Read Tzotzil Daniel 1 Bible Online

Daniel 1 - Tzotzil bible

Daniel 1

¹Ta yoxibal xa ox jabil tiq'uil ta yabtel ti Joacim ajvalil yu'un ti jteclum Judae, jech ti Nabucodonosor ajvalil yu'un ti jteclum Babiloniae, c'ot ta Jerusalén ti laj svolic ta maquel xchi'uc yajsoldadotac ti jteclume.

²Jech ti Diose laj yac' ye ti ac'o ochuc ta c'abal yu'un Nabucodonosor ti Joacime, ti ochuc ta yoc sc'ob xtoc ti c'usitic jtunel ta xch'ulna ti Diose. Ti Nabucodonosore laj yic' batel c'alal to Babilonia ti jchuqueletique. Jech ti c'usitic toj jtunel ti laj sta batele, c'ot yac' ti bu q'uejel sc'ulejal ta xch'ulna ti yajdiostaque.

³Ja' jech xtoc laj yalbe mantal ti Aspenaz ti ja' jpas-mantal yu'unic ti jtuneletic ta sna ti ajvalile, ti ac'o yich' t'ujel batel ta stojol sts'unubal yalab xnich'nab ti ajvalil yu'un ti Israele.

⁴Va'i un, ja' laj yich' t'ujel ti bu c'ac'al querem viniquetique, ti mu'yuc xchopolil jutebuc ti sjunulique, ti lec chanubtasbilique, ti oy lec sbijilique, ti xvul no'ox talel ta sjolic scotol ti c'usi xu' ta xich' na'ele, xchi'uc ti baxbolic ta tunel ta sna ti ajvalile. Ti stuquique licuc yich'ic chanubtasel ti c'u s'elan ta xc'opojique, xchi'uc ti c'u s'elan sna' sts'ibajic ti caldeoetique.

⁵Ti Nabucodonosore laj yal mantal ti scotoluc c'ac'al ti naca lequil ve'liletic xchi'uc vino ac'baticuc ti querem viniquetique, co'ol jech c'u cha'al ta slajes ti ajvalile, ti ac'o yich'ic chanubtasel oxibuc jabile. C'alal mi ts'aquie, ta xlic ochuc ta tunel yu'un.

⁶Ta scotolic ti querem viniquetic taje, ja' ti Daniele, ti Ananíase, ti Misaele, xchi'uc ti Azaríase, ti ja' liquem talel sts'unubalic ta snitilul ti Judae.

⁷Ja'ic ti xi jeltabat sbiic yu'un ti banquilal jtunel ta sna ti ajvalile: Ti Daniele, Belsasar, lic ac'batuc sbi. Ti Ananíase, Sadrac, lic ac'batuc sbi. Ti Misaele, Mesac, lic ac'batuc sbi. Ti Azaríase, Abed-negó, lic ac'batuc sbi.

⁸Ja'uc ti Daniele laj yalbe yo'nton ti mu soques sba yo' ta slajesbe sve'el yuch'bol vino ti ajvalile. Va'i un, laj yalbe ya'i ti banquilal jpas-mantale ti mu sujat ta slajesel c'usiuc no'ox ve'liletic ti xu' ta soquesate.

⁹Yo' laj sta ti lec ilat yu'un banquilal jpas-mantal ti Daniele, ja' yabtel stuc ti Diose.

¹⁰Ja' no'ox un, xi albat yu'un ti jpas-mantale: “Oy xi'el ta xca'i ta stojol ti cajval ti ja' ajvalile. Yu'un ti stuque laj yalbun ti tsots sc'oplal ta xalajesic ta xavuch'ic ti c'u s'elan albile. Yu'un vo'oxuc me ta acojic ti xu' ta xismilun ti ajvalile c'alal mi ta xil ti mu co'oluc xcuxoj asatic ta q'uelel jech c'u cha'al ti yan querem viniquetique.”

¹¹Va'i un, ti Daniele laj xchi'in lec ta lo'il, ti xi laj yalbe ti buch'u va'anbil yu'un ti banquilal jpas-mantal ti ta xtun ta sna ti ajvalile, ti ja' sbainoj ti Daniele, ti Ananíase, ti Misaele, xchi'uc ti Azaríase:

¹²“Xi ta jc'an vocol ta atojole: Ac'o ave ati' lajunebuc c'ac'al ti naca uni itajetic no'ox ta jlajescutique, xchi'uc ti naca bats'i vo' ta xcuch'cutique. Calal mi ts'aquie, tey ta xavil c'u s'elan jsat quelovcutic ti avajtuneluncutique.

¹³C'alal mi ech' ti va'i sjalile, co'oltasuncutic, mi xco'olaj, mi mu xco'olaj jsatcutic xchi'uc ti querem viniquetic ti ta slajesic scotol ti lequil ve'liletic jech c'u cha'al ta slajes ti ajvalile. Yan ti mi jelel c'ot une, tey xapas ta jtojolcutic ti c'usi lec ta xavile.”

¹⁴Jech ti jtunele, c'ot ta yo'nton ti va'i s'elan albate. C'alal ts'aqui ti lajuneb c'ac'ale, co'oltasvan lec.

¹⁵C'alal ech' xa ox ti lajuneb c'ac'al une, vinaj ti ja' x'ech' to xcuxoj ti satique, ti tsots lec ta q'uelele, ti ja' mu sta ti yan querem viniquetic ti laj stun slajesic scotol ti lequil ve'liletic yu'un ti ajvalile.

¹⁶Ja' yu'un un, ti jtunele laj yich' batel ti ve'lile, ti vinoe, ti oy sc'oplal ta slajes ta xuch'ique. Ja' no'ox un, ti stuquique c'ajomal no'ox uni itaj ta slajesic.

¹⁷Ti chanib querem viniquetic taje, ac'bat sbijilic yu'un ti Diose, xchi'uc ti xvul no'ox ta sjolic yo' ta xa'ibeic smelol ti ep ta poc vunetic ti naca vocol ta a'yiel ti c'usitic nopbil teye. Yu'un ti Daniele sna' st'unbel smelol ti ep ta tos ti c'usitic ta xich' ilel ti c'alal ta xjam ti ba satile, xchi'uc ti c'usitic ta xvinaj ta vaichile.

¹⁸C'alal laj sta ti c'u sjalil yaloj ti ajvalil ti ta xc'ot sva'an sbaic ta stojol ti querem viniquetique, jech ti banquilal jpas-mantal yu'une, laj yic' batel ti querem viniquetic ta stojol ti ajvalile.

¹⁹Jech ti ajvalile laj xchi'inan ta lo'il. Ta scotol ti querem viniquetique, mi junuc laj sta ti oy buch'u xco'olaj o jech c'u cha'al ti Daniele, ti Ananíase, ti Misaele, ti Azaríase, ti ja'ic no'ox comic ta yajtunel ti ajvalile.

²⁰Yu'un scotol ti c'usi sc'an pasele, ti sc'an bijilile, ti sc'an xac' no'ox ta sjolilal ti c'usi laj sjac' ti ajvalile, ja' lajuneb to velta xjelav tac' yu'unic, ja' peq'uel com scotol ti bijil viniquetique, xchi'uc ti jt'unvanejetic ti oyic ta spasob mantale.

²¹Jech com ti Daniele ja' to ti c'uxi c'ot ta sliqueb jabil ti och ta ajvalilal ti Ciroe.