Read Tzotzil Amós 2 Bible Online

Amós 2 - Tzotzil bible

Amós 2

¹Xi ta xal ti Diose: “Ti jteclum Moabe, ep ti c'usitic chopol spasojique. Ta ono'ox jtsitsic ya'iic. Laj xchic'beic sbaquil ti ajvalil yu'un ti jteclum Edome, ja' to c'uxi tan com yu'unique.

²Jech o xal ta jtsanbe sc'ac'al ti yosilal Moabe. Jech ti c'oc' taje ta stsutses ta chiq'uel ti muc' ta naetic ti oy ta Queriote. C'alal xvochetic xa ti j'ac'-letoetique, ti xtututet xa ti oq'uesetique, ta xchamic ti moabitaetique.

³Ta jten loq'uel ti ajvalil ta stojol ti jteclume. Ta jmil jmoj xchi'uc ti svinictac ti ich'bil ye sti'ique.” Ti va'i s'elan taje, ja' ta xal ti Diose.

⁴Xi ta xal ti Diose: “Ti jteclum Judae, ep ti c'usitic chopol spasojique. Ta ono'ox jtsitsic ya'iic. Laj sbajic ti chanubtasel yu'un ti Diose. Mi ja'uc laj xch'unbeic ti oy c'usi jbel tsots albile. C'ajomal no'ox lic snijan xchiman sbaic ta yich'el ta muc' ti c'usitic loc'tabile, co'ol jech c'u cha'al laj spasic ti stot sme'ic ti laj ech'icuque.

⁵Jech o xal un, ta jtsanbe sc'ac'al ti jteclum Judae. Jech ti c'oc' taje ta stubbe sc'oplal ti muc'tic naetic yu'un ti jteclum Jerusalene.”

⁶Xi ta xal ti Diose: “Ti israeletique, ep ti c'usitic chopol spasojique. Ta ono'ox jtsitsic ya'iic. Ti buch'u ch'abal smule, laj xchonic batel ta taq'uin. Ja'uc ti me'un mu'nate, ta jchop no'ox xonobil ta sjelic o ech'el.

⁷Ta xilbeic svocol ta j'ech'el ti me'un mu'nate. Mi ja'uc xc'ot ta yo'ntonic ta xchapanic ti buch'u biq'uit yac'oj sbae. Ti totile xchi'uc ti nich'onile, jun no'ox ti ants ta xvayic xchi'uquique. Ja' jech ta xc'ot ta pasel yu'unic ti ta soquesbeicun ti jc'oplale.

⁸Somolic no'ox ta c'u'il ti laj xa yich'ic ta rentale. Lec xa xa'iic ta slajesel ti ve'lil ti ac'bil ta sventa yich'obil ta muc' ti loc'obbaile. Smanic o xa vino xchi'uquic ta sventa ti taq'uin ti loc' ta c'anel yu'unic ti c'alal ch'abal ti mulile. Ta xbat yuch'ic ta xch'ulna ti dios yu'unique.

⁹“Ac'o mi jech un, ti vu'une laj jtubbe sc'oplalic ti amorreoetique yo' jech ta xata alequilalic. Ac'o mi jun snatiquilic jech c'u cha'al ti ch'ut te'e, ac'o mi tsots xu' yu'un jech c'u cha'al ti tulanetique, laj jtub ta j'ech'el.

¹⁰Ti vo'oxuque, laj jloq'uesoxuc talel ta jteclum Egipto. Cha'vinic (40) jabil laj quic'oxuc batel ta sbajtical banomil yo' jech ta xacac'beic ti sbanomilique.

¹¹Le'e, israeletic, mi ja'uc stac' ti macal ave ta xcom yu'un ti oy li' loc' ta atojolic ti c'otic cu'un ta j'alc'opetique, xchi'uc yan ti t'ujbil c'otic ta nazareoetic cu'une. Ti vu'un Diosune, mu me lo'iluc no'ox ta xcal.

¹²“Ja'uc ti vo'oxuc une laj asujic ta yuch'el vino ti nazareoetic ti buch'utic t'ujbilique. Laj amaquic ta be ti j'alc'opetique yo' jech mu xalic ti jc'oplale.

¹³Lec oy un cha'e, ta xcac'bot tsots avocol li' ta banomile, ti naca xa xa'ajajet ta xacom yu'une jech c'u cha'al ti carreta ti naca xa squits'its'et yu'un ti yicats ti noj ta trigoe.

¹⁴Ac'o mi xabitetic no'ox ta anil, mi ja'uc ono'ox ta xacolic. Ti buch'u oy yipal yu'une, ta xlaj yu'un. Mi ja'uc ta xcol ti buch'u mu sna' xi' xa'i sbae.

¹⁵Jech ti jxach'-yolobe, mi ja'uc jal ta xcuch yu'un, mi ja'uc ta xcolic. Mi ja'uc ta xcolic ti buch'utic mu xa ta yacanuc ti xbitet ta anile. Mi ja'uc ta xcolic ti buch'utic cajalic ta ca' ta xjatavic batele.

¹⁶Ti jech c'ac'al taje, ti buch'u mu sna' xi' ta yaq'uel ti letoe, ta sloc' comel ti smacobbaile yo' jech xu' ta xjatav batel. Ti vu'un Diosune, mu me lo'iluc no'ox ta xcal.”