Read Tzotzil Daniel 4 Bible Online

Daniel 4 - Tzotzil bible

Daniel 4

¹Ti Nabucodonosore laj stac batel vun ta stojol ti jnaclejetic ta banomil ti xi ta xale: “Ti ajvalil Nabucodonosorune, oy ta co'nton lamajemuc ti c'op yu'unique, mu'yucuc c'usi sna'ic ti jnaclejetic ta scotol ti jteclumetique, ti muc' ta lumetique, ti ep ta tos sc'opic ti li' nacalic ta banomile.

²Ta jc'an ti ac'o ana'ic ti c'usitic toj jun yutsil ch'ayal ta xc'ot o'ntonal yu'un ti c'usi laj spas ta jtojol ti muc'ul Dios oy ta toyole.

³Stuc xa no'ox jech ti sbijil ta xac' ta ilele, ti ch'ayal o'ntonal ta xc'ot yu'une. Sbatel osil ja' Ajvalil ta xcom oe. Staoj yav ti smuc'ul stsatsal ti jaylajun-q'uexel chlaj ech'icuc ti totil me'ile.

⁴“Ti vu'un Nabucodonosorune, jun to ox co'nton chotolun ta jpasob mantal, ti mu no'ox c'usi jna' ta j'ech'el ta x'ech' cu'un ti jujun c'ac'ale.

⁵Ja' no'ox un, oy jun ac'ubal c'alal telel ta jcuxe, livaichinaj, toj xi'bal sba ti c'usi laj quile. C'alal jech lic ta vulvunel ti jol co'nton ti c'usitic ta jnope, lic ochcun ta xi'el yu'un ta j'ech'el. Yu'un yip xa laj sta ya'luc ti c'alal vul ta co'nton ti c'usi li'ac'bat quil ti c'alal jam ti jba jsate.

⁶Ja' yu'un un, laj cal mantal ti talicuc ta jtojol scotol ti bijil viniquetic ti oyic ta Babiloniae yo' jech ta xiyalbeicun c'usi smelol ta xac' ta na'el ti jvaiche.

⁷Va'i un, talic scotolic ti buch'utic xilic ti cajal toyole, ja' ti jt'unvanejetique, ti bijil viniquetique, ti buch'utic sna'ic sq'uelel senyailtaque, ti oyic ta jteclum Babiloniae. Lic jchapbe ya'iic ti c'usi laj quil ta jvaiche. C'u stu un, mi jutebuc cuch yu'unic ta yalbelun ti c'usi smelol ta xac' ta na'ele.

⁸Ta slajeb un, tal sva'an sba ta jtojol ti Daniele, ti sbiinoj Belsasar xtoque, ti yich'ojbe sbi ti jdiose, ti ja' yich'ojbe xcuxlejal ti Ch'ul Diose. Va'i un, xi xchapet laj calbe ya'i ti c'usi laj quil ta jvaiche:

⁹Ti vo'ote, Belsasar, ti banquilal c'otemot yu'un ti jt'unvanejetique, jna'oj lec ti tojobtasbilot yu'un xcuxlejal ti Ch'ul Diose, ta xava'ibe lec smelol scotol ti c'usitic oy ta mucule. Ja' yu'un un, a'yibun ava'i lec c'usi laj quil ta jvaiche. Albun ca'i c'usi smelol ta xac' ta na'el,

¹⁰yu'un c'alal puch'ulun ta jcux co'ntone, xi s'elan ti c'usitic laj quil ti c'alal jam ti jba jsate: “Ta o'lol ti banomile, laj quil jpets te' ti mu albajuc ti snatile.

¹¹Ch'i ti te'e, muq'uib ta j'ech'el ti yoque. Tijil xa c'otel ta vinajel ti sni' yilele. Xvinaj to lec ta q'uelel ac'o mi ta namal banomil xa.

¹²Toj c'upil sba ta j'ech'el ti yanale. Limil no'ox ti sate, ti ja' ta smalq'uin scotole. Jech ti chon bolometique lamal no'ox ta x'axinajic ta yolon. Yan ti ta sc'ob-c'obtaque, tey ta spas stasic ti mutetique. Yu'un tey ta xcuxiic ta sventa scotol ti banomile.

¹³“Ta jech to yepal ti c'alal jam ti jba jsate, laj quil jun jchabivanej ánjel ti yal talel ta vinajele.

¹⁴Va'i un, tsots c'opoj ti xi ta xale: ‘Ts'etic yalel ti te' le'e, basbeic ti sc'obtaque, jisbeic ti yanale, taniic ta tuch'el ti sate. Ac'o jatavicuc loq'uel ti chon bolometic ti oyic ta yaxinale, xchi'uc ti mutetic ti vololic no'ox ta sc'ob-c'obtaque.

¹⁵Ja'uc ti xchumanile xchi'uc ti yibele, tec'luc comuc avu'unic ta banomil. Ja' no'ox un, chuquic ya'i ta carina ti capbil ta meltsanel ta tsatsal taq'uine xchi'uc ti ta c'anal taq'uine. Chucluc comuc avu'unic ta yut momoltic ti oy ta osile. Lajuc ya'i ta job ac'ubal. Joybijuc ta jlo'-jobel jech c'u cha'al ti chon bolometic oy ta osiltique.

¹⁶Yanijuc ti snopbenal yu'un ta j'ech'ele. Joybijuc ta jun chon bolom ti stalele. Yu'un vucub jabil ti jech ta xc'ot ta stojol taje.

¹⁷Yu'un ti jchabivanej ch'ul ánjeletique, loc' mantal yu'unic ti ac'o ya'i ti va'i s'elan ta xc'ot ta stojol taje. Ja' to jech ta sna'ic scotol jnaclejetic ti oy smuc'ul stsatsal ta spas mantal ta stojol ajvaliletic ti Dios ti oy ta toyole. Yu'un ti stuque xu' ta stic' ta ajvalil ti buch'u xc'ot o ta xile. Xu' ta xc'ot ta jun banquilal jpas-mantal yu'un ta jun muc' ta lum ti buch'u biq'uit ta xac' sbae, ti mu xco'olaj jech c'u cha'al ti yan viniquetique.’

¹⁸“Ja' jech s'elan ti jvaich laj quil ti ajvalil Nabucodonosorune. Avi tana un, Belsasar, albun ca'i c'usi ti smelol ta xac' ta na'ele. Yu'un ti bijil viniquetic ti li' oyic ta jpasob mantale, mi junuc cuch yu'unic ta yalbel ti smelole. Yan ti vo'ote xu' avu'un ta yalbel ti smelole, yu'un ventainbilot yu'un xcuxlejal ti Ch'ul Diose.

¹⁹“Va'i un, ti Daniele, ti ja' Belsasar ti yan sbie, ts'ijil com jliquel ta snopel. Batem xa xch'ulel ta xi'el ta snopel ti c'usi ta x'ac'bat sna' yu'un ti sjol yo'ntone. Jech ti vu'un ajvalilune xichi laj calbe ya'ie: ‘Ti vo'ote, Belsasar, mu teyuc no'ox xana'et ta yalbel smelol ti jvaich ti c'u s'elan laj quile.’ Va'i un, ti Belsasare xi laj staq'ue: ‘Teque' no'ox ch'a ya'yel un, jc'anticuc ya'yel, Jcuch abtel, ti ja' cajaluc c'otuc ta sba avajcontratac scotol ti smelol ti c'usi ta xac' ta na'el ti avaiche.

²⁰Yu'un ti jtec' muc' ta te' ti toyol muy ta j'ech'ele, Jcuch abtel, ti laj avil ti tsacal xa yilel ta vinajel ti sni'e, ti xvinaj ta q'uelel ta sbejel ti banomile,

²¹ti laj avil ti jun yutsil ti yanale, ti lisil no'ox ti sate, ti xmalq'uij yu'un ta scotole, ti ta xtal axinajicuc ta yaxinal ti chon bolometic ti oyic ta osiltique, ti ta spas stasic ti mutetic ta sc'ob-c'obtaque,

²²ti jtec' te' taje, ja' ac'oplal, Jcuch abtel. Yu'un cajal c'otemot, tsots xu' avu'un. Yu'un ti c'u s'elan xu' avu'une, Jcuch abtel, jelavem ta j'ech'el, ti c'otem xa jech c'u cha'al staylej ti vinajele. Yu'un oy ta avoc ta ac'ob sbejel ti banomile.

²³Yu'un ti vo'ote, Jcuch abtel, laj avil xtoc ti yal talel ta vinajel jun jchabivanej ch'ul ánjel ti xi laj yale: Ts'etic yalel ti te' le'e. Lajuc sc'oplal avu'unic. Ja' no'ox un, tec'luc comuc ta banomil ti xchumanil xchi'uc ti yibele, ti chuquic ta carina ti meltsanbil ta tsatsal taq'uin xchi'uc ta c'anal taq'uine. Sucluc comel ta momoltic avu'unic ti oy ta osile. Ac'o lajuc ya'i ta job ac'ubal. Vucub jabil sjalil joybijuc ta jlo'-jobel jech c'u cha'al ti chon bolometic ti oy ta osiltique.

²⁴“ ‘Taje, Jcuch abtel, ja' smelol ta xac' ta na'el ti ja' jech ta xc'ot ta atojol. Loc' ta ye ti xu' jech ta xavich' yu'un ti Dios ti oy ta toyole.

²⁵Taj une, Jcuch abtel, ta xc'ot ta pasel ti ch'acal ta xacom xchi'uc ti jnaclejetique, ti xbat capetan xchi'uc ti chon bolometique. Ta xalo' jobel jech c'u cha'al ti vacaxetique. T'iniluc apat ta xalaj ta job ac'ubal. Ja' jech acuxlej ta xc'ot ta atojol vucub jabil taje, Jcuch abtel, ja' to ti mi laj ana' lec ti oy smuc'ul stsatsal ti ta spas mantal ta stojol scotol ajvaliletic ti Dios ti oy ta toyole. Yu'un ja' ta xac' ochuc ta banquilal jpas-mantal ti buch'u ta sc'an ta xac' ochuque.

²⁶Ti laj yich' alel mantal ti tecluc comuc ta banomil ti xchumanil xchi'uc ti yibele, ja' smelol ta xac' ta na'el ti xu' to ta xlic ochuc ta ajvalil ti Jcuch abtele, ti mi laj sna' lec ti ja' no'ox stuc Dios ti oy smuc'ul stsatsale.

²⁷Manchuc mi jech taj une, Jcuch abtel, c'otuc ta avo'nton ti xi s'elan ta xcalbot ti bijubtasele: Ja' nopo ta spasel ti c'usi tuq'ue. Mu xasa' amul. Quechano aba ta spasel ti c'usitic chopole. Ja' o'ntolino ta scoltael ti me'un mu'natetique. Yu'un ti mi jech ta xapase, Jcuch abtel, yic'al to nan xu' ta xata ti jun avo'nton ta xacuxie, ti mu'yuc c'usi xana' ta x'ech' avu'un ti c'ac'ale.’ ”

²⁸Scotol ti va'i s'elan ta xcaj'alolanbat ti c'usi ta xc'ot ta stojol ti ajvalil Nabucodonosore, yu'un xi s'elan c'ot ta pasele:

²⁹Ech' xa ox jun jabil un, ti c'alal ja' o tey xva'et ta x'elovaj ti ajvalil ta spasob mantal ti oy ta jteclum Babiloniae,

³⁰ti xi lic yalbe sbae: “C'u xa no'ox yutsil ta xilic ti q'ue smuc'ul bat ti jteclum Babiloniae. Yu'un ta jmuc'ul jtsatsal, meltsaj cu'un ti jech muq'uib ta j'ech'ele yo' jech c'ot ta jtsobvanej jteclum ti bu ta jpas-mantale, yo' jech ta xquicta comel jna'obil ti oy jmuc'ul jtsatsal li'ech'e.”

³¹Naca to jech xvulvunet ta yalel ti ajvalile, ti ja' o ta jech to yepal oy buch'u c'opoj talel ta vinajel ti xi laj yale: “Ajvalil Nabucodonosor, a'yio ava'i ti jbel cha'bel c'op li'e. Yu'un ti apasob mantale, lapojbat xa.

³²Taje, ja' xa c'ot ta atojol ti ch'acbil ta xaloc' ta stojol ti achi'iltaque. Ja' xa ta xbat capetan xchi'uc ti chon bolometique. Yu'un vucub jabil sjalil ta xalo' jobel jech c'u cha'al ti vacaxetique, ja' to ti mi lic ana' ti ja' no'ox stuc oy smuc'ul stsatsal ta spas mantal ta scotol muc'tiquil lumetic ta sbejel banomil ti Dios ti oy ta toyole, ti ja' yabtel stuc ti ta stic' ta ajvalil ti buch'u lec ta xile.”

³³Ta yorail no'ox, c'ot ta pasel ti c'usi caj'albil ono'ox ta xc'ot ta stojole. Jech ti ajvalil Nabucodonosore laj yich' ch'aquel loq'uel ta stojol ti jnaclejetique. Lic slo' jobel jech c'u cha'al ti vacaxetique. Xt'inet spat ta xlaj ta job ac'ubal. Tey lic natubuc ti stsotsil sjole, ti co'ol s'elan sc'uc'umal ti xique. Natub ta j'ech'el ti sni' yich'actaque, ti chavalic no'ox ta q'uelel jech c'u cha'al yich'ac ti xique.

³⁴“C'alal c'ot ta tsutsel ti c'u sjalil chapanbil ta xc'ot ta pasele, ti vu'un Nabucodonosorune lic jtoy jsat. Laj jq'uel muyel ti vinajele. Laj ca'i ti tuq'uib ti snopbenal cu'une. Va'i un, lic lequil c'opojcun ta stojol ti Dios ti oy ta toyole, ti xi s'elan yutsil ti que jti' lic'opoj ta stojol ti Buch'u stalel cuxul ta sbatel osile: “Mu sna' xlaj sbatel osil ti smuc'ul stsatsale. Yu'un ja' no'ox stuc Ajvalil ta spas mantal ta stojol ti jaylajun-coj ti ta xlaj ech'uc ti totil me'iletique.

³⁵Yu'un ta sba ta sat ti stuque, mu'yuc c'usi xu' yu'unic ta xil scotol ti jnaclejetic ta banomile. Yu'un ja' ta xc'ot ta pasel yu'un ti c'usi snopoj stuque. Ja' ta spas mantal ta vinajel xchi'uc li' ta banomile. Mi junuc ti oy buch'u xu' yu'un ta spajesel ti c'usi oy ta yoc ta sc'ob ta spasele. Mi ja'uc oy buch'u xu' ta sjac'be ti c'u yu'un jech ta snop ta spasel ti c'ot ta nopel yu'un jech c'u cha'al le'e.

³⁶“Ta yorail no'ox ti c'alal jech c'ot ta pasel taje, lic cuxiuc talel ti snopobil cu'une. Vul ti jch'ulele. Lic ayanuc yutsilal ti c'u s'elan ta jpas-mantale, ti cajal c'ot ti jc'oplale, ti jelavem xu' cu'une. Jech ti jtojobtasvanejetic cu'une, xchi'uc ti buch'u cajal yabtelic cu'un ti ta spas mantale, tal sq'uelicun. Va'i un, lic jva'an jba ta pas mantal yu'unic ta stojol ti jteclumale. Lic quich' quip ta ventainvanej ti xjelav to laj jtae, ti ja' mu sta ta ba'yel to oxe.

³⁷“Avi tana une, ti Nabucodonosorune ta jlequil-c'opta, ta jnijan jba ta yich'el ta muc', ta xcac' ta toyol sc'oplal ti Ajvalil yu'un ti vinajele. Yu'un scotol ti c'usi ta spase, ja' melel, tuc' scotol. Yu'un xu' ta spec'tsanbe sc'oplal ti buch'u ta snop ti xu' xa yu'un ti yaloje.”