Read Tzotzil Oseas 6 Bible Online

Oseas 6 - Tzotzil bible

Oseas 6

¹Ti israeletique xi ta xalique: “La'ic, acotolic, sutcutic ech'el ta stojol ti Diose. Yu'un laj slilinotic, ja' jech xtoc ta xislecubtasotic. Laj syayijesotic, ta xispoxtaotic no'ox xtoc.

²Ta jliquel no'ox ta jtatic ti xlaet xa xca'itic ti banomil yu'une. Ja' stuc ta xistamotic liquel yo' jech ta xicuxi ta stojol.

³La' cac'betic yipal ta yojtiquinel ti Diose. Ti Diose ta xtal ta jtojoltic jech c'u cha'al ta xloc' talel ti c'ac'ale, jech c'u cha'al ti vo' ti ta xyal talel yo' ta smalta ti banomil ti c'alal yorail ti q'uepelale, xchi'uc ti sba yalelal vo'e.”

⁴Ti Diose xi ta xale: “¿C'usi stac' ta jpas ta atojol, Efraín? ¿C'usi stac' ta jpas ta atojol, Judá? Yu'un ti syail xc'uxul avo'ntonic ti ta xavalic ti oy ta jtojole, co'ol s'elan jech c'u cha'al ti ic'lumanil toque, co'ol s'elan jech c'u cha'al sts'ujulal job ac'ubal ti sob no'ox ta sac ch'ay batele.

⁵Jech o xal laj jlilinoxuc ta sventa ti c'usi laj yalboxuc ti j'alc'opetique. Ta sventa ti c'usi loc' ta alel cu'une, laj jtubboxuc ti ac'oplalique. Yu'un ti c'u s'elan ta jc'an ta xapas ta jtojole, co'ol s'elan ti c'usi sna' xac' xojobal ti xjapluj no'ox vulele.

⁶Ti c'usi ta jc'an ta atojolique, mu xatuch'icun ta avo'ntonic, ma'uc no'ox ti ta xamilbeicun ti milbil matanaletique. Ta jc'an ti ac'o ana'ic ti vu'un Diosune, ma'uc no'ox ti ta xavac'beicun ti chic'bil matanaletique.

⁷“C'u stu un, jteclumal, yu'un lac'otic jech c'u cha'al laj spas ti Adane, ti mu'yuc xc'ot ta ch'unel yu'un ti jtratee, yu'un yanij sjol yo'nton ta jtojol.

⁸Ti Galaade, ja' jun jteclum ti mu'yuc xch'ulelic ta j'ech'ele, ti bonolic ta ch'ich' sjunulique.

⁹Ti paleetique, ja' jun j'eleq'uetic ti xvoletic no'ox ti oy ta stojol ti jnaclejetique. Ta xmilvanic xchi'uc ep ta tos ti c'usitic ta spasic ti ta sbelel Siqueme.

¹⁰Ti ta Israele, xi s'elan quiloj ti oy c'usi toj chopol ta xc'ot ta pasel yu'unique: Ti Efraine toj lec ta xa'i ti ta xac' sba ta sc'ob ti yane. Ti Israel eque laj soques sba xchi'uc.

¹¹“Ti vo'ote, Judá, chapal xa sc'ac'alil yorail ti ta xavich' tsitsel une.