Read Tzotzil Oseas 7 Bible Online

Oseas 7 - Tzotzil bible

Oseas 7

¹C'alal oy ta co'nton ti ta jeltabe ca'i yorailic ti Israel ti ja' jteclumale, c'alal ta jc'an ta jpoxta ca'i ti jteclumal Efraín xchi'uc ti Samariae, ja' o toj c'otel ta satilal ti smul scolo'ique. Yu'un scotolic me'inem xa ta xa'iic ta sjutel ti c'ope. Yu'un co'ol s'elan jun j'eleq'uetic ti naca svoq'uic no'ox ochel ti naetique. Ti buch'utic ta snupic ta bee, ta satilal, naca yelc'anbel ti c'usi oy yu'unique.

²Mi ja'uc xa svulesoj ta yo'ntonic ti ts'inil ta co'nton ti smul scolo'ique. Avi tana le' une, mu xa xcoltaatic loq'uel yu'un ti c'usitic chopol ta spasique, ti chapal lec ta jba ta jsate.

³“Ti jech oy c'usi chopol ta spasique, ti yac'ojbeic yipal ta sjutic c'op ti jteclumale, ja' xa xch'i o ta xa'i ti ajvalile xchi'uc ti banquilal jpas-mantaletique.

⁴Scotolic jmulivajeletic, co'ol s'elanic sc'ac'ubelic jech c'u cha'al ti jorno ti tsanbil lec sc'ac'al yo' ta scaybe si'il ti jq'uel-jornoe, ti ja' no'ox ta smala sit'uc lec ti vots'bil harinae.

⁵Ti sc'ac'alil ta xich' stronail sjol ti ajvalil cu'untique, ti jech xquixet xa ti vinoe, yacubtasat yu'un ti banquilaletique. Laj to yac'be xchi'il ti c'u s'elan ta spasbat yu'un ti jlabanvanejetique.

⁶Chapal lec ta yo'ntonic yo' ta xcontrainvanic, ti co'ol s'elan stilesojic ti jornoe. Ac'o mi vayal sjunul ac'ubal ti jtilesej jornoe, c'u stu un, ti jornoe staoj yav tilem sc'ac'al sacub ti osile.

⁷“Jech melel, yu'un co'ol s'elan jun jorno tilem ti sc'ac'al yo'ntonic ti laj stsutsesic ti ajvalil yu'unique. Jech o xal yal ta lum ti ajvaliletic yu'unique. Mi ja'uc xa junuc ti oy buch'u ta xc'opoj xti'in ta jtojole.

⁸“Ti Efraine bat scap sba xchi'uc ti yan jteclumetique. Yu'un stalel ti Efraine, co'ol s'elan jbej muc' ta pan ti c'ajomal no'ox ta'ajem ti jot xocone.

⁹Pec'tsanbat yip yu'un ti jyanlume, ti mu ja'uc jutebuc laj sna'e. C'ot ta pasel ti sacub ti sjol xchi'uque, ti mu ja'uc jutebuc laj stuc'ulane.

¹⁰Ja' c'ot ta rextico stuc stoyobbailic ti Israele. Ac'o mi jech scotol ti va'i s'elan taj une, mu'yuc sutic talel. Mi ja'uc oy bu laj sa'ic ti Ajvalil ti ja' Dios yu'unique.

¹¹Ti Efraine, co'ol s'elan jcot paloma ti majbil yuni jole, ti mu'yuc sbijil ti xi s'elan ta spase: Ta sc'an spojel ta stojol ti jteclum Egiptoe. Ta xbat xtoc ta stojol ti Asiriae.

¹²Ja' no'ox un, c'alal mi bat teye, ta jip ech'el ti syacobil ti oy ta jc'obe, ti tsacbil ta xc'ot ta syacobil jech c'u cha'al ti mutetic ti ta xvil ta vinajele. Ts'otol ta xc'otic cu'un ta scoj ti xchopolalique.

¹³“Mu xa ono'ox cha'bel un ti buch'utic laj xch'ac sbaic ta jtojole. Ti lajel chamesele, lamal ta xc'ot ta sbaic cu'un, yu'un laj stoy sbaic ta jtojol. Ja'uc ti vu'une, oy ta co'nton ta jtic' jba ta spojelic. C'u stu un, ti stuquique c'ajomal no'ox ta xalic ti ja' jutbil ti c'usi ta xcale.

¹⁴Ac'o mi x'avetic xa c'alal puch'ulic ta stemique, mi ja'uc loq'uem ayanem lec ta yo'ntonic ti ta xc'opoj xti'inique. Yo' ta sc'anic ti trigoe xchi'uc ti vinoe, ta syayijes sbaic. Ja' no'ox ta stoy sbaic ta jtojol.

¹⁵Laj jchanubtasic lec, laj cac'be yip ti yoc sc'obique. C'u stu un, ti stuquique c'ajomal no'ox lic snopic ti c'u s'elan ta xlic sa' smulic ta jtojole.

¹⁶C'ajomal no'ox sutic batel ta snijanel xchimanel sbaic ta stojol ti diosetic ti meltsanbil ta c'abale. Yu'un co'ol s'elanic jech c'u cha'al junuc xot-xot yolob ti mu tuc'uc ta xc'ot ti bu bijil satibil ech'ele. Ti jech mu'yuc stuq'uil smelol ta xc'opojique, espada xa'i xcham xlajic ti banquilaletic yu'unique. Jech xtoc ta me xich'ic labanel ti ta jteclum Egiptoe.”