Read Tzotzil Daniel 9 Bible Online

Daniel 9 - Tzotzil bible

Daniel 9

¹Ti Darío xnich'on ti Asueroe, ti liquem sts'unubal ta stojol ti medoetique, sbainoj ta spasel mantal ti c'u sjamlej smacoj ti caldeoetique.

²C'alal ta sliqueb to ox jabil yochel ta ajvalilale, jech ti vu'un Danielune, ja' o ochemun ta sq'uelel ti jpoc vun yu'un ti j'alc'op Jeremías ti bu ta xalbe sc'oplal ti lajuneb xchanvinic (70) jabil sjalil ti lilijem ta xcom ti jteclum Jerusalene, ti jech albil yu'un Dios ti j'alc'ope.

³Va'i un, lic vocoletcun ta c'opojel ti'inel ta stojol Dios ti ja' Ajvalile. Laj jcomtsan cot. Laj jlap lajemal c'u'iletic. Lic chotetcun ti bu busul ti tanil c'oq'ue.

⁴Xi s'elan xcholet lic cal ti lic'opoj liti'in ta stojol ti Ajvalil Dios cu'une: “Cajval, muc'ul Diosot, jelavem xu' avu'un, ta ono'ox xc'ot ta pasel avu'un ti c'usi loq'uem ta ave ati'e. Ta xavac' ta ilel ti syail xc'uxul avo'nton ta stojolic ti buch'uuc c'ux ta xaya'ie, ti ta xc'ot ta pasel yu'unic ti amantaltaque:

⁵“Laj xa jta jmulcutic ta atojol. Chopol xa ti vi s'elan libatcutique. Yu'un pas xa cu'uncutic ti c'usitic toj chopole. Yu'un oy bu mu xa xacac'cutic ta venta ti c'u s'elan cuxuluncutic talele. Yu'un oy bu laj xa jvalopatincutic comel ti amantaltaque xchi'uc ti c'usitic nopbil avu'une.

⁶Yu'un mu'yuc xcac'cutic ta venta ti j'alc'opetic ti ja' avajtuneltaque, ti c'opojic ta aventa ta stojol ti ajvaliletic cu'uncutique, ta stojol ti banquilaletique, ta stojol ti jtot jme'cutic laj ech'icuc ta vo'nee, xchi'uc ti c'opojic ta stojol scotol ti jteclum Israele.

⁷Ti vo'ote, Dios, oy yutsil slequil avo'nton. Ja'uc ti vu'uncutic israeluncutique ta xca'i ti q'uexlal jba jsatcutique xchi'uc ti c'u yepal nacal ta Jerusalene. Mu yanuc ta xa'iic ec ti jlom israeletic ti nopol no'ox oyique, xchi'uc ti oyic ta nom ti bu laj aten batel ta muc'tiquil lum ta scoj ti laj stoy sbaic ta atojole.

⁸Ti vu'uncutique, Dios, ta xca'i ti q'uexlal ti jba jsatcutique. Yu'un co'ol oy jmulcutic ta atojolal jech c'u cha'al laj ech'uc ti ajvaliletic cu'uncutique, ti banquilaletique, xchi'uc ti jtot jme'cutic laj ech'icuque.

⁹Ja'uc ti vo'ot une, Diosot cu'uncutic, oy ta atojolal ti syail xc'uxul avo'ntone, ta ora no'ox xana' xach'ay ti mulile. Yu'un ti vu'uncutique, c'ajomal no'ox jelavem ti jtoyobbailcutic ta atojolale.

¹⁰Yu'un mu xca'ibecutic xchiquinal ti c'usi ta xavalbuncutique, Cajval, ti Diosot cu'uncutique. Yu'un mi jutebuc laj cac'cutic ta venta ti chanubtasel laj avac'buncutic ta sventa ti j'alc'opetic ti ja' jtuneletic avu'une.

¹¹Yu'un sjunul jteclum Israel, mu'yuc xaq'uic ta venta ti chanubtaseletic avu'une. Yu'un laj sjip ta spat ta xoconic ti c'usitic ta xac'an ti ac'o spasique. Jech o xal un, cajal vul ta jbacutic ti bac vocole. Yu'un laj quich'cutic ti jech no'ox loq'uem ta alel ti ts'ibabil comel yu'un ta jbel ti c'usi tsots albil yu'un ti Moisés ti ja' avajtunele. Yu'un ja' ta scoj ti laj xa jta jmulcutic ta atojole.

¹²C'alal jech laj atac talel ta jtojolcutic ti spajeb ti mu ech'bajuc ti vocole, ja' c'ot ta pasel avu'un ti ta xaloq'ues ac'ac'al ti jech ta xapas ta jtojolcutique, xchi'uc ta stojolic ti buch'utic laj spasuncutic ta mantale. Yu'un mu'yuc jech xco'olaj o ta sbejel banomil ti bac vocol ti cajal c'ot ta sba ti jteclum Jerusalene.

¹³Yu'un lamal vul ta jtojolcutic scotol ti vocole jech c'u cha'al albil ti ts'ibabil ta jbel ti c'usi tsots sc'oplal albil yu'un ti Moisese. C'u stu un, ti vu'uncutique mu'yuc xinopajcutic ta atojol, Cajval ti Diosot cu'uncutique, mu x'ictaj ta ictael comel cu'uncutic ti jchopolalcutique. Mi ja'uc laj jtij co'ntoncutic ta stamel batel ti melel ti c'usi ta xavale.

¹⁴Jech o xal un, Dios, laj achapan ti laj atac talel ta jtojolcutic ti c'usi chopole. Yu'un ti vo'ote, Cajval, ti Diosot cu'uncutique, yu'un tuc' scotol ti c'usi ta xapase. Ja' no'ox un, ti vu'uncutique mu'yuc xloc' x'ayan ta co'ntoncutic ta xchiquintabelot ti ac'ope.

¹⁵“Yu'un ti vo'ote, Cajval, ti Diosot cu'uncutique, laj avac' ta ilel ti jelavem xu' avu'un ti c'alal laj aloq'ues talel ta Egipto ti ateclumale. Yu'un staoj yav ta xavinajes ac'oplal jech c'u cha'al laj avac' ta ilel ta vo'ne ti jelavem xu' avu'une. Ja'uc ti vu'uncutic une, ja' no'ox ochem yipal ta sa'el ti mulil cu'uncutique, ta spasel ti c'usi chopole.

¹⁶Cajval, jna'cutic lec ti atuc no'ox ti oy yutsil avo'ntone. Avocoluc, q'uejo loq'uel ta stojol Jerusalén ti scapemal sti'emal ajole. Yu'un taje, ja' ateclumal, ja' ch'ul vits avu'un. Yu'un scotol ti jnaclejetic ti oyic ta muc'tiquil lumetic ti nopol oyique, ta xlabajic ta stojol ti jteclum Jerusalene, ta stojol ti jteclum avu'une, ja' ta scoj ti jmulcutique, ta scoj smulic ti jtot jme'cutic ti laj ech'icuc ta vo'nee.

¹⁷Dios cu'uncutic, ts'et chiquintabo sc'opojel sti'inel ti xvocolet ta atojol ti avajtunel li'e. Ta sventa ti ta xic'opoj ta ach'ul bie, Cajval, ta syail xc'uxuluc avo'nton, joybino talel asat avelov ta sq'uelel talel ti at-o'nton xal ti vi s'elan com yu'unic ti ach'ulnae.

¹⁸Va'lan, tec'lan, muc'ul Dios, a'yibun, tuc'ulano lec ti vi s'elan lilinatcutique jmoj xchi'uc ti jteclum ti bu ta xavich' tael ta c'oponele. Ti va'i s'elan xivocolet ta sc'anbelote, mu xu' ta jpat co'ntoncutic ti ta jlequil no'ox jtuccutic ti c'usi lec ta xc'ot ta pasele. Yu'un ja' no'ox ta jtacutic ta sventa ti mu no'ox albajuc ti syail xc'uxul avo'ntone.

¹⁹¡Dios, Cajval, ts'etanbun ani' achiquin ta jtojolcutic, ch'aybun ti jmul jcolo'cutique! ¡Va'lan, tec'lan ta jtojolcutic, Cajval, la' tic'o aba ta jpojelcutic. Mu xajaliltas un, Cajval Dios, tic'o aba atuc ta spojel ti muc' ta lum avu'une, xchi'uc ti ateclumal ti buch'u ta xc'opoj xti'inic ta aventae!”

²⁰Ochem yipal cu'un ti c'opojel ti'inele. Ta jchap jelavel ti jmul jcolo'e, ti smul scolo' ti Israel ti ja' jteclumale, ti lec xchapchun ta xcalbe jelavel ti yatel co'nton ta stojol ti Cajval Dios ta sventa ti ch'ul vits yu'une.

²¹C'alal yacalun ta c'opojel ti'inele, jech ti Gabriele, ti laj yac' sba iluc ti c'alal jam jba jsat ta ba'yel to oxe, xvilet no'ox talel ti bu oyune. Nopol xa mu ta yorailuc jech c'u cha'al ti ta xich' ac'bel milbil matanal ti Dios ta sventa ti mal c'ac'ale.

²²Va'i un, xi laj yalbune: “Avi tanae, Daniel, lital ta atojol yo' ta xcac'bot ana' smelol ti va'i s'elan taje.

²³C'alal lic c'opojan ti'inane, tac'bil ac'op c'ot yu'un ti Diose. Jech o xal tal calbot ava'i ti smelole. Yu'un laj ata ti lec c'uxubinbilot yu'un ti Diose. Avi tana une, ts'etano me lec achiquin ta ya'yiel ti xi xcholel ta xavich' albele yo' jech ta xana' c'usi smelol ti c'usi laj avil ti c'alal jam ti aba asate:

²⁴“Ti lajuneb xchanvinic (70) xemunae, ja' jech sjalil ta xcom ta sbaic vocol ti ateclumale xchi'uc ti ch'ul jteclum avu'une. Ja' to jech ta xc'ot ta tsutsel ti toyobbaile, ti mulil colo'ile. Ja' jech ta xich' tael ti ta xich' ch'ayel ti mulil colo'ile, ti ta xc'ot ta pasel ti sbatel osil lec ta xcome. Ja' to jech ta xc'ot ta pasel ti c'usi laj yich' ilel ti c'alal jam ti ba satile xchi'uc ti laj yich' caj'alele, ti ta xich' cha'tunesel smelol ti bats'i ch'ulnae.

²⁵Tsots sc'oplal sc'an xana' xava'ibe smelol ti xi x'ale li'e: Yu'un ti c'alal ta xloc' ti mantal ti ta xlic lecubuque, ti ta xlic yich' cha'meltsanel ti jteclum Jerusalene, ja' ta x'ech' vucub (7) xemuna c'alal mu to bu ta xvul ta loq'uel ti banquilal Buch'u t'ujbile. Ti smocaltaque xchi'uc ti scayealtac ti jteclum Jerusalén ti lec meltsanbile, naca no'ox lajcheb xchanvinic (72) xemuna ti mu'yuc c'usi chopol ta xc'ot ta stojole, ja' yorail xtoc ti mu no'ox albajuc ti vocole.

²⁶Ts'acal to un, mi ech' xa ox ti lajcheb xchanvinic (72) xemunae, ta smilic ti Buch'u t'ujbil ta banquilale. Jech ti jteclum Jerusalene xchi'uc ti ch'ulnae, ta xich' lilinel ta sventa svinictac ti jun ajvalil ti ta xvul ta loq'uele. Yu'un co'ol s'elan nojel ta vo' ti ta jliquel no'ox ch'abal ta xcom yu'un ti c'alal ta xc'ot ta tsutsele. Jech com o ti xlic xcaj batel ti letovajele, ti c'usiuc xa no'ox jtosucal ta xaq'ue, ja' ti jech ono'ox chapanbile.

²⁷C'alal mi ech' xa ox batel junuc xemuna une, jech ti stuque ta xlic spas strate ta stojol ti epal jnaclejetique. Ja' no'ox un, ti c'alal o'lol xa batel ti xemunae, ta stubbe sc'oplal ti milbil matanaletic ti ta xich' aq'uele. Yu'un ta xc'ot ta pasel li'e xenel xac' ti matanal ta xac' ta altare, ti c'alal ja' sventa ti milbil matanaletique. Tey staoj yav ta spas o, ja' to ti c'uxi ta xc'ot ta tsutsel ti nopol ono'ox ti cajal xc'ot ta sba stuc ti buch'u ta spas ti va'i s'elan taje.”