Read Tzotzil Ezequiel 46 Bible Online

Ezequiel 46 - Tzotzil bible

Ezequiel 46

¹“Xi ta xcal ti vu'un Diosune: Ti ti'na sq'ueloj batel sloq'ueb c'ac'al ta yelov amac' ti oy ta yute, tsots sc'oplal bajal ti vaquib (6) c'ac'al yorail abtele. Ta xich' jamel ta yorail cuxob o'ntonal xchi'uc ta sc'ac'alil ti ach' ue.

²Ti jpas-mantale ta x'och talel ta ochebal ti'na yu'un coriol ti sq'ueloj ta loq'uebal amaq'ue. Ta xc'ot squican sba ta junuc yoyal ti ti'nae. Ti paleetic une, yacalic xa ta xchiq'uel ti milbil matanale, ta yaq'uel xtoc ti milbil matanal laj yac' ti jpas-mantal ta sventa ti lajesobil o'ntonale. Snupilan xa banomil ta squejan sba ta sts'el yoyal ti ti'nae. Ta xloc' batel un. Ta smalil to c'ac'al ta xich' maquel ti ti'nae.

³Ti jteclume xnijiletic xchimiletic ta xich'ic ta muc' ti Dios ta yeloval ti'na ta sc'ac'alil cuxob o'ntonal, xchi'uc ta sc'ac'alil ti ach' ue.

⁴Ti chon bolometic tsots sc'oplal ta xac' ti jpas-mantal ta sc'ac'alil cuxob o'ntonal ta xich' chiq'uel ta smoton ti Diose, vac-cot (6) ch'iom chij xchi'uc jcot muc' ta chij, ti mu jutebuc xchopolil scotole.

⁵Ta xich' ts'aquel jtob (20) almul sat ts'unubiletic ti jujucot chij ta xich' aq'uele, ta sventa ti ch'iom chije, ti c'u yepal xloc' x'ayan ta o'ntonal ta xich' aq'uele. Ta xich' aq'uel o'lol xchanibal (3.50) litro aceite ta sventa jujutob (20) almul sat ts'unubil.

⁶Ta sc'ac'alil ti ach' ue, ta xich' aq'uel jcot ch'iom tot vacax, vac-cot (6) ch'iom chij, xchi'uc jcot muc' ta chij, ti mu jutebuc xchopolil scotole.

⁷Ta xich' aq'uel sts'ac jtob (20) almul sat ts'unubil ta sventa ti ch'iom tot vacaxe. Jech yepal ta xich' ts'aquel ta sventa ti jujucot muc' ta chije, ta sventa ti ch'iom chije, ti c'u yepal xloc' x'ayan ta o'ntonal ta xich' aq'uele. Ta xich' aq'uel o'lol xchanibal (3.50) litro aceite ta sventa ti jujutob (20) almul sat ts'unubile.

⁸“C'alal ta x'och batel ti jpas-mantale, sc'an ta stam ti ochebal yu'un ti muc' ta ti'nae. Ti bu taje, tey ta stam loq'uel xtoc.

⁹Ti jteclume, c'alal ta x'ochic ta yich'el ta muc' ti Dios ta yorail q'uine, xi s'elan sc'an pasele: Ti buch'u ta x'ochic talel ta ti'na ti sq'ueloj batel ta yolon ti yolon xocon sloq'ueb c'ac'ale, ta xloq'uic batel ta ti'na ti sq'ueloj batel ta yolon ti yac'ol xocon sloq'ueb c'ac'ale. Ti buch'u ta x'ochic batel ta ti'na ti sq'ueloj batel ta yolon ti yac'ol xocon sloq'ueb c'ac'ale, ta xloq'uic batel ta ti'na ti sq'ueloj batel ta yolon ti yolon xocon sloq'ueb c'ac'ale. Ma'uc xa tey ta xloq'uic batel ta ti'na ti bu ochic talele, yu'un sc'an ti tuc' ta stam jelavele.

¹⁰Tsots sc'oplal jmoj ta x'ochic batel, jmoj ta xloq'uic talel xchi'uc jteclum ti jpas-mantale.

¹¹C'usiuc no'ox q'uinal ta x'ech'e, tsots sc'oplal ta xaq'uic ta matanal jtob (20) almul sat ts'unubil sventa ti jujucot ch'iom tot vacaxe. Jech yepal ta xich' aq'uel xtoc ta sventa ti jujucot muc' ta chije, ta sventa ti jujucot ch'iom chije, ti c'u yepal xloc' x'ayan ta o'ntonale. Ta xich' aq'uel xtoc o'lol xchanibal (3.50) litro aceite ta sventa jujutob (20) almul ti sat ts'unubile.

¹²“C'alal ta xloc' x'ayan ta yo'nton ta yaq'uel matanal ta stojol Dios ti jpas-mantale, jech c'u cha'al ta xich' chiq'uel ti chon bolome, mi ta xich' milel ta sventa ti lajesobil o'ntonale, ta xich' jamel ti ti'na ti sq'ueloj batel ta sloq'ueb c'ac'ale. Jech ta xich' pasel jech c'u cha'al ta sc'ac'alil ti cuxob o'ntonale. Mi loc' xa ech'el un, mac xi ti ti'nae.

¹³“Scotol c'ac'al ta jujun ic'lumane, ta xich' aq'uel jcot ch'iom chij yich'oj jun jabil ti mu'yuc xchopolile yo' ta xich' chiq'uel ta stojol ti Diose.

¹⁴Jech xtoc ta jujun sob ic'lumane, ta xich' ac'bel ta smoton Dios vucub (7) almul sat ts'unubil, xchi'uc jun litro aceite ta xich' malel ta sba ti ninal arinae. Tsots sc'oplal c'otuc ta pasel ti va'i s'elan liqueme.

¹⁵Ti ch'iom chij ta xich' milel ta matanale, ti matanal sat ts'unubile, ti aceitee, tsots sc'oplal ta xich' aq'uel ta jujun sob ic'luman.

¹⁶“Xi ta xcal ti vu'un Diosune: Mi laj sq'uelanbe jsepuc banomil xnich'on ti jpas-mantale, c'ot o ta xrexto xchi'uc ti snitilultaque.

¹⁷Mi laj sq'uelanbe jsepuc banomil junuc smosovtac ti jpas-mantale, ta stunes ti c'u sjalil tiq'uil ta mosovile, ta xicta comel ta xcha'ich' ti jpas-mantal yo' ta xc'ot ta xrexto ti xnich'nabe.

¹⁸Mu xu' ta spojbe yosil yan ti jpas-mantale. Ti c'usi ta xac'be ta xrexto ti xnich'nabe, yu'unuc stuc scotolic ti oy yosil sbanomilique, mu ta stani sbaic ti jteclumal unbi.”

¹⁹Ta ts'acal to un, ti vinique laj yic'un batel ta xocon ti'na ta sts'el jujuc'ol naetic ti sq'ueloj batel ta yeloval yolon ti yolon xocon sloq'ueb c'ac'ale, chapanbil ta sventa ti paleetique, ti laj xch'utubtabun batel ta yeloval smaleb c'ac'al oy ta spate.

²⁰Xi laj yalbune: “Le' me ma' ti bu ta slacanbeic sbec'tal chon bolometic ti paleetic ti laj yich' svocol ta milele, ti laj yich' aq'uel ta matanal ta scoj ti mulil colo'ile, xchi'uc ta slacanel ti matanal sat ts'unubile. Ta sventa ti yutsil slequilale, mu xu' xloc' batel ta amac'. Jech ti jteclum eque mu xu' ta xba stic' sba ti bu taje.”

²¹Ta ts'acal to un, laj yic'un loq'uel ta loq'uebal amac', ti laj jxani yu'un xchanjotal xchiquintaque. Ta jujujot xchiquin ti amaq'ue, laj quil ti oy uni biq'uit amac'.

²²Ti jujun amaq'ue, co'ol smuc'tiquil scotol. Yich'oj jtob (20) metro ti snatile, vo'lajuneb (15) metro ti sjamleje.

²³Naca ta ton joyol smocal scotol, xchi'uc meltsanbil stsanleb c'oc' ta yi'bel.

²⁴Va'i un, xi laj yalbune: “Le'e, snail meltsanobil ve'liletic yu'un ti ch'ulnae, ti bu ta slacanic ti milbil chon bolometic ta xaq'uic ta matanal ti jteclume.”