Read Tzotzil Ezequiel 5 Bible Online

Ezequiel 5 - Tzotzil bible

Ezequiel 5

¹Ti Diose xi laj yalbune: “Tana li' une, yojtot, sa'o junuc cuchilu ti lec va'iem yee, co'oluc s'elan ye jech c'u cha'al ti juxob isimale. Ch'ulo ta loq'uel ti stsatsal ajole xchi'uc ti avisime. Sa'o junuc sbisobil ti c'u yalal ta xloq'ue, paso ta oxch'ac un ti stsotsil ajole.

²C'alal mi tsuts ta stsaquel ta leto ti jteclume, chic'o ta o'lol jteclum jch'acuc ti stsotsil ajole. Tamo junuc cuchilu un, bojo jbosuc ti oxch'ac stsotsil ajolale. Tanio ta sjoyobal ti jteclume. Ti c'u yepal come, vileso ta taniel batel ta ic'. Jye'oj ma' ti quespada tijil ta xital ta spat ti jnaclejetic oy ta jteclume.

³Tamo jaybejuc sat ti tsotsil jolile, chuco ta sti'il ac'u'.

⁴Tamo jaybejuc xtoc, jipo ochel ta c'oc' yo' jech ta xc'ac'. Ta xloc' talel c'oc' un ta scontrainel scotol ti lum Israele.

⁵“Xi ta xcal ti vu'un Diosune: Le' oy ma' ti jteclum Jerusalene. Vu'un laj jva'an ti o'lol yu'unic ti lumetique, xchi'uc ti muc'tiquil lumetic joyol ta spat ta xocone.

⁶Jelav ti stoyobbailique. J'ech'el mu'yuc xc'ot ta pasel yu'unic ti jmantaltaque, ti oy c'usi jbel tsots albile, ja' mu sta c'usi ta spasic ti lumetique, xchi'uc ti muc'tiquil lumetic joyol ta spat ta xoconique.

⁷Jech o xal ti vu'un Diosune xichi ta xcale: Jelav ta j'ech'el ti atoyobbailique, ja' mu sta ti jteclumetic joyol ta apat axoconique. Mu'yuc xc'ot ta pasel avu'unic ti jmantaltaque. Mi ja'uc c'ot ta pasel avu'unic ti c'usi jbel tsots albil yu'unic ti jteclumetic joyol ta apat ta axoconique.

⁸Jech o xal ti vu'un Diosune xichi ta xcale: Ta xlic jcontrainot ava'i, Jerusalén. Ta sba ta sat yan muc'tiquil lumetic jbel xi c'opoj ta scontraineloxuc,

⁹ti mu bac'niuc jech laj jpas ta atojolique, mi ja'uc ta jcha'pas. Ti c'usitic laj apasique mi ja'uc stac' q'uelel ta j'ech'el.

¹⁰Oy jlom ta atojolic, ti totiletic ta xlic sti' ti xnich'onique. Ti nich'oniletic ta xlic sti' ti stotique. Tsots sc'oplal ta xc'ot ta pasel cu'un ti jbel xic'opoj ta scontrainelote. Tan puc ta xbat cu'un ta xchanjotal banomil ti buch'u cuxul to ta xcome.

¹¹“Ti cuxul Diosune xichi ta xcale: Mi jutebuc syail xc'uxulil ti xc'uxubaj to co'nton ta jlilinoxuc ava'iic ta j'ech'ele, ti laj asoquesbeicun ti jch'ulna ta scoj sloc'obbail ti c'usitic meltsanbil ta c'abale, xchi'uc ti c'usitic mu'yuc smelol ta xapasique.

¹²Ti jch'ac ta oxch'ac ti jnaclejetic avu'une, ta xchamic ta tsots chamel, xchi'uc ta vi'nal ti nabal ta stojole. Ti jch'aque ta xlajic ta milel yu'un ti yajcontraic ti joyol no'ox ta spat ta xoconique. Ti jch'aque, tan puc ta xbat cu'un ta xchanjotal banomil. Jye'oj ti quespada tijil ta xibat ta spatique.

¹³“Ta jloq'ues sc'ac'al co'nton ta stojolic, ja' to c'uxi ech'e. C'alal mi laj xa jloq'ues ti jc'ac'al ta stojolique, ta sna'ic ti vu'un Ajvalilune, ti laj cal ti mu sts'ic cu'un mi liquesbile.

¹⁴Busul ta xacom cu'un, Jerusalén, ta xac'ot cu'un ta j'ac'-lo'il-maxil yu'un ti jteclumetic joyol ta apat ta axocone yo' ta xilic scotolic ti buch'utic ta x'ech'ique.

¹⁵“C'alal tsots ta jbusan ta aba ti scapemal sti'emal jole, c'alal tsots ta jtsitsot ava'i ta j'ech'ele, ta xchopol-c'opojic ti mu albajuc ti c'usitic ta xloc' ta yeic ta atojolique. Xvic' to satilal yu'un ti jteclumetic joyol ta apat ta axocone. Mu stselbuj jc'op ma' ti vu'un Ajvalilun une.

¹⁶Ta jtac talel vi'nal ta atojolic ti xmich'mun yipal ta j'ech'ele. Melel, ta jtac talel ta atojolic ta atsutseselic, vi'nal ti mu'yuc ta tael ti c'usitic stac' tunel lajesele.

¹⁷Melel unbi, ta jtac talel ma' ti vi'nale, ti chamel lajele, xchi'uc jti'oval chon bolometic ti mu junuc ta xayictabeic comel ti avalab anich'nabique, ti yepal ta xalajic cu'un ta letoe. Mu stselbuj jc'op ma' ti vu'un Ajvalilun une.”