Read Tzotzil Jonás 4 Bible Online

Jonás 4 - Tzotzil bible

Jonás 4

¹Mu lecuc laj ya'i ti Jonás ti c'u s'elan laj spas ti Diose. Ep soc yo'nton xchi'uc.

²Xi lic c'opojuc ti'inuc ta stojol ti Diose: “Q'uelo avil, Cajval, yu'un ja' no'ox jech laj cal ti jech ono'ox ta xc'ot ta pasel c'alal tey to ox oyun ta jlumale. Jech o xal ta jc'an ox ta xijatav batel ta anil ti ta jteclum Tarsise. Yu'un jna' lec ti ja' jun Diosot ti oy sts'iquemal xcuchemal avu'une, ti mu xana' xa'ilin ta anile. Ac'o mi xacaj'al xtoc ti ta xatsitsvane, ts'acal to un, ta xasutes aba ta sventa ti mu no'ox albajuc ti syail xc'uxul avo'ntone.

³Jech o xal un, Cajval, avocoluc, tuch'bun ti jch'iel jc'opojele, ja' to jech xlaet ta xca'i ti ta xicham xilaje. Toj altic ti li' to cuxulune.”

⁴Le' une, xi tac'bat yu'un ti Diose: “¿Mi yu'un ja' jech xlaet ta xava'i xcaltic ti ta xa'iline?”

⁵Jech ti Jonase loc' batel ti ta jteclume, bat sa' ti bu ta xcome, ti xi oy ta stuq'uil sloq'ueb c'ac'ale. Ti bu taje, lic smeltsan yaxibal na. Lic xchotan sba ta yolon squeoval yo' jech ta smala yil ti c'usi ta xc'ot ta pasel ta stojol ti jteclume.

⁶Jech xtoc ti Diose laj yac' ch'iuc jpets uni te' ti ta xac' yaxinal ta sts'el ti Jonase yo' jech lec ta xa'i ti ta x'axinaj ta squeovale. Jech ti Jonase xmuyubaj xa xchi'uc ti jpets uni te' taje.

⁷Le' une, ti ta sacubel osil ti ta yan c'ac'ale, ti Diose laj xchapan xuvit ti ta xc'ux ta ti'el ti jpets uni te'e. Jech ti uni te' une lic taquijuc.

⁸C'alal xchijlajan xa vulel ti c'ac'ale, jech ti Diose laj yac' taluc jun ic' ti q'uixin ta j'ech'ele, ti lic talel ta stuq'uil ti sloq'ueb c'ac'ale. Ti jech va'al lec ti c'ac'al ta xc'ot ta sjol ti Jonase, laj ya'i ti ta xa xyal ta lume, sc'an xa chamuc. “Ja' xu' ta j'ech'el ti chamcune. Jeche' xa no'ox ta j'ech'el ti li' to cuxulune”, xut sba.

⁹Xi tac'bat yu'un ti Diose: “¿Mi yu'un bal to ta xava'i ti ta xa'ilin xchi'uc ti taquij xa ti jpets uni te'e?” Xi laj stac' ti Jonase: “Ja' to me xlaet ya'yel unbi. Ta sc'ac'al xa no'ox co'nton xicham o xchi'uc.”

¹⁰Va'i un, xi albat yu'un ti Diose: “Ma'uc laj ats'un ti jpets uni te'e. Mi ja'uc laj ats'ites. Ta jun no'ox ac'ubal, voc' talel. Ta yan xa ac'ubal, c'ot ta taquijel. Manchuc mi jech un, mu xnel, mu x'ech' ta xava'i yu'un ti jech taquije.

¹¹Le' ec une, x'ech' to sc'oplal ta xca'i ta xc'uxubaj co'nton yu'un ti muc' ta jteclum Nínivee, ti x'ech' to ta vacvinic ta mil (120,000) ololetic ti mu to xa'ibeic smelol ti osil banomile, xchi'uc ti epal chon bolometique.”