Read Tzotzil Joel 2 Bible Online

Joel 2 - Tzotzil bible

Joel 2

¹Oq'uisanic ti oq'ues ta vits Sione. Oq'uisanic yo' ta xac' ta na'el svinajeb ta ch'ul vits yu'un ti Diose. Nicnunicuc no'ox liquel ti buch'utic nacalic ta jteclum Judae, yu'un jutuc xa sc'an ta xvul ta loq'uel ti xi s'elan ta xc'ot ta pasel ti sc'ac'alil yorail ti Diose:

²Ta xc'ot sc'ac'alil ti ic'ubel ta osil banomile. Ta xc'ot sc'ac'alil ti toc xqueovin ti banomil yu'une. Co'ol s'elan jun yepal soldadoetic ti tsots xu' yu'unic ta j'ech'ele, ta xvulic ta loq'uel ta vitstic jech c'u cha'al ta xvul ta loq'uel ti saquilal osil ta sobe. Mi ja'uc xa oy bu jech ta xvinaj ta ts'acal to ti oy bu co'ol s'elan ta xvul ta loq'uel jech c'u cha'al le'e.

³Yu'un co'ol s'elanic jech c'u cha'al junuc c'oc' ti scotol ta stsutsese. Xchic'ovan no'ox c'alal ta x'ech' batele, jech tilem ta xcom mi ech' xa batel une. C'alal mu'yuc to ox ta xvulic ta loq'uele, toj jun to ox yutsil ti banomile. C'alal laj ech'el yo'ntonique, co'ol s'elan jun sbajtical banomil ta xictaic comel. Laj to sc'oplal ma' ti oy c'usi colem ta xcom yu'unic une.

⁴Co'ol s'elan ca' yelanic. Xbitet no'ox ta anil jech c'u cha'al jcajlebinel ca'etic.

⁵Xpujlajet to ta j'ech'el ti c'alal xbitet no'ox ta anil ta vitstique, jech c'u cha'al xpujlajet no'ox ti carreta yu'un ti ac'ob-letoe, mi mo'oje, jech c'u cha'al xbototet no'ox ta xc'ac' ti yanalte' ti c'alal taquijem leque. Co'ol s'elan jvoc' soldadoetic ti tsots xu' yu'unic ti svoloj sbaic batel ta tsacvanej ta letoe.

⁶Ti buch'utic ta xilique ta xlic nicuc ta xi'el xchi'uquic; scotolic sac pac'an no'ox ti sat ta xcom xchi'uquique.

⁷Co'ol s'elan tsatsaquil j'ac'-leto viniquetic ti mu sna' xi'ique, xbitetic no'ox ta anil, stsoylajetic no'ox muyel ta anil ta moc, ti tuc' xc'uletic batele, ti mu ja'uc jutebuc ta sq'uejbun sbaic ta bee,

⁸mi ja'uc ti stacoltaan xa sbaique. Ti jujunique tuc' stamoj batel ti sbeique, mi ja'uc ta sq'uej sbaic ti bu ta xtal ti yolobe.

⁹Ta spojic batel ti c'usi oy yu'un ti jteclume. Xbitetic no'ox ta anil ti ta ba moque, ti stsoylajetic no'ox muyel ta naetic jech c'u cha'al junuc j'eleq'uetic ti ta xbitic ochel ta ventanae.

¹⁰Ta xnic yu'unic ti banomile; xc'uyc'un no'ox yu'unic ti vinajele. Ta xmac sat yu'unic ti c'ac'ale, ti ue; ta xmac yu'unic ti xchijlajan yutsil xojobal ti c'analetique.

¹¹Ti jech jba'be batel ti Dios yu'un ti yajsoldadotaque, xvo'o'et to ta xac' vinajuc ti sc'opojele. Mu no'ox albajuc ta j'ech'el ti yajsoldadotaque. Mu no'ox albajuc yepal ti ta xch'unbat ti smantale. Jelavem smuc'ul, xi'bal sba ti sc'ac'alil ta xvul ta loq'uel yu'un ti Diose. Mu'yuc buch'u sts'ic yu'un.

¹²Ja' yu'un un, xi ta xal ti Diose: “Avi tana le' une, sjunuluc avo'ntonic, sutanic talel ta jtojol; ictao avotic, oc'anic, avananic xtoc.”

¹³Sutanic talel ta stojol ti Ajvalil Dios avu'unique. Ja' majo ti avo'ntonique, ma'uc xach'i'ic ta jatel ti c'u'ile. Yu'un ti Diose mu albajuc ti syail xc'uxul yo'ntone. Oy sts'iquemal xcuchemal yu'un ta sventa ti xc'uxul yo'ntone. Oy sca'alil xpuxulil ta yaq'uel ti tsitsele.

¹⁴Yu'un nan xi s'elan ta xc'ot ta pasel yu'une yo' jech mu xayac'beic ti tsitsele, ti ja' ta xac'boxuc talel ti yutsilal slequilale. Ta xataic yu'un ti sat ts'unobale, ti vinoe ta sventa ta xich' ac'bel matanal ti Ajvalil Dios avu'unique.

¹⁵Oq'uisanic ti oq'ues ti ta vits Sione. Lo'iltabeic ya'i ti jteclum ti ictaej vaje.

¹⁶Tsobic talel steclumal ti Diose, mesic tusic lec. Tsobic talel ti moletique, ti ololetique, xchi'uc ti ololetic ti ta xchu'unique. Ja' no'ox jech xtoc ti buch'u naca to no'ox laj slec sbaique, ac'o loq'uicuc talel ta na ti bu vu' ti lequele.

¹⁷Oq'uicuc ti paleetique xchi'uc ti buch'utic ochemic ta yajtunel ti Diose, ti xi ac'o yalic talel ta ochebal yu'un ti ch'ulnae xchi'uc ti bu oy ti altare: “Ch'aybo smul scolo' ti ateclumale, Dios, mu teyuc no'ox aq'ueloj ti ta xlajic ta labanel ti avu'untaque. Mu xavac' ave ati' ti tsalbil ta xc'otic yu'un ti jyanlumetique, ti xi s'elan ta xloc' ta yeic ti buch'utic yan ti sjol yo'ntonique: ‘¿Bu oy ti Dios yu'unique?’ ”

¹⁸Jech o xal un, ti Diose laj yac' iluc ti syail xc'uxul yo'nton ta stojol ti slumale, yu'un c'uxubaj yo'nton yu'un ti steclumale.

¹⁹Xi lic yale: “Ta xcac'boxuc talel ti trigoe, ti vinoe, xchi'uc ti aceitee, ja' to ti c'uxi jun avo'ntonic ta xacomic xchi'uque. Mi ja'uc ta xcac' que jti' ti ta xavich'ic labanel yu'un ti buch'utic yan sjol yo'ntonique.

²⁰Ti c'ulubetic ti oy ta atojolic ti liquemic talel ta yolon ti yolon xocon sloq'ueb c'ac'ale, ta jten batel ta sbajtical banomil. Ti banquilal j'ic'vanej yu'une, ta xcac' jic'avuc ta Chamem Nab. Ja'uc ti jts'ac-pativanej yu'une, ta xcac' jic'avuc ta Mediterráneo nab. Ta xlic c'a'uc ti sbec'tale, ti yan sba stuil ta xc'ot ta j'ech'ele, yu'un oy c'usitic muc'tic ta xc'ot ta pasel cu'un.”

²¹Laetuc no'ox me xava'i, banomil, mi ja'uc xaxi' xtoc, yu'un ti Diose, oy c'usitic muc'tic ta xlic spas.

²²Te'tical chon bolometic, mu xaxi'ic, yu'un ti yaxaltique ta xlic yaxubuc, yu'un ta xlic yac' sat ti te'etique, Mu albajuc ta x'ayan liquel ti icuxe, ti uvae.

²³Jnaclejetic ta Sión, laetuc no'ox avo'ntonic, muyubajanic ta sventa ti oyoxuc ta stojol ti Dios avu'unique. Laj yac'boxuc talel ti vo' ti c'alal yorail xa ta xtune, laj yac'boxuc talel ti sba yalel vo'e, xchi'uc ti c'alal ta xpaj ta yorail jech c'u cha'al laj spas xtoc ta ba'yele.

²⁴Ta xloc' lec ti trigo avu'unique. Mu no'ox albajuc ta xloc' ti vinoe, ti aceitee.

²⁵“Vu'un ta jq'uextaboxuc sutel ti bu jeche' no'ox lub cham avoc ac'obic ta abtel ti jabil laj ech'uc ta scoj ti epal c'ulubetic laj jtac talel ta atojolic ti c'usitic sbusetic no'ox talel ta slilinele.

²⁶Ta xata lec ti ave'elique, ja' to ti c'uxi xlaet avo'nton ta xcom yu'une. Xalequil-c'opojic no'ox ta stojol ti Dios avu'unique. Oy c'usitic lec muc'tic laj jpas ta atojolic. Laj sc'oplal ti nijil chimil ta xcomic ta q'uexlal ti jteclumale.

²⁷Va'i un, ti vo'oxuc une, israeletic, ta xlic ana'ic ti tey ono'ox jchi'inojoxuc ti vu'un Diosune. Vu'un ti Diosun avu'unique, mu'yuc buch'u yan. Laj sc'oplal ti nijil chimil ta xcomic ta q'uexlal ti jteclumale.

²⁸“C'alal mi ech' ti va'i s'elan taje, xi s'elan ta xc'ot ta pasel cu'un ta stojol ti jnaclejetic ta banomil c'alal ta jtic'beic ta sjolic ti jcuxleje: ti aquerem atsebique ta xlic c'opojicuc ta jventa; ti moletique, oy c'usi ta xilic ta xvaichic; jech ti jva'lej viniquetique, oy c'usi ta xilic ti ta xjam ti sba satique.

²⁹Ja' jech xtoc ti mosovil ants viniquetique, ta jtic'be ta sjolic ti jcuxlej ti jech c'ac'al taje.

³⁰Oy c'usitic ta xcac' iluc ta vinajel ti muc'tic no'ox ta j'ech'ele, ti ch'ayal ta xc'ot o'ntonal yu'une. Ta xvinaj ch'ich', ta xvinaj c'oc', xvolet no'ox lumal toc ti co'ol s'elan ch'ail ti li' ta banomile.

³¹Ta x'ic'ub ti c'ac'ale, ta xjoybij ta ch'ich' ti ue. Ja' no'ox un, ba'yel oy c'usi muc'tic ta xc'ot ta pasel ti xi'bal sba c'alal ma'uc to sc'ac'alil yorail ta xvul ta loq'uel ti Diose.”

³²Ja'uc ti buch'utic ta staic ta na'el ti Diose, ta xcolic ti jech oy sc'oplal ta xchamique. Ta vits Sión ti oy ta jteclum Jerusalene, oy ti pojobbail teye jech c'u cha'al yaloj ono'ox ti Diose. Ti buch'u t'ujbilic yu'une, cuxul ta xcomic.