Read Tzotzil Daniel 7 Bible Online

Daniel 7 - Tzotzil bible

Daniel 7

¹Oy jun ac'ubal, ti c'alal ja' to ox sliqueb jabil yochel ta ajvalil ta Babilonia ti Belsasare, jech ti Daniele vaichinaj ti oy c'usi ac'bat yil ti c'alal jam ti sba sate. C'alal julave, lic sbejan ta vun ti jaytos tsotsic sc'oplal ti c'usi laj svaichintae. Ti c'usi laj sbejan ta vune, jech c'u cha'al li'e:

²Ti ta jvaiche, laj quil ti xvo'o'et no'ox talel ic' ta xchanjotal ti banomile, ti xyuq'uet no'ox ta jujujot yu'un ti muc' ta nabe.

³Ta jech to yepal, vul ta loq'uel chancot (4) xi'bal sba muc'tiquil jti'oval chon ti yan o ta q'uelel ti jujucot ti loq'uic talel ta nabe.

⁴Ti bu ba'yel laj quile, co'ol s'elan jcot león yilel. Ja' no'ox un, oy xic' jech c'u cha'al ti xique. C'alal ja' o batem jsat xchi'uc ta sq'uelele, laj quil ti laj yich' loq'uesbel ti xic'taque. Lic stoybeic liquel ti sjole. Laj stec'anbeic lec ti svalopat acan ta lumtique. Va'al lec com yu'unic jech c'u cha'al junuc vinic. Lic ayanuc snopobil yu'un jech c'u cha'al snopobil yu'un jun vinic.

⁵Ti xcha'cotale, co'ol s'elan jcot oso ti toyol cotol laj quile. Scats'oj oxtel ch'ilte'il ta yee, ti laj ca'i ti xi albate: “Batan, ti'an scotol ti beq'uet ti bu c'alal xu' avu'une.”

⁶Ti yoxcotale, co'ol s'elan muc' ta bolom laj quil. Ja' no'ox un, oy chanib xic' ta spat. Ja' jech xtoc laj quil oy chanib sjol, ti ac'bat yich' ti jelavem xu' yu'une.

⁷Ti xchanibal xi'bal sba jti'oval chon ti li'ac'bat quil ti c'alal jam ti jba jsate, toj ech'em xi'elal ta j'ech'el, ti stuc xa no'ox jech xu' yu'un ta j'ech'ele. Jun to snatiquil stanal ye, ti ja' tsatsal taq'uin yilele, ti naca smilan no'ox scotole. Mu no'ox ta yeuc ta xa'i ti ta slilinane. Ta sju' comel ta teq'uel ti c'u yepal ti scomelale. Ja' jun jti'oval chon ti stuc no'ox yan o ta q'uelel ta scotol ti c'u yepal laj quil ta jvaiche. Yu'un oy lajuneb (10) xulub ta sjol laj quil.

⁸C'alal ja' o batem jsat ta sq'uelel ti xulubtaque, laj quil ti ta xch'i talel sbiq'uit q'uelom ti ta olol ti xulubtaque. Va'i un, laj yich' c'ocbel loq'uel oxib ti syijil xulube yo' jech xu' tey ta xch'i liquel ti sq'uelome. Jech ti stuque, co'ol s'elan sat vinic ta q'uelel yilel, ti spajeb xa no'ox mu ts'icbaj ti c'usitic ta xloc' ta yee.

⁹Mu'yuc jch'ay jliqueluc jsat ta sq'uelel c'alal to c'uxi lic yaq'uic ti jun chibuc ti muc'tic chotlebale, ti ja' jun Mol ti tey tal chotluque. Ti Mol taje, co'ol s'elan saquil bot ti sc'u' slapoje, ti sac mesan no'ox jech c'u cha'al saquil tsots ti stsotsil sjole. Ti xchotlebe, co'ol s'elan leb c'oc' ti scarosaltaque.

¹⁰Co'ol s'elan leb c'oc' ti uc'um ta xloc' talel ti bu oye. Ja' jech xtoc ep ta mil ti yac'oj sbaic ta tunel tey ta stojole. Yan ti buch'utic naca va'ajtic ta sts'ele, mu xa ono'ox albajuc jaylajun-mil ta j'ech'el. Jech ti Buch'u chotol ta xchapanvane lic sliques ti c'usi ta xich' chapanele. Jech xtoc laj yich' jamel ti jujupoc vunetique.

¹¹Jq'ueloj, batem co'nton xchi'uc ti c'usi ta xalilan ti snene' xulub ti xloquet no'ox snuc' ta spase. C'alal ch'ayal co'nton ta sq'uelele, laj quil ti laj smilic ti muc' ta jti'oval chone. Laj slilinic ta bic'tal bojilanel. Laj xtoc un, laj sjipic ochel ta c'oc' yo' jech ta xc'ac' yu'unic.

¹²Ja' jech xtoc ti yan muc'tiquil jti'oval chonetique, laj yich'ic pojbel ti jech jelavem xu' yu'unique. Le' une, cuxul laj yictaic ja' to ti c'uxi ta xc'ot ta tsutsel ti ora yu'unique.

¹³C'alal yacalun ta sq'uelel ti c'usi jam jsat ti li'ac'bat quil ta ac'ubaltique, ta anil no'ox xi c'ot ta pasele: laj quil ti co'ol s'elan vinic ti tal ta ba toque, ti bat ti bu oy ti Mole. Aq'ue nopajuc batel ta stojol.

¹⁴Ac'bat yich' ti jelavem smuc'ul stsatsale, ti yutsilal slequilale, ti ventainel yu'une. Jech o xal ta xac' sbaic ta tunel ta stojol scotol ti jnaclejetic ta jujun muc' ta lume, ti ta jujuchop ti sc'opique. Yu'un jech sbatel osil ti oy smuc'ul stsatsale. Mi jutebuc ta xc'ot ta tubel ti c'u s'elan ta spas mantale.

¹⁵Ti vu'un Danielune laj ca'i ti litsaque yu'un ti xi'ele. Vul o'ntonun xa xchi'uc scotol ti c'u s'elan laj quile.

¹⁶Tey linopaj batel ta stojol jun yu'unic ti c'u yepal tey va'alique. Laj jc'anbe ti ac'o yalbun scotol smelol ti c'usi laj quile. Jech ti stuque laj xch'un cu'un ti ac'o yalbun ca'ie, yu'un xi laj yalbune:

¹⁷“Ti chanib (4) xi'bal sba muc'tiquil jti'oval chon le'e, ja' sc'oplal chanib (4) ajvaliletic ti ta x'och ta yoc ta sc'obic ta sventainel sbejel ti banomile.

¹⁸Ts'acal to un, ti jech sc'oplal ochemic ta ajvaliletique, ja' ta xlic jelobtasbaticuc ta yoc ta sc'obic ti jteclum yu'un Dios ti oy ta toyole, ti ja' j'ech'el ta xcomic o ta pas-mantal sbatel osile.”

¹⁹Oy ox ta co'nton ta xca'ibe sc'oplal ti ta xchanibal ti xi'bal sba muc' ta jti'oval chone, ti stuc no'ox toj yan ta q'uelele, ti xi s'elan xi'elal ta q'uelele: Yu'un tsatsal taq'uin ta q'uelel ti stanaltac yee, ti co'ol s'elan c'anal taq'uin chavajtic no'ox ti sni' yich'aque, ti naca smil no'ox scotole. Mu ta yeuc ta xa'i ta sliline, yu'un ta sju' comel ta teq'uel ti scomelale.

²⁰Oy ox ta co'nton ta xca'ibe sc'oplal ta sventa ti lajuneb (10) xulube, xchi'uc ti snene' xulub ti oy sate, ti oy jun ye ti mu no'ox ts'icbaj ti c'usi xloc' ta alel yu'une. Jech xtoc oy ox ta co'nton ta xca'ibe sc'oplal ti oxib (3) xulub ti laj yich' c'oquel loq'uele yo' jech xu' ta xch'i talel ti snene' xulub ti jelavem to smuc'ul ta xbate.

²¹Va'i un, ti xulub taje ta smil ta luchel steclumal ti Diose, ti tsalbilic ta xc'ot yu'une,

²²ja' to ti c'uxi c'ot yorail lic sva'an sba ti Mol ta spojel steclumal ti Dios ti oy ta toyole. Yu'un sta xa yorail ti ta xich'ic ti ta xc'otic ta pas mantal ti steclumal ti Diose.

²³Va'i un, xi laj yale: “Ti xchanibal (4) xi'bal sba jti'oval muc' ta chone, ja' sc'oplal ti ta xvul ta loq'uel ti xchanibal (4) jvolvanej j'uninvanej jpasvanej ta mantal li' ta banomile, ti stuc no'ox toj yan o ti stalele. Ta stubbe sc'oplal scotol ti jnaclejetic ta banomile, ti naca sju' no'ox ta teq'uele, ti naca slilin no'ox comele.

²⁴Ti lajuneb (10) xulube, ja' sc'oplal lajuneb (10) ajvalil ti ta xchotiic ta pas mantal ti bu ti pasob mantal taje. C'alal mi ech'ic xa ox taje, ta xvul ta loq'uel ta stojolic ti oy jun ti xjelav to xu' yu'une, ti toj yan stalel ta jmeque, ti ja' mu sta ti laj ech'uc ta ba'yele, ti xu' yu'un ta sjip ta lum oxibuc (3) ti ajvaliletic taje.

²⁵Ti jun taje ta xchopol-c'opta ti Dios ti oy ta toyole. Ta naca sta ta stsutsesbe ech'el steclumal ti Diose, ti oy ta yo'nton ta sjel ya'i ti oy jbel ti c'usi tsots albil yu'un ti Diose, ti ta stubbe sc'oplal ti sq'uinaltac ti c'u s'elan ch'unbil yu'unique. Yu'un ja' o'lol xchanibal (3 1/2) jabil sjalil oy ta yoc ta sc'ob ta yilbajinel steclumal ti Diose.

²⁶Va'i un, c'alal ta xlic sliques chapanel ti jchapanvaneje, tey ta xpojbat ti jech jelavem xu' yu'une. Ta xc'ot ta tsutsel ta j'ech'el.

²⁷Ti spasob mantale, ti jelavem xu' yu'une, ti yutsilal slequilal ti oy ta scotol pasob mantaletic li' ta banomile, ja' ta xlic ac'batuc ta yoc ta sc'obic steclumal ti Dios ti oy ta toyole. Mu'yuc stsutseb ti jech ta xchoti ta pasob mantale. Yu'un scotol ti jteclumetic ta banomile, ta xac' sbaic ta tunel ta stojol. Ta xch'unbeic ti c'usi ta xale.”

²⁸Ja' jech c'ot ta tsutsel ti lo'il a'yej taje. Ti vu'un Danielune, xvulvun xa co'nton com yu'un, sac pac'an xa licom yu'un. Ja' no'ox un, mu junuc buch'u laj calbe ya'i ti va'i s'elan taje.