sbisol stsacoj ti vinique. Lic sbis c'u spimil ti moque, oxib (3) metro yich'oj, oxib (3) metro staylej.

⁶Ts'acal to un, bat ta ti'na ti sq'ueloj batel sloq'ueb c'ac'ale. Muy batel ta scojol-coj tec'obal. Laj sbis c'u sjamlej scaj ti ti'nae, yich'oj oxib (3) metro sjamlej ti bu cajale.

⁷Ti chac'te' no'ox yich'oj spac'bal ti jujuc'ol naetic oy ta xocon ochebale, yich'oj oxib (3) metro ti stayleje, xchi'uc ti sjamleje. Ti chac'te' na yilojan sba jujubeje, yich'oj o'lol yoxibal (2.50) metro. Nabal tal ec ti ti'na oy ta yut coriol sq'ueloj batel ta yeloval ch'ulnae. Scaj ti ti'na taje, yich'oj oxib (3) metro ti sjamleje.

⁸Laj sbis c'u sjamlej xtoc ti coriol oy ta ochebal yu'un ti ch'ulnae, yich'oj oxib (3) metro.

⁹Ts'acal to un, laj sbis c'u sjamlej yiloj sba yoyal ti coriol oy ta ochebal yu'un ti ti'nae. Yich'oj chanib (4) metro ti sjamleje. Jun metro spimil yich'oj ti chib oyetique.

¹⁰(Ta jujujot ochebal oy ta yeloval sloq'ueb c'ac'ale, oy oxbej (3) chac'te' na co'ol smuc'tiquil, xchi'uc oyetic co'ol smuc'tiquil yich'oj jujujot.)

¹¹Ts'acal to un, ti vinique xi s'elan loc' ta bisel yu'un ti ti'na ti oy ta ochebale: yich'oj vo'ob (5) metro ti sjamleje. O'lol yucubal (6.50) metro yich'oj ti sjamalul ochebale.

¹²Ti bu lic ech'el smeltsanel ti chac'te' naetique, yich'oj spimil smocal o'lol (.50) metro ta jujujot. Ti jujuc'ol chac'te' nae, yich'oj oxib (3) metro xocon ta jujujot.

¹³Ta ts'acal un, lic snit ta bisel c'u sjamlej smacoj ti chac'te' naetique. Lic ta yut, ech' batel ta ti'naetic, c'ot c'alal to loq'uebal ti'na. Loc' ta bisel o'lol yoxlajunebal (12.50) metro.

¹⁴Laj un, xi s'elan loc' ta bisel yu'un scoriolal ti nae: lajuneb (10) metro. Slecoj ti naetic meltsanbil ta jujujot amaq'ue.

¹⁵Ti snatil ta scotol ti lic ta spat jun ti'na ti c'ot c'alal to ti'na ti oy ta yut coriole, yich'oj vo'ob xcha'vinic (25) metro.

¹⁶Ti jujuc'ol naetique, jech c'u cha'al ti yoyaltaque, co'ol yich'oj chaj chaj smac ventanaetic ta sjoylej, ventanaetic no'ox ta sjoylej yut ti coriole. Yich'oj ec ti oyetic ta joyobe. Ti ta oye, oy loc'tabil luchbil xan.

¹⁷Ti co'ol s'elan vinic yilele, ts'acal to laj yic'un ech'el ta sti'il amac' ti oy ta pat moque. Ta sti'il amac' ti oy ta pat moque, yich'oj lajuneb xcha'vinic (30) ta c'ol naetic ta joyob, xchi'uc yich'oj pac'bil ton ta joyob.

¹⁸Ti pac'bil tone, stuc no'ox peq'uel oy, quiil batel ta sti'il naetic ti nabal ta moque, xchi'uc co'ol sjamlej jujuc'ol ti c'u yepal cholol xbate.

¹⁹Ti vinique lic sbis c'u snatil yich'oj ti lic talel ta yeloval ti'na ti oy ta olone, ti c'ot c'alal to ochebal ti'na ti oy ta yute. Loc' lajuneb yoxvinic (50) metro.

²⁰Jech xtoc, oy jun ti'na ta spat ti sq'ueloj batel ta yolon ti yolon xocon sloq'ueb c'ac'al ti oy ta loq'ueltic yu'un ti amaq'ue. Ti vinique laj sbis c'u snatil, xchi'uc c'u sjamlej ta jujujot.

²¹Yich'oj xtoc oxc'ol chac'te' naetic ta jujujot xchi'uc oyetic, co'ol sjamlej yich'oj scoriolal ta ochebal ti sq'ueloj batel ta stuq'uil sloq'ueb c'ac'ale. Ti xcaltique, loc' ta bisel vo'ob xcha'vinic (25) metro ti snatile. Yich'oj o'lol yoxlajunebal (12.50) metro ti sjamleje.

²²Ti scoriolale, ti sventanaile, xchi'uc ti luchbil loc'tabil xane, co'ol sbisol yich'oj jech c'u cha'al oy ta ochebal ti sq'ueloj batel ta sloq'ueb c'ac'ale. Ti bu taje, yich'oj muyel vuc-coj tec'obal. Ti scoriolale com ta yut.

²³Ti sq'ueloj batel ta stuq'uil sloq'ueb c'ac'ale, xchi'uc ti sq'ueloj batel ta stuq'uil yolon ti yolon xocon sloq'ueb c'ac'ale, ti yeloval sti' ta xc'ot ta spate, oy jun ochebal ta xc'ot ta amac' ti oy ta yute. Ti vinique lic sbis c'u sjamlej yich'oj ti lic ta jun ochebal ti c'ot ta jun ochebale. Yich'oj lajuneb yoxvinic (50) metro.

²⁴Laj taj une, ti vinique laj yic'un batel ta stuq'uil yolon ti yac'ol xocon sloq'ueb c'ac'ale, ti bu oy jun ochebale. Laj sbis ti oyetique xchi'uc ti coriole, co'ol sbisol jech c'u cha'al ti yane.

²⁵Ti na oy ta ochebale, oy scoriolal, oy sventanailtac ta joyob jech c'u cha'al ti yane. Ti smuc'ule yich'oj vo'ob xcha'vinic (25) metro ti snatile. Yich'oj o'lol yoxlajunebal (12.50) metro ti sjamleje.

²⁶Oy ochebal yu'un, yich'oj vuc-coj (7) tec'obal xmuy batel. Ti scoriolale com ta yut. Ti oyetique yich'ojan loc'tabil luchbil xan ta joyob.

²⁷Ti yamaq'uil ta yute, oy jun ti'na sq'ueloj batel ta yolon ti yac'ol xocon sloq'ueb c'ac'ale. Ti vinique laj sbis c'u snatil yich'oj ti jun ti'na ti ta xc'ot ta jun ti'na sq'ueloj batel ta yolon ti yac'ol xocon sloq'ueb c'ac'ale. Yich'oj lajuneb yoxvinic (50) metro.

²⁸Laj yic'un batel xtoc un ta ochebal ti sq'ueloj batel ta yolon ti yac'ol xocon sloq'ueb c'ac'ale, ti ta xc'ot ta yamaq'uil yut moc ta yut amaq'ue. Ti vinique lic sbis ti ti'na sq'ueloj batel ta yolon ti yac'ol xocon sloq'ueb c'ac'ale, co'ol smuc'tiquil jech c'u cha'al ti yan ti'naetic ti laj sbis ta ba'yele.

²⁹Ti jujuc'ol naetic chac'te' no'ox smaque, ti scoriolale, ti yoyaltaque, co'ol smuc'tiquil jech c'u cha'al ti yane, joyol ta sventanail ti ochebal yu'une. Ja'uc ti scoriolale yich'oj vo'ob xcha'vinic (25) metro ti snatile. Yich'oj o'lol yoxlajunebal (12.50) metro ti snatile.

³⁰Ti yan corioletic oy ta joyobe, mu yanuc sbisol, co'ol jech c'u cha'al ti yane.

³¹Ti coriol sq'ueloj batel ta loq'uel yu'un ti amaq'ue, yich'oj loc'tabil luchbil xan ti oyetic yu'une. Ta ti'na taje yich'oj vaxac-coj (8) tec'obal muyebal yu'un.

³²Ta jech yepal un, laj yic'un batel ta yut amac' ti sq'ueloj batel ta sloq'ueb c'ac'ale. Laj sbis ti ochebale, co'ol sbisol jech c'u cha'al ti yane.

³³Ti naetic chac'te' no'ox yich'oj ti smaque, ti oyetique, ti scoriolale, co'ol sbisbil jech c'uc cha'al ti yane. Ti ochebale, oy ta coriol, oy sventanailtac ta joyob, yich'oj vo'ob xcha'vinic (25) metro ti snatile, o'lol yoxlajunebal (12.50) metro ti sjamleje.

³⁴Ti coriol sq'ueloj batel ta loq'uebal yu'un ti amaq'ue, yich'oj loc'tabil luchbil xan ta joyob ti oyotic yu'une. Ta ti'na taje yich'oj vaxac-coj (8) tec'obal muyebal yu'un.

³⁵Laj taj une, ti vinique laj yic'un batel ta ochebal ti sq'ueloj batel ta yolon ti yolon xocon sloq'ueb c'ac'ale. Laj sbis ti ochebale, co'ol loc' ta bisel jech c'u cha'al ti yane.

³⁶Oy naetic xtoc ti naca chac'te' yich'oj spac'bale, ti yoyaltaque, ti scoriolale, oy sventanail ta joyob. Ta ochebal ti nae, yich'oj vo'ob xcha'vinic (25) metro ti snatile. Yich'oj o'lol yoxlajunebal (12.50) metro ti sjamleje.

³⁷Ti coriol sq'ueloj batel ta loq'uebal yu'un ti amaq'ue, yich'oj loc'tabil luchbil xan ta joyob ti oyetic yu'une. Ta ti'na taje, yich'oj vaxac-coj (8) tec'obal muyebal yu'un.

³⁸Oy jc'ol na xtoc, sti'nainoj sbaic xchi'uc ti coriol ti oy ta ochebale. Taj une, ti bu ta xich' poquel ti chon bolometic ta xich' chiq'uel ta sventa ti matanale.

³⁹Ta ochebal coriol yu'une, oy chancot mexa, cha'cha'cot ac'bil ta jujujot ta xtun ta smilobil chon bolometic ti ta xich' chiq'uel ti milbil matanaletic ta scoj ti mulil colo'ile.

⁴⁰Ta spat ti coriol ti oy ta ochebal sq'ueloj batel ta yolon ti yolon xocon sloq'ueb c'ac'ale, oy cha'cot mexa ta jujujot xocon xtoc.

⁴¹Oy chanib (4) mexa ta yut, chanib (4) mexa ta spat ochebal ti xi s'elan oy xcaltic unbi: vaxaquib (8) mexa ta scotol ti bu ta smilic ti chon bolometique.

⁴²Ti chancot (4) mexa ti bu ta xich' chiq'uel ti chon bolometique, naca anbil ton. Yich'oj oxch'ix xchi'uc jquejlej (75 cm.) ti snatile. Yich'oj oxch'ix xchi'uc jq'uejlej (75 cm.) ti sjamleje. Yich'oj cha'ch'ix xchi'uc vo'bej c'ob (50 cm.) ti stayleje. Ti bu taje, ta scajanic ti beq'uet ta sventa ti matanaletique.

⁴³Ja'uc ti mexaetic ti oy ta jc'ol na une, yich'oj jch'utubuc (6 cm.) svelbenal sti' ta joyob ti bu ta scajanic ti matanal ninal trigoe, xchi'uc ti c'usitic ta xtun ta smilobil ti chon bolometique, ta sbusanobil ti beq'uet ta xich' aq'uel ta matanale.

⁴⁴Ta amac' ti oy ta spat ochebal ti'naetic ta yute, oy cha'bej na meltsanbil ta ochebal ta yeloval yolon ti yolon xocon sloq'ueb c'ac'al ti june. Ti june meltsanbil ta ochebal ta yeloval yolon ti yac'ol xocon sloq'ueb c'ac'al.

⁴⁵Ti vinique xi laj yalbune: “Ti na sq'ueloj batel sti' ta yolon ti yac'ol xocon sloq'ueb c'ac'ale, ta stunesic paleetic ti buch'utic ta xtunic ta ch'ulnae.

⁴⁶Ti jbej na sq'ueloj batel sti' ta yolon ti yolon xocon sloq'ueb c'ac'ale, ta stunesic paleetic ti buch'utic sbainojic ta sq'uelel ti altare. Naca snitilultac Sadoc ma' taje, ja' no'ox levitaetic xu' xnopajic ta tunel yu'un ti Diose.”

⁴⁷Ts'acal to ti vinique lic sbis ti amac' oy ta yute. Yich'oj lajuneb yoxvinic (50) metro ta xchanjotal. Oy ta yelov sti' ch'ulna ma' ti altare.

⁴⁸Ti vinique laj yic'un batel ta scoriolal ch'ulna. Lic sbisan ti oyetic ta coriol ti xi s'elan loc' ta chapale: Yich'oj o'lol yoxibal (2.50) metro spimil ti jujune. Ti ti'nae yich'oj vucub (7) metro sjamlej. Ti sc'atlomte'altac scoriolal ti ti'nae, yich'oj o'lol xchibal (1.50) metro ti jujune.

⁴⁹Sjamlej ti scoriolale yich'oj lajuneb (10) metro, vaquib (6) metro x'och batel. Yich'oj lajuncoj (10) muyebal tec'obal yu'un. Ta jujun ti oyetique, va'anbil yictac.