Read Tzotzil Daniel 8 Bible Online

Daniel 8 - Tzotzil bible

Daniel 8

¹C'alal yoxibal (3) xa ox jabil yochel ta ajvalilal ti Belsasare, ti vu'un Danielune, c'ot to ta pasel ti jam ti jba jsat xtoque. Ja' slecoj ti ta ba'yel to ox laj quile.

²Ti c'usi laj quil ti c'alal jam ti jba jsate, co'ol s'elan tey oyun ta jteclum Susa yilel ti oy ta yosilal ti Elame, ta sti'il uc'um ti Ulai sbie.

³Tey laj jtoy batel jsat ta nom. Tey laj quil jcot tot chij ti cotol ta ti' uc'ume. Chib xulub ti nat va'ajtic muyele. Ja' no'ox un, oy jun ti ta xchibale ti natub to muyel ta j'ech'ele, ti ts'acal ch'i loq'uele.

⁴Ti tot chije, laj quil ti xchinet no'ox xulub ta sq'uel batel ti xi ta smaleb c'ac'ale, ti xi ta yolon ti yolon xocon sloq'ueb c'ac'ale, ti xi ta yolon ti yac'ol xocon sloq'ueb c'ac'ale. Xi'bil yu'un scotol ti yan chon bolometique. Mu xa xpoj yu'un sbaic mi ta xpujatic ta luchele. Ta spas ti c'usi lec ta xa'i ti stuque. Yu'un yantic no'ox ta xich' batel ti yip ta j'ech'ele.

⁵Naca to ch'ayal co'nton ta snopilanel ti c'usi laj quile, ja' to no'ox laj quil xtoc ti vul ta loq'uel jcot tot tentsun ti xi ta smaleb c'ac'ale, ti ta anil xjipet no'ox talele. Mu'yuc xa ta stec' ti banomil yilele. Ti tot tentsun taje, jun snatil xulub ti ch'iem liquel ta nopol sbec' sate.

⁶Va'i un, c'alal c'ot xa ta nopol ti bu oy ti tot chij ti laj quil ti cotol ta ti' uc'ume, ta nom to laj yich'be batel yipal yo' ta spujbe luchel.

⁷Toj c'asel c'ot yu'un ta j'ech'el xchibal ti xulube. Jech ti tot chije, toj lajel c'ot laj ya'i, mi ja'uc xa pac yu'un jutebuc. Ta ts'acal to un, ti tot tentsune laj sjip ta lum ti tot chije. Laj sju'ilan ta teq'uel ta j'ech'el. Q'uelbil no'ox laj, mu'yuc buch'u xpojun.

⁸Jech ti tot tentsune, yantic no'ox yich' batel yip ta j'ech'el. Ja' no'ox un, c'alal yorail yich'oj xa lec ti yipe, ja' o xa lic c'asuc ti smuc' ta xulube. Jech ti bu c'as loq'uele, tey lic ch'iuc talel chanib xulub ti bichajtic muyel ti sq'ueloj batel ta xchanjechal banomile.

⁹Oy jun ta scotol ti xulube, lic ch'iuc sq'uelom, ti ech'em nat bat ti bichil batel ta stuq'uil yolon ti yac'ol xocon sloq'ueb c'ac'ale, ti ta stuq'uil ti banomil ti sbiinoj C'upil Sbae.

¹⁰Muq'uib ta j'ech'el ti c'ot c'alal to ti bu oyic ti c'usitic oy ta vinajele, ti laj slilin yalel tal jvoc'uc ti c'analetique. Laj sju'ilan ta teq'uel.

¹¹Ma'uc no'ox taje, yu'un laj stsac ta c'op ti banquilal yu'un ti c'usitic oy ta vinajele. Laj stubbe sc'oplal ti milbil mantanaletic ti ta xich' aq'uel ta jujun c'ac'ale. Laj soques ti bu yavil ti c'opojebal ti'inebale.

¹²Ti ta soquemal sjole, tey laj svol sbaic yu'un ti yajsoldadotac ti bu to ox ta xich' aq'uel ti milbil matanale. Laj sjipbe ta lum sc'oplal ti c'usi ja' melele. Laj spas ti bu xa c'alal xal ti yo'nton ti c'ot ta nopel yu'une, ti vinaj ti cajal c'ot sc'oplal xchi'uque.

¹³Ts'acal to un, laj ca'i ti oy jun ánjel ti xi ta sjac'be ti jun ánjel xtoque: “¿C'usi to ora ta xc'ot ta pajel ti vi s'elan c'otem ta pasel ta stojol ti altar ti bu ta xich' aq'uel ti milbil matanal ti jujun c'ac'ale? ¿C'u sjalil ta xjalij ti jech och ti j'ac'-ib-o'nton mulil tey ta xch'ulna ti Diose, ti jech pech'bilic ta teq'uel ti jch'unolajeletic yu'une?”

¹⁴Va'i un, xi laj yich' taq'uel sutel tal ti c'ope: “Ja' ta xjalij cha'mil xchi'uc vo'lajunvinic (2,300) ti jujun xmal sacube. Mi ech' ti va'i sjalil taj une, ta xc'ot ta pasel ta xlic yich' cha'lecubtasel ti ch'ulnae.”

¹⁵Ti vu'un Danielune, c'alal ch'ayal co'nton ta jnopilanbe smelol c'usi ta xac' ta na'el ti c'usi laj quil ti c'alal jam ti jba jsate, ja' o ta jech to yepal ti c'otel ta jsat ti co'ol s'elan sloc'ol jun vinic ti tey va'al ta jts'ele.

¹⁶Va'i un, ti tey ta uc'um Ulaie, laj ca'i ti co'ol s'elan jc'opojeltic ya'yel ti xi ta xale: “Ti vinic li'e, Gabriel, albo ya'i c'usi smelol ta xac' ta na'el ti c'usi laj yil ti jech jam ti sba sate.”

¹⁷Jech ti stuque nopaj talel ta jtojol. Toj xi'el lic'ot yu'un. Tey jnupilan xa banomil laj jquejan jba ta stojol. Ja' no'ox un, ti stuque xi laj yalbune: “Ti vo'ote, jtunel, ti jech jam aba asat ti c'usi laj avile, mu me xch'ay xava'i, yu'un me jech ta xc'ot ta pasel ti ta slajeb c'ac'ale.”

¹⁸C'alal jech yacal ta xisc'oponune, licham o xa ca'i. Jeche' xa telel licom ta banomil. Jech ti stuque lic snitun liquel, laj sva'anun.

¹⁹Va'i un, xi laj yalbune: “Ta xcalbot ava'i lec smelol c'usi ta xc'ot ta pasel ti mi c'ot ta tsutsel ti c'u sjalil ilinem ti Diose. Yu'un ti c'usi laj avil ti c'alal jam ti aba asate, yu'un jech ta xc'ot ta pasel c'alal ta sta ti slajeb c'ac'ale.

²⁰“Ti tot chij ti oy chib xulube, ja' ta sco'oltasbe sc'oplalic ti ajvaliletic yu'un ti jteclum Mediae xchi'uc ti jteclum Persiae.

²¹Yan ti tot tentsune, ja' sc'oplal ti ajvalil yu'un ti jteclum Greciae. Ti smuc' ta xulub ti ch'iem liquel ta nopol sbec' sate, ja' sc'oplal ti sba ajvalile.

²²Yan ti chanib xulubtac ti q'uelomaj loq'uel ti bu c'as loq'uel ti ta ba'yele, ja' smelol ta xac' ta na'el ti ta xloc' chanib jvolvanej j'uninvanej jpasvanej ta mantal ti ta muc' ta lume. Ja' no'ox un, ma'uc xa jech yip ti ta ba'yele.

²³“C'alal ta xc'ot ta tsutsel ti c'u sjalil ta spasic mantal ti chanib jvolvanej j'uninvanej taje, ti jelav xa ox ta j'ech'el ti mulil colo'ile, ta xvul ta loq'uel jun ajvalil ti mu'yuc xch'ulele, ti oy sbijile, ti sna' c'usi xut sbae, ti ta xlic sbain ti yabtele.

²⁴Ta xc'ot ta pasel ti ja' jelavem to tsots xu' yu'une. Ja' no'ox un, ma'uc ta yip stuc. Mu ch'unbaj yilel ti c'u s'elan ta xlilinvane. Ta spas canal ta scotol ti c'usi ta spase. Ta sjip ta lum ti buch'utic cajal yabtel yich'ojique. Jech xtoc ep ta xilbe svocol steclumal ti Diose.

²⁵Ja' no'ox spasob canal o xchi'uc ti oy sbijile, ti sna' c'usi xut sba ta xlo'lavan xchi'uque. Spajeb xa no'ox ti cajal xa'i sbae. Yu'un ac'o mi jun yo'nton lec oyic ti jnaclejetique, ch'ayal yo'ntonic ta xc'ot sta ti naca smilel no'ox yu'une. Ta stsac ta leto ti Buch'u spajeb banquilal yu'un ta scotole. Ja' no'ox un, tey ta xc'ot ta tsutsel ta stojol ti Buch'u spajeb banquilale.

²⁶Sc'oplal ti jujun xmal sacub ti la'ac'bat avil ti c'alal jam ti aba asate, le'e, ja' ono'ox melel une. Ja' no'ox ti vo'ot une, ts'ijlan no'ox me. Yu'un ta ono'ox me xc'ot ta pasel ti mi jalij xa ech'ele.”

²⁷Ti vu'un Danielune laj ca'i ti ch'abal xa ti quip com yu'une. Jal c'ac'al ti co'ol s'elan jchamel licom yu'une. Ts'acal to un, livatsaj. Lic cabtelan ta spasel ti c'usi yac'oj jbain ti ajvalil yu'un ti muc' ta lume. Ja' no'ox un, tey to staoj yav oyun ta vul o'nton yu'un ti c'usi laj quil ti c'alal jam ti jba jsate. Yu'un mi ja'uc xca'ibe smelol c'usi xal o.