Read Tzotzil Ezequiel 48 Bible Online

Ezequiel 48 - Tzotzil bible

Ezequiel 48

¹“Ti sts'aquil ti oy ta yeloval yolon ti yolon xocon sloq'ueb c'ac'ale, ti lic batel ta muc' ta nab Mediterráneoe, laj stam batel ta yeloval ti Hetlone, ti Hamate, ti Hazar-enane. C'ot ta tsutsel ta sts'ac Damasco ta yeloval yolon ti yolon xocon sloq'ueb c'ac'al yu'un ti Hamate. Ti ta xlic ti sts'aquil ti oy ta yeloval sloq'ueb c'ac'ale, ti ta stam ech'el ta yeloval smaleb c'ac'ale, ta xc'ot ta yu'un Dan ti jsep osile.

²Ta xtal yu'un ti Asere, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe.

³Ta xtal yu'un ti Neftalie, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe.

⁴Ta xtal yu'un ti Manasese, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe.

⁵Ta xtal yu'un ti Efraine, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe.

⁶Ta xtal yu'un ti Rubene, ti ta xlic ti oy ta yeloval sloq'uel c'ac'ale, ti ta xc'ot ta xocon nabe.

⁷Ta xtal yu'un ti Judae, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe.

⁸“Ta sts'el sts'ac ti Judae, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe, oy jsep osil ti ch'acbil com yich'oj o'lol yoxlajunebal (12.50) kilometro ti sjamleje. Jech snatil jech c'u cha'al yich'ojic ti jujuvoc' nitiluletique. Ta o'lol taj une, tey ta xcom ti ch'ulnae.

⁹“Ti jsep osil c'otem ta sventa Dios ti oy ta yutil banomile, yich'oj o'lol yoxlajunebal (12.50) kilometro ti snatile, lajuneb (10) kilometro ti sjamleje.

¹⁰Ta yutil jsep ti osile, chapanbil juteb ta sventa ta xtun yu'un ti paleetique. Ta yeloval yolon ti yolon xocon sloq'ueb c'ac'ale, xchi'uc ta yeloval yolon ti yac'ol xocon sloq'ueb c'ac'ale, o'lol yoxlajunebal (12.50) kilometro snatil. Ta yeloval sloq'ueb c'ac'ale, xchi'uc ta yeloval smaleb c'ac'ale, vo'ob (5) kilometro ti sjamleje. Ta o'lol ti osil taje, tey ta xcom xch'ulna ti Diose.

¹¹Ti banomil taje ta xc'ot ta sventa paleetic ti ochemic ta yajtunel Dios snitilultac ti Sadoque, ti sbainojic stunelic cu'un ti mu'yuc sts'aclivanic ta spasel jech c'u cha'al laj spasic jlom israeletic ti laj xch'ac sbaic ta spasel bu stamojic batel cu'un jech c'u cha'al laj spasic ti levitaetique.

¹²Jech o xal un, ti banomil ti c'otem ta sventa Dios ta sts'el yosil ti levitaetique, oy yosil paleetic ti bu cajal sc'oplal c'oteme.

¹³Ta sts'el yosil ti paleetique, oy yosil ec ti levitaetique, o'lol yoxlajunebal (12.50) kilometro ti snatile, vo'ob (5) kilometro ti sjamleje. Ja'uc ti c'otem ta sventa ti Diose. Le'e, oy o'lol yoxlajunebal (12.50) kilometro ti snatile, lajuneb (10) kilometro ti sjamleje.

¹⁴Stuc no'ox banomil jun yutsil oy ta muc' ta lum. Mi jutebuc stac' chonel, mi jel xi, mi va' xi yan yajval, yu'un c'otem ta sventa ti Diose.

¹⁵“Ti o'lol yoxlajunebal (12.50) kilometro ti snatile, ti o'lol yoxibal (2.50) kilometro ti sjamlej comeme, colemal banomil xa. Xu' xnaquiic jnaclejetic, xchi'uc ta xtun ta yavil pulem yaxal sventa ta slo' ti chon bolometique. Ti jteclume oy ta o'lol yaxaltic

¹⁶ti smacoj ta scotol cha'mil xchi'uc o'lol yoxibal ciento (2,250) metro ta xchanjotale.

¹⁷Naca yaxaltic oy ta sjoyobal ti jteclume, ti yich'oj vo'ob yucvinic (125) metro sjamlej ta xchanjotale.

¹⁸Ta xocontac ti jteclum ta yeloval sloq'ueb c'ac'ale, ta smaleb c'ac'ale, oy jsep banomil ta sts'el ti bu c'otem ta sventa ti Diose, yich'oj vo'ob (5) kilometro xchanjotal. Ti banomil taje, yich'uc abtelanel, ti c'usitic xloc' x'ayan yu'un une, sventa ta stun ta slajesic ti buch'u ta x'abtejic ta jteclume.

¹⁹Ti ta x'abtejic ta jteclume, buch'uuc no'ox ipaluc mi ja' snitilul ti israeletique, yabtelanicuc ti banomil taje.

²⁰Scotol ti banomil comem xae, tsacbil xa ta venta c'otem ta yu'un ti Diose, xchi'uc ti c'u yepal smacoj ti jteclume, oy o'lol yoxlajunebal (12.50) kilometro yich'oj ta xchanjotal.

²¹“Ti bu ta xc'ot ta sventa ti ajvalile, ti xcaltique, ja' ti c'u yepal oy sts'aquinoj sba xchi'uc ti bu ac'bil ta ventae, xchi'uc ti bu c'otem ta yu'un ti jteclum ti sts'aquinoj sba xchi'uc ti oy ta o'lol yoxlajunebal (12.50) kilometro sjamleje, ti quiil xbat ta yeloval smaleb c'ac'ale, ti ta xocon smaleb c'ac'ale, ti ta xc'ot ta smaleb c'ac'al ta ti' nabe, xrexto ajvalil unbi ti bu yelovtaoj sba xchi'uc ti bu ac'bil ta ventaele. Ta o'lol taj une, tey ta xcom ti ch'ulnae.

²²Ti sts'aquinoj yosil ti levitaetique, yosil ti jteclume, yosil ti Judá xchi'uc yosil ti Benjamín ti bu c'alal sventainoj ti ajvalile.

²³“Ti yan jayvoc' nitiluletique, xi s'elan ta xich' ti yosilique: Ti jsepe, ta xlic ta yeloval sloq'ueb c'ac'al, ta xc'ot c'alal to sti'il ti nabe, ja' ta xc'ot ta yu'un ti Benjamine.

²⁴Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Simeone.

²⁵Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Isacare.

²⁶Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Zabulone.

²⁷Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Gade.

²⁸“Ta yeloval yolon ti yac'ol xocon sloq'ueb c'ac'al, sti'il sts'ac ti Gade, ti sts'aquile ta stam ech'el ta Tamar, ta x'ech' batel ta sat vo' ta Meriba-cades xchi'uc ta uc'um yu'un Egipto, c'alal to ta muc' ta nab Mediterráneoe.

²⁹“Li'e, ti muc' ta lum une, ta xc'ot ta xrextoic banomilic ti jnaclejetic yu'un ti jujuvoc' nitiluletic yu'un ti Israele. Ta xach'aquic ti va'i s'elan taj une. Vu'un ta xcal mantal ti Ajvalilune.

³⁰“Xi s'elan ti loq'uebal yu'un ti jteclume: Ta yeloval yolon ti yolon xocon sloq'ueb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, ta xich' sti'tac.

³¹Sbitac ti ti'naetic ta xich'e, xi' s'elane: ja' ti c'u s'elan sbiic jujuvoc' snitilul ti Israele: oxib ta yeloval yolon ti yolon xocon sloq'ueb c'ac'ale: ti'na yu'un Rubén ti june, ti'na yu'un Judá ti xchibale, ti'na yu'un Leví ti yoxibale.

³²Ta yeloval sloq'ueb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, oxib ti'na ti xi s'elan sbie: ti'na yu'un José ti june, ti'na yu'un Benjamín ti xchibale, ti'na yu'un Dan ti yoxibale.

³³Ta yeloval yolon ti yac'ol xocon sloq'ueb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, yan oxib ti'na ti xi s'elan sbie: ti'na yu'un Simeón ti june, ti'na yu'un Isacar ti xchibale, ti'na yu'un Zabulón ti yoxibale.

³⁴Ta yeloval smaleb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, yan oxib ti'na ti xi s'elan sbie: ti'na yu'un Gad ti june, ti'na yu'un Aser ti xchibale, ti'na yu'un Neftali ti yoxibale.

³⁵Smocal ti jteclum ta joyobe, yich'oj balunmil (9,000) metro sbisol. ‘Li' oy ma' ti Diose’, xi sbi ta xich' liquel ti jteclume”, xi laj yal ti Dios ti scotol xu' yu'une.