Read Tzotzil Jonás 2 Bible Online

Jonás 2 - Tzotzil bible

Jonás 2

¹Va'i un, ti Jonás ti jech oy ta xch'ut ti choye, lic c'opojuc ti'inuc ta stojol ti Dios yu'une.

²Xi lic yale: “C'alal mu xa cha'bel x'ech' laj ca'ie, xi'avet no'ox liquel ta ac'oponel, Dios, laj ava'ibun ti jc'opojel jti'inele. C'alal oyun ti bu spajeb snatil ti lajebale, laj jtaot ta c'oponel, laj ava'ibun.

³Laj ajipun yalel ti bu xa c'alal spajeb sninabil ti nabe; laj sts'otun yalel ta j'ech'el yoctac ti nabe. Xva'i xcoti avu'un ti syuc'benal ti ta xapas ta mantale, ti ech' ta jbae.

⁴Laj ca'i ti tenbil liloc' ta atojole; laj xa ox jnop ti mu xa cha'bel xquil ti ach'ulnae.

⁵Ta j'ech'el limut'ij ta vo'; limut'ij yalel ta sninabil ti nabe; ti bu sts'otanoj xa sba ta jol ti smomolaltac ti nabe.

⁶Limut'ij yalel ti bu xa c'alal spajeb snatil ti xabe; laj ca'i xa ox ti chucbil ta xicom yu'un sbatel osile. Ja'uc ti vo'ot une, Cajval Dios, laj apojun ti jech ta xa xichame.

⁷C'alal laj ca'i ti ta xa xituch' batele, lavul to ta co'nton, Cajval; ti jc'opojel jti'inele c'ot c'alal to ta ach'ulna.

⁸Ti buch'utic ta sts'acliic ta yich'el ta muc' ti loc'obbailetique, ja' ta xc'ot ta pasel ti mu xa junuc ti sjol yo'ntonic ta atojolale.

⁹Ti vu'une, c'ajomal xa no'ox jun yutsil ta xloc' ta que ti colaval, xacute, ti ja' jun lequil milbil matanal ta xcac'bote; ta xc'ot ta pasel cu'un xtoc ti oy c'usi laj calbote. C'ajomal no'ox vo'ot, Dios, ti xana' xapojvane.”

¹⁰Jech ti Diose laj yalbe mantal ti choye ti ac'o xeta loq'uel ta sti'il nab ti Jonase.