Read Tzotzil Joel 3 Bible Online

Joel 3 - Tzotzil bible

Joel 3

¹Xi ta xal ti Diose: “C'alal ta xc'ot yorail ti va'i s'elan taje, ta xc'ot ta pasel cu'un ti ta jelbe ta stojolic ti chopol yorail yu'unic ti Judae xchi'uc ti jteclum Jerusalene.

²Ta jtsob scotol ti muc'tiquil jteclumetique. Ta xquiq'uic batel ta stenlejal yu'un ti Josafate. Ti bu taje, ta xlic jchapanic ti c'usi laj spasbeic ti jteclumal Israele. Tan puc bat yu'unic ti israeletic ta scotol banomile; laj xch'acanbe sbaic ti jlumale.

³Ta orail laj sq'uelic ti laj xch'acanic batel ti jteclumale. Laj xchonic batel ti ololetique, mu'yuc ta alel mi queremetic mi tsebetic. Ti stojole, laj slajesic o ta vino, ta antsetic ti sna' sbolomalin sbaique.

⁴“¿C'usi ta xac'anic ta jtojol ti vo'oxuque, jteclum Tiro, jteclum Sidón, jteclum Filistea? ¿Mi yu'un ta xapacbeicun ava'iic? ¿Mi yu'un oy c'usi ta xac'anic ta jtojol ti ac'o jtoje? Yu'un mu xa jaluc sc'an ta xcac' atojic ti c'usi loc' ta avo'ntonic ta sa'ele.

⁵Ti vo'oxuque laj avelc'anbeicun ti platae, ti oroe. Laj avich'ic batel xtoc ta ach'ulnaic ti c'usitic toyol stojole.

⁶Nom laj avic' batel ti jnaclejetic yu'un ti jteclum Judae xchi'uc ti jnaclejetic yu'un ti jteclum Jerusalene. Laj achonic xtoc ti c'otic ta smosovic ti griegoetique.

⁷Va'i un, ti bu laj achonic batele, ta jloq'uesic talel. Ta xc'ot ta pasel cu'un jech ta xavich' avocolic jech c'u cha'al laj yich' ti stuquique.

⁸Ti aquerem atsebique, ta jchon batel ta stojol ti judaetique yo' jech ti stuquique, ta xchonic batel ta stojol ti sabeoetique, ti ja' jun jnamal jteclume. Jech xa loc' ta que ti vu'un Diosune.

⁹“Caj'albeic ya'i ti muc'tiquil jteclumetic ti va'i s'elan ti xi ta xcal taje: ‘Liquesic ti ch'ul letovajele, iq'uic talel ti viniquetic ti mu sna' xi'ique. Ac'o talicuc, voleticuc batel ti j'ac'-letoetique.

¹⁰Ac'o smeltsanic ta yespadaic ti yasaronique. Ac'o smeltsanic ta slanzaic ti sjosique. Ac'o xi yal ti buch'u ch'abal ti yip ta xa'ie: Oy lec yipal cu'un ta xca'i ec un.’ ”

¹¹Ti vo'oxuque, uts' alal jteclumetic, la'ic ta anil, la' tsobo abaic. Ti buch'u mu'yuc to ox c'usi sna' xale, ta xlic joybijuc ta banquilal j'ac'-leto.

¹²Chaplicuc avu'unic ti muc'tiquil jteclumetique ti ac'o talicuc ta stenlejal yu'un ti Josafate. Ti bu taje, ta xchapanatic yu'un Dios ti uts' alal muc'tiquil jteclumetique.

¹³Yu'un ti stuquic taje, toj ech'em chopolic; josic ta tuch'el jech c'u cha'al ta xich' tuch'el ti trigo ti staoj xa syijubele, c'ot xa yorail ta xich' tsobel ti ts'unubale. Pech'ic ta teq'uel jech c'u cha'al ta xich' t'usel ti uvae, yu'un chapal xa sc'oplal scotol yo' jech ta xich' pits'el ti vinoe.

¹⁴Ta stenlejal ti bu oy c'usi ta xc'ot ta nopele, mu no'ox albajuc ti oy buch'utic xvoletic batele, yu'un jutuc xa sc'an ta xc'ot sc'ac'alil yorail ti c'u s'elan chapanbil yu'un ti Diose.

¹⁵Ti c'ac'ale, ti ue, ta x'ic'ub, ja' jech xtoc ti c'analetique ta xtub ti xvic'vun no'ox yutsil ti xojobale.

¹⁶C'alal ta xac' ta a'yiel ti xc'avluj to sc'opojel ti Dios ta vits Sión ti oy ta Jerusalene, ta xlic nicuc ti vinajele, ti banomile. Ti Diose, ja' jpojvanej jnac'vanej yu'un ti israeletique, yu'un ja' steclumal.

¹⁷Xi ta xal xtoc ti Diose: “Ja' jech ta xana' ti vo'oxuc ti vu'un Ajvalil Diosun avu'unique, ti nacalun ta vits Sión ti ja' jch'ul vitse. Jech ti Jerusalén ti ja' jun ch'ul jteclume, xi s'elan ta xc'ot ta pasel cu'une: ta j'ech'el mi ja'uc xa ta xlic yu'ninic ti jyanlumetique.

¹⁸Ti jech c'ac'al taje, jech ti vinoe, ti chu' vacaxe, buyuc no'ox xlaj t'omanuc talel ta te'tic, ta vitstic jech c'u cha'al junuc vo'. Ti uc'umetic yu'un ti jteclum Judae, mu no'ox albajuc ta xbalaq'uin ti vo'e. Jech ti ta jch'ulnae, ta xtuc talel vo' ti ja' ta smalta ti stenlejal Sitime.

¹⁹Yan ti jteclum Egiptoe, stuc slilijemal ta xcom, jech ti jteclum Edome ta xjoybij ta jun sbajtical banomil, yu'un laj stsaquic ta leto ti jnaclejetic yu'un ti jteclum Judae. Jech xtoc ti ta slumalique, laj yaq'uic ta milel ti buch'u ch'abal smulique.

²⁰Vu'un ta jpacbe sc'oplalic ti buch'utic lajic ta milele, mi ja'uc q'uelbil ta xcom ti buch'u oy smule. Ja'uc ti jteclum Judae xchi'uc ti jteclum Jerusalene, oy o ti jnaclejetique, mi ja'uc oy bu ta xtub. Jech ti vu'un Ajvalilune ta xinaqui ta vits Sión.”