Read Tzotzil Ezequiel 7 Bible Online

Ezequiel 7 - Tzotzil bible

Ezequiel 7

¹Xi laj yalbun ti Dios ti laj sc'oponun talele:

²“Ti vu'un Diosune xi ta xcalbe ya'i ti muc' ta lum Israele: Ta xa xvul ta loq'uel ti tsutsel lajele, ta stsutsesel scotol ti banomile.

³“J'ech'el ta xac'ot ta tsutsel un, Israel. Ta jbusan ava'i ta aba scotol ti sc'ac'al co'ntone, ta yich'belot ave yu'un ti c'u a'elan mu stac' alel ti c'usi ta xapase, ta stsitselot ava'i ta scoj ti c'usitic loc' ta pasel avu'une.

⁴Mu xanop ti oy to xc'uxul co'nton ta atojole. Ta jtsitsot ava'i yu'un ta scoj ti c'usitic loc' ta pasel avu'une, ta yich'bel stojol ta scoj ti c'usitic mu stac' alel ti c'usi laj apase. Ta xlic ana' unbi ti vu'un Ajvalilune.

⁵“Xichi ta xcal ti vu'un Diosune: A'yio ava'i, ta xa xvul ta loq'uel ti lajel tsutsele.

⁶Xlic xcaj talel ti vocole. Q'uelel xa talel ta atojol ti tsutsel lajele.

⁷Jnaclejetic yu'un muc' ta lum, ti tubele ta xa xvul ta loq'uel. C'ot xa ti yorail une. Sta xa talel sc'ac'alil ti mu stac' a'yeluc c'usi stac' pasele. Laj to c'op ti xlaet no'ox o'ntonal yu'un ti vitstique.

⁸“Ta jech yepal, ta jliquel no'ox ta jbusan ta aba ti sc'ac'al co'nton tana une, ti xlaet to ta xca'i yu'une. Ta xquich' ave ati' ava'i ta scoj ti c'usitic laj apase, ta stsitselot ava'i yu'un ti mu stac' alel ti c'usitic laj apase.

⁹Laj ti xc'uxul co'nton ta atojol une. Ta jtsitsot ava'i ta scoj ti c'usi loc' ta pasel avu'une, ta yich'el stojol ta scoj ti c'usitic mu stac' alel ti c'usitic laj apase. Ta xlic ana' unbi ti vu'un Ajvalilun ta jtsitsoxuque.”

¹⁰¡C'ot xa sc'ac'alil! ¡Vul xa ta loq'uel! ¡Tal xa ti tsutsesel une! Buyuc no'ox stsacoj yip ti mu'yuc lec c'usi ta xc'ot ta pasele, stsacoj yip ti toyobbaile.

¹¹Ti ta xvul ta loq'uel ti c'usi mu lecuc ta xc'ot ta pasel yu'une, ta xlic ayanuc ti c'usi mu stac' alel ta xc'ot ta pasel yu'une. Ti cajal ye sti' xa'i sbaique, ti oy sc'ulejalique, mu'yuc c'usi ta xc'ot ta pasel yu'unic. Mi jutebuc tsots sc'oplal ma' ti c'usi oy yu'unique.

¹²Sta xa yorail, c'ot xa sc'ac'alil. Nom c'ot muyubajel yu'un ti jbolomajele. Nom c'ot at o'ntonal yu'un ti jmanolajele. Ta scapemal jol ta jtsits ya'iic yu'un stoyobbail ti muc' ta lum Israele.

¹³Ti c'u sjalil cuxul ti buch'u oy c'usi laj xchone, mu xa c'usi xut stsob ti stojole. Ti c'u s'elan laj spas ti strate xchi'uc ti sbolomale, mu stac' sutes ti ye sti'e. Mi juteb stac' spoj sba ti buch'u mu'yuc xch'ulel xa'i sbae.

¹⁴Xtutet xa ta x'ic'van ti oq'ues ta sventa ti letoe. Ta xlic xchapan sba scotolic un. Mi junuc ta stsinbe yipal ti tsacvanej ta letoe. Ta sc'ac'al co'nton ta jtsits ya'iic yu'un stoyobbailic ti israeletique.

¹⁵Ti ta sti'il spatile, xc'anobaj ti letoe. Ti ta yutile, xyaquet ti chamele xchi'uc ti vi'nale. Ti buch'u oyic ta osiltique, leto xa xa'i xchamic xlajic. Vi'nal xa'i xchamic xlajic, xchi'uc ta xlajic ta tsots chamel ti buch'u oyic ta yutil ti jteclume.

¹⁶Manchuc mi oy jlomuc co'ol s'elan paloma batem xa xch'ulel ta xi'el cuch to yu'un bat snac' sbaic ta vitsetique, scotol ta xchamic ta scoj ti smulique.

¹⁷Ta x'alub sc'ob scotolic. Xt'elt'un xa yacanic yu'un ti xi'ele.

¹⁸Lajemal c'u'il ta slapic, svinajeb ti mu xnel x'ech' ta xa'iic yipal xc'uxul ti vocole. Xt'elt'un sjunul ti sbec'talique. Chacpochanic xa ta q'uexlal ta xbatic, ti xch'uloj ta loq'uel ti stsotsil sjolique.

¹⁹Ta sjipic batel ta be ti platae. Co'ol xa s'elan c'a'ep ta sjipic batel ti oroe. Laj to sc'oplal ta xpojeic yu'un ti oroe, ti platae ta sc'ac'alil ti liquem scapemal sjol ti Diose. Mu xmac yu'un ti vi'nale, mi ja'uc xnoj ti xch'utique, ja' ta scoj oy ti oro yu'unic lic spasic ti c'usi mu stac' alele.

²⁰Lic stoy sba xchi'uquic ti c'usitic c'upil sba oy yu'unique, ja' lic stunesic ta j'ac'-ib-o'nton loc'obbailetic yu'unic un. Jech o xal ta joybinbe ta c'a'ep ti c'usitic c'upil sba oy yu'unique.

²¹Xi laj yal ti Diose: “Ta xquic' talel jyanlumetic ti elc'anbaticuc batel ti c'usitic x'ayan yu'unique. Talicuc jnaclejetic ti bu xa spajeb ch'abal xch'ulelic ta banomil ti pojbaticuc batel ti c'usitic oy yu'unique, ti co'oluc s'elan c'a'ep ilaticuque.

²²Ta jq'uej jba loq'uel ta jteclum li'e. Ta xcac' que jti' ac'o soquesic ti jch'ulna ti batem co'nton yu'une. Ta xtal j'eleq'uetic ta soquesel.

²³“Chapano jlicuc carina taq'uin. Ti jteclum li'e, yepal ti chapal sc'oplal ta x'ac'bat stojic ta scoj ti smilvanejalique, ti mu stac' alel c'usitic ta xc'ot ta pasel li' ta jteclume.

²⁴Ta jtac talel jnaclejetic ti mu'yuc xch'ulel xa'i sbaic ta yu'ninel ti naetic yu'un ti jteclume. Ta jtsutsesbe stoyobbailic ti buch'utic tsots xa'i sbaique. Jq'ueloj no'ox soquesbaticuc ti c'opojebal ti'inebal yu'unique.

²⁵U'ninbil no'ox ta xa'iic yu'un ti xi'ele. Ti sa'ilanic xa bu ta tael lamajem ti c'op ta banomile, mu staic un.

²⁶Liquel cajal ti c'usitic chopol ta xvul ta loq'uele. Xlic xcaj no'ox yalilanel ti c'usitic chopol ta xich' alele. Ch'ay c'ac'al xal ti utsuc xa sa'ilanic ti jamal sba sat j'alc'opetic ti ac'baticuc sna'ic yu'un ti c'usi xc'ot ta pasele. Laj to c'op ti ta stojobtasatic yu'un ti paleetique, ti ta sbijubtasatic yu'un ti banquilaletique.

²⁷Ti banquilal ajvalile utsuc xa slapilan lajemal c'u'il. Ti its'inal ajvalile pajal xa sjol ta at-o'nton. Ta xniquic liquel ti jteclum une. Jech ta jpasbe ya'iic ti c'u s'elan loc' ta sa'el yu'unique. Jech ta jchapan ya'iic jech c'u cha'al chapanvanique. Ta xlic sna'ic ti vu'un Ajvalilune.”