Read Tzotzil Oseas 5 Bible Online

Oseas 5 - Tzotzil bible

Oseas 5

¹“A'yio ava'iic li'e, paleetic. Ts'etano lec ani' achiquinic, jteclum Israel. A'yio ava'iic, ti vo'oxuc chotoloxuc ta ajvalilale. Xi s'elan ta xc'ot ta atojolique: Lac'otic ta jun pets' ta Mizpa. Lac'otic ta yacobbail ta vits Tabor. Chapal xa ac'oplalic ta xavich'ic chapanel.

²Yu'un jomol xa ajoc'alic lac'otic ti ta stenlej Sitime. Jech o xal ta xatojic cu'un ta tsitsel.

³Xcojtiquin lec c'u s'elan ti Efraine. Jech ti Israele mu'yuc ta ch'ayal ti c'usi ta spase. Yu'un ti Efraine laj xa yac' sba ta c'upinel ta stojol yan. Jech ti Israele laj xa soques sba ec.”

⁴Ti jech mu sc'an xnopajic tal ta stojol Dios yu'unic ti jteclume, ja' ta scoj ti ochem yipal yu'unic ti mu'yuc smelol stuq'uilique. Mi ja'uc xa staic ta na'el ti Diose, ja' ta scoj ti me'inem xa xa'iic ti oyic ta sc'ob ti yane.

⁵Ti Israele, ta xtic'bat smul yu'un ti stoyobbaile. Ti Efraine ta sbosi yoc ta scoj ti smul scolo'e. Jmoj ta sbosi yoquic xchi'uc ti Judae.

⁶Xc'ulet xchi'uc xchijic xvacaxic ta x'ochic ta sa'el ti Diose. C'u stu un, mu'yuc ta staic, yu'un laj sq'uej sba batel ta stojolic.

⁷Yu'un mu'yuc xa smelol stuq'uilic ta stojol ti Diose. Yu'un oy xa yan stotic ti yalab xnich'nabique. Ta scoj ti jech mu'yuc smelol stuq'uilique, ta jun no'ox u, ch'abal c'usi ta xcom xchi'uc ti yosil sbanomilique.

⁸Ti ta jteclum Guibeae, oq'uisanic ti cachu ti ta xac' ta na'el ti ac'-letoe. Tutetuc ti oq'ues ta jteclum Ramae. Pucbeic batel sc'oplal c'alal to Bet-aven.[5] Ac'beic ya'i xi'el ti Benjamine.

⁹Xi ta jcaj'al ta stojol jujuvoc' snitilul Israel ti mu stselbuje: C'alal ta xc'ot sc'ac'alil ta x'ac'bat stoj ti Efraine, spajeb xa no'ox ti c'u s'elan ta xc'ot ta stojole.

¹⁰Ti Diose xi ta xale: “Ti banquilal jpas-mantaletic yu'un ti jteclum Judae, co'ol s'elan jech c'u cha'al ti buch'utic ta snet'be sts'aquil ti osiletique. Ti jech ta spasique, ta jbusanbe ya'iic ta sbaic ti sc'ac'al co'ntone.

¹¹Ti Efraine staoj xa svocol. Lilij xa ta be ti oy sc'oplal ti mu'yuc c'usi sna'e, ta scoj ti ja' xa bat snaban sba ta sts'acliel ti jeche' diosetique.

¹²Yu'un co'ol j'elan chanul joch' ixim ta xc'ot jlilin ti Efraine. Yu'un co'ol j'elan jset c'u'il chon ta xlic jlilin ta jomoch'tael ti jteclum Judae.

¹³“C'alal ta xa'i ti oy xa xchamel ti Efraine, jech ti Judae oy xa syayijemal ec. Jech ti Efraine ta xbat c'alal jteclum Asiria yo' ta sc'anbe coltael ti muc'ul ajvalile. Ja'uc ti stuque, mi ja'uc xu' yu'un ta xpoxtabel ti syayijemale.

¹⁴Ta xic'ot jech cha'al jcot león c'alal ta xchapan sba ta lubivaneje. Ja' jech ta xibit batel ta slilinel ti Efraine, ti Judae. Q'uelbil xa no'ox ta jlilin ta j'ech'el. Mu'yuc buch'u junuc ti xu' xispojbun ta jc'obe. Mi tsuts cu'une, ta xibat.

¹⁵“Ta xisut batel ti bu ono'ox oyune, ja' to ti c'uxi ta xa'i sbaic ti oy smulique, ti ta xlic sa'icune. Yu'un ja' to ta xlic sa'icun ti c'alal x'oc' x'avanic yu'un ti svocole.”