Read Tzotzil Oseas 4 Bible Online

Oseas 4 - Tzotzil bible

Oseas 4

¹Israeletic, a'yio ava'iic lec c'usi ta xal ti Diose. Yu'un ti stuque, ts'inil xa ta yo'nton ti ta sliques letoe, ta stsaquel ta c'op ti buch'utic li' nacalic ta muc' ta lume, Yu'un ti li'e, mu'yuc slequil stuq'uilic ti jnaclejetique, mi ja'uc xa oy yutsil slequil yo'ntonic, mi ja'uc ta staic ta na'el ti Diose.

²Yu'un ja' xa yac'oj smelol ta xa'iic ti ochem yipal yu'unic ti jbel xa xc'opojic yilel ti c'usi ta sva'an sbaic ta yalele, ti ja' xa xch'i o ta xa'iic ta sjutel ti c'ope, ti ta x'ac'vanic ta milele, ti ochem yipal yu'unic ti eleq'ue, ti mulivajele, ti mu'yuc xch'ulelic ta ilbajinvaneje, ti ja' xa sc'obinojic ti mu'yuc spajeb ta xmilvanique.

³Ja' yu'un un, ti muc' ta lume oy ta muc'ul ic'al me'inal. Yu'un ta xc'ot ta stojolic ti mu xa xpac yu'un sc'oplalil ti buch'u tey nacalique. Jech o xal ta xchamic ti te'tical chon bolometique, ti mutetic ti xvilajet ta vinajele, ti choyetic ti oy ta nabe.

⁴Ti Diose xi ta xale: “Mi ja'uc junuc ti buch'u xu' ta stic' sba ta yalel ti oy smul ti yane, mi ja'uc xu' ta sjanjanta xtoc. Yu'un ti utel jnopoj ta xcaq'ue, ja' no'ox ta atojolic ti paleoxuque.

⁵Jech ti vo'ote, ma'uc to ta smalaic ta x'ic'ub ti ta xa'och ta c'abal yu'unique. Yu'un mi och ti ac'ubale, ta x'och ta c'abal ec ti j'alc'ope. Jmoj ta jtubbe ac'oplal xchi'uc.

⁶Ja'uc ti jteclumale, mu'yuc c'usi ya'binojic ta sni' ta xchiquinic. Ja' yu'un un, laj yich'ic tsutsesel. Yan ti vo'ote, pale, ti laj ajip ta apat ta axocon ti c'usi avojtiquinoj leque, ma'uc xa cajpale ta xacom. Ti jech loc' ta avo'nton ti laj ajip ta apat ta axocon ti chanubtasel yu'un ti Dios avu'une, ta jtubbe sc'oplal ta co'nton ti anitilultaque.

⁷“C'alal jech oy sc'oplal ti epajic ti paleetique, ja' no'ox jech cajal yac'ojbeic yipal ta sa'el ti smulic ta jtojole. Ti jech ta spas taje, ta jch'aybe ta be ti jech cajal sc'oplale. Ac'o sc'upin ya'iic ti ilbajinel yu'un ti vocole.

⁸Yu'un sve'el yuch'omic ta xa'iic ti oy c'usi ta xaq'uic ta scoj smulic ti jteclumale. Jech o xal ja' xmuyubajic xa ti jech ta sa' smulic ti jlumale.

⁹Ta scoj ti chopol c'usi ta spasic ta jtojole, ti c'u s'elan ta xich'ic tsitsel ti jteclume, ja' no'ox jech ta xich'ic cu'un ti paleetic eque.

¹⁰Yu'un ti jech loc' ayan ta yo'ntonic ti laj yicta sbaic ta tunel yu'un ti Diose, ac'o mi oy to c'usi ta staic ta lajesel, mu xa xnoj o xchi'uquic. Ac'o mi laj sa' yan yajvalic, mu xbol ti yalab xnich'nabique.

¹¹“Ti mulivajele xchi'uc ti uch' vinoe, ta xch'ayes ti lec snopobile.

¹²Ti jteclumale ta sjac' sba ta stojol ti c'usi loc'tabil ti meltsanbil ta te'e. Ta st'un sbaic ta jtel jich'il te'. Me'inem xa ti mulivajel ta stojole, ti xi s'elan ch'ayemic ti bu stamojic batel ti jteclumale: Laj xch'ac sbaic ta stojol ti Dios yu'unic ti laj yac' sbaic ta stojol yane.

¹³Yu'un ja' xa batem ta yo'ntonic ta xchiq'uel pom, ta yaq'uel milbil matanaletic ta jujun toyol vitsetic, ta jujun stselejtic. Jech ta spasic xtoc ta yolon ti bu lec xa limil squeoval ti c'antulanetique, ti ta yolon muc' ta te'e, ti ta yolon te' ti sbiinoj álamoe, ti ta yolon ti muc'tiquil tulane. Jech o xal un, mulivajic ti avantsil nich'onique. Ta xmulivajic ec ti avalibique.

¹⁴Le' une, mu jtsitsic ti avantsil nich'onic ti ta xmulivajique, ti ta xmulivajic ti avalibique, yu'un vo'oxuc ba'yel chavac' abaic ta stojol yan, ti vololoxuc xa ta yaq'uel ti milbil matanal xchi'uc ti antsetic ti buch'utic ta xmulivajic ta spasbel stoyel xi'el ti sdiosique. Yantic x'uninatic batel ti jun jteclum ta scoj ti mu'yuc sbijilique.

¹⁵“Ac'o mi lec xa xava'i mulivajel, Israel, mu me jechuc yacal ch'iuc ec ti Judae. Mu xabat ta Gilgal un. Mi ja'uc xamuy ech'el ta Bet-aven.[4] Mu xava'an ta rextico ti cuxul Diose.

¹⁶Ti toyobba Israele, co'ol xa s'elan jun me' vacax ti xbachet no'ox sni' ta jujujote. Ti jech taj une, ¿mi yu'un co'ol to la s'elan jun nene' chij ta xchabiat yu'un ti Dios ta jun yutsil pulem yaxaltique?

¹⁷Yu'un ti Efraine yac'oj xa sjol yo'nton ta yich'el ta muc' ti c'usitic meltsanbil ta c'abale. Yu'un scotolic co'ol s'elan jun epal jyacubel lamalic xa ta lum, ti xchol no'ox ta sa'el ti mulivajele. Lec ta xa'iic ti nijil chimilic ta q'uexlale. Mu baluc ta xa'iic ti ich'bilic ta muq'ue.

¹⁹Tacoltael xa'iic ech'el yu'un ti tsots iq'ue. Q'uexlaltasbil ta xc'otic ta scoj ti sloc'tabil diosique.