Read Tzotzil Daniel 12 Bible Online

Daniel 12 - Tzotzil bible

Daniel 12

¹“Ti jech c'ac'al taje, ja' o ta xvul ta loq'uel ti Miguel ti ja' banquilal jpojvanej ánjel ti ta stic' sba ta spojel ti ateclumale. ‘Yu'un ti jech taje, ja' o ta xvul ta loq'uel ti mu no'ox ts'icbajuc ti vocole. Yu'un ti c'alal lic ayanuc talel ti muc'tiquil jteclume, mu'yuc xilic o ti jech xc'ot ta pasele. C'alal mi c'ot sc'ac'alil ti ta xvul ta loq'uel ti va'i s'elan taje, scotol ti ateclumal ti ts'ibabil sbiic ta jpoc vune, ta xcolic.

²Ep ti xi s'elan ta xc'ot ta stojolic ti buch'utic oyic ta muquinale: Oy jlomuc ti ta staic ti ta xcuxiic sbatel osile. Oy jlomuc ti ja' no'ox ta staic nijil chimil ta xcomic ta q'uexlale, ti mu x'ech' xjelav ti svocolic sbatel osile.

³Ti bijil viniquetic ti ep cuch yu'unic ta stojobtasel batel ta lequil be ti yane, xlaplun no'ox yutsilic ta q'uelel jech c'u cha'al ti yaxts'ijan vinajele. Sbatel osil xojobinic no'ox jech c'u cha'al ti c'analetique.

⁴“Ja' no'ox un, ti vo'ote, Daniel, ts'ijlan no'ox me. Avo'ntonuc no'ox sna' ti va'i s'elan taje. Ja' jech xtoc, pac'bo lec xpix ti jpoc vune. Q'uejluc o, ja' to ti c'uxi ta xc'ot ti yorail albile. Yu'un ep ti xtal xbat ta jujujot ti jnaclejetic ta sa'ilanel ti c'uxi xu' ta sta lec ti sbijilique.”

⁵Jech ti vu'un Danielune laj quil va'al yan cha'vo' viniquetic ta jujujot sti'il ti uc'ume.

⁶Oy jun yu'unic ti xi laj sjac'be ti vinic ti slapoj ti lequil saquil c'u'il ti va'al ta ba vo' ta o'lol uc'ume: “¿C'usi to ora ta xc'ot ta tsutsel ti vi s'elan ti mu no'ox albajuc ti c'usi c'otem ta pasele?”

⁷Jech ti vinic ti buch'u slapoj ti lequil saquil c'u'ile, xi laj yal ti c'alal laj stoy ti sc'ob ta vinajel ti laj sva'an ta rextico ti cuxul Diose: “Li' to c'alal ta o'lol xchanibal jabile, c'alal mi laj sc'oplal ti ch'abal xa yipic ta yilbajinel ti steclumal Diose. Va'i unbi, ja' to jech ta xc'ot ta tsutsel ti va'i s'elan taje.”

⁸Laj ca'i lec ti c'usitic laj yalolane. Ja' no'ox ti mu'yuc xchiquintaj cu'un jutebuc ti smelole. Va'i xichi laj jaq'ue: “Cajval, ¿c'usi ta xc'ot ta pasel mi ech' scotol ti va'i s'elan taje?”

⁹Ti stuque xi laj stac'bune: “Xu' xa xatam batel abe, Daniel, yu'un ti va'i s'elan taje, tsots sc'oplal ti mucluc comuque, ja' to me ti c'uxi ta xc'ot ti yorail albile.

¹⁰Ti vocoletic ti caj albil sc'oplale, ep ti buch'utic ta xc'ot ta stojolique. Ti ja' jech ta xc'ot ta stojolic taje, ja' to jech pocbil sapbil ta xcomic, ti tuq'uibtasbil ta xcomique. Yan ti buch'utic toj chopole, tey ochem o batel yipal yu'unic ta spasel ti c'usitic toj chopole. Mi ja'uc xa'ibeic smelol ti c'usi ta xc'ot ta stojolique. Ja'uc ti bijil viniquetique xa'ibeic lec smelol scotol.

¹¹“Ti mi ts'aqui xa ox ti jmil xchi'uc lajuneb yo'lajunvinic (1,290) c'ac'al yech'el ti c'uxi lic ch'ayuc sc'oplal ti milbil matanaletic ti ta xich' aq'uel ta jujun c'ac'ale, ta xc'ot ta pasel ti ta xich' aq'uel ta xch'ulna Dios ti matanal ti ta xac' ib-o'ntone.

¹²Mu'yuc no'ox c'usi sna' ta j'ech'el ti buch'u spatoj o yo'nton c'alal xc'ot ta ts'aquiel ti oxlajuneb cien xchi'uc yo'lajuneb xcha'vinic (1,335) c'ac'ale.

¹³“Jech ti vo'ote, Daniel, mu xasoc ta be, ts'inano lec avo'nton ta stsutsesel ti avabtele. Yu'un ta xalic tal ta yich'el ti amoton ta slajebal c'ac'ale.”