Read Tzotzil Números 13 Bible Online

Números 13 - Tzotzil bible

Números 13

¹Ti Diose xi laj yalbe ti Moisés ti c'alal laj sc'opon talele:

²“Taco batel jun chibuc viniquetic ta smucul xchajel ta q'uelel yosilal ti Canaane, ti ta xcac'be yu'ninic ti israeletique. Ti ta jujuvoc' nitilulile, taco batel jujunuc vinic yu'unic ti yich'oj yabtelique.”

³Va'i un, ti Moisés, ta sbajtical to banomil yu'un Parán, laj stac batel viniquetic jech c'u cha'al albat yu'un ti Diose. Scotolic ja' viniquetic ti yich'oj yabtelic ta stojol ti israeletique.

⁴Yu'un xi s'elan ti chaplujic batele: Ta sventa ti jvoc' snitilul ti Rubene, ja' ti Samuae, xnich'on ti Zacure.

⁵Ta sventa ti jvoc' snitilul ti Simeone, ja' ti Safat xnich'on ti Horie.

⁶Ta sventa ti jvoc' snitilul ti Judae, ja' ti Caleb xnich'on ti Jefone.

⁷Ta sventa ti jvoc' snitilul ti Isacare, ja' ti Igal xnich'on ti Josee.

⁸Ta sventa ti jvoc' snitilul ti Efraine, ja' ti Oseas xnich'on ti Nune.

⁹Ta sventa ti jvoc' snitilul ti Benjamine, ja' ti Paltí xnich'on ti Rafue.

¹⁰Ta sventa ti jvoc' snitilul ti Zabulone, ja' ti Gadiel xnich'on ti Sodie.

¹¹Ta sventa ti jvoc' snitilul ti Josee, ja' ti Gadí xnich'on ti Susie, (ti ja' jvoc' snitilul ti Manasés xcaltique).

¹²Ta sventa ti jvoc' snitilul ti Dane, ja' ti Amiel xnich'on ti Guemalie.

¹³Ta sventa ti jvoc' snitilul ti Asere, ja' ti Setur xnich'on ti Micaele.

¹⁴Ta sventa ti jvoc' snitilul ti Neftalie, ja' ti Nahbi xnich'on ti Vapsie.

¹⁵Ta sventa ti jvoc' snitilul ti Gade, ja' ti Gueuel xnich'on ti Maquie.

¹⁶Ja' jech sbiic ti viniquetic ti tacatic batel yu'un ti Moisés ta smucul xchajel ta q'uelel ti jteclume. Ti Oseas xnich'on ti Nune laj yich' jelbel sbi, Josué laj yac'be sbiin.

¹⁷Ti Moisese xi laj yalbe ti viniquetic ti c'alal laj stac ech'el ta smucul xchajel ta q'uelel yosilal ti Canaáne: —Ta Néguev xatamic ochel, muyanic batel ta toyol vitstic.

¹⁸Q'uelic lec c'u s'elan ti jteclume, mi tsatsaquil viniquetic ti jnaclejetic yu'une, mi ma'uc, mi epic, mi mo'oj.

¹⁹Q'uelic lec xtoc mi ta axibal na no'ox nacalic ti yajval jteclume, mi oy smocal, mi lec ti banomil ti bu nacalique, mi jutuc no'ox,

²⁰mi ve'ebal banomil, mi sbajtical banomil, mi oy ste'tical, mi mu'yuc. Mi oy c'usiticuc lo'bolal sat te'al ti x'ayan ta osile, ich'ic talel, mu xaxi'ic. Ti c'ot ta pasel ti va'i s'elan taje, ja' o xa yorail ta xich' tuch'el ti sba sat uvae.

²¹Ti viniquetique batic, lic smucul chajic ta q'uelel ti jteclume. Ech'ic ta sbajtical banomil yu'un Zin ti oy ta yolon ti yac'ol xocon sloq'ueb c'ac'ale, c'ot c'alal to ta Rehob ti oy ta yolon ti yolon xocon sloq'ueb c'ac'ale, ti snitoj sba xchi'uc ti ochebal yu'un ti Hamate.

²²Ochic batel ta Néguev, c'otic c'alal to Hebrón. Taje, tey nacalic snitilultac ti Anaque, ja'ic ti Ahimane, ti Sesaie, xchi'uc ti Talmaie. Ti Hebrón taje, syucubal xa jabil yich'oj sva'anel ti c'alal laj yich' va'anel ti Zoán ti oy ta Egiptoe.

²³C'otic c'alal to ta ch'in uc'um yu'un Escol. Ti bu taje, laj xtuch'ic batel jep sc'ob uva ti vojol lec ti sate, ti ta cha'vo' yajval xchechojic batel ta te'e. Ja' jech xtoc laj sc'oquic batel sat granada xchi'uc icux.

²⁴Escol[4] laj yac'beic sbi ti ch'in uc'um taje ta sventa ti laj xtuch'ic talel ti jvoj uva ti israelal viniquetique.

²⁵Ts'acal to un, sutic batel ti c'alal ech' xa ox cha'vinic c'ac'al yochelic ta smucul chajel ta q'uelel ti banomile.

²⁶Batic ta Cades ti oy ta sbajtical banomil yu'un ti Parane. Ti bu taje, tey oy ti Moisese, ti Aarone, xchi'uc scotol ti israeletique. Va'i un, xchapet lic yalic ti c'usitic laj staic talel ta ilele, xchi'uc lic yaq'uic ta ilel ti sat sts'unubalil ti jteclume.

²⁷Xi laj yalbeic ti Moisese: —Li'aycutic ta banomil ti bu laj atacuncutic batele. Ta melel, ja' jun banomil ti bu co'ol s'elan vo' ta xbein ti chu' vacaxe, ti ajapome. Q'uelo avil ti sat te'etic ti ta xac' ti banomil li'e.

²⁸Ja' no'ox un, ti buch'utic nacalic teye, toj tsotsic. Muc'tic ta j'ech'el ti jteclumetic yu'unique, oy lec smocaltac. Ma'uc no'ox taje, yu'un laj quilcutic ti nacalic snitilultac ti inate' vinic Anaque.

²⁹Ti ta yosilal Négueve, nacalic xtoc ti amalecitaetique. Ti ta stuq'uil vitstique, nacalic xtoc ti hititaetique, ti jebuseoetique, xchi'uc ti amorreoetique. Ja' jech xtoc ti ta ti' nabe, xchi'uc ti ta sti'il uc'um Jordane, nacalic ti cananeoetique.

³⁰Va'i un, ti Calebe ts'ijil ic'ot yu'un ti jteclum ti c'u yepal volol ta stojol Moisés ti xi laj yale: —¡Ja' yu'un un cha'e, ba jvol jbatic ta yu'ninel ti banomil taje! ¡Ta ono'ox xu' cu'untic ta yu'ninel!

³¹Ja' no'ox un, ti buch'utic ay xchi'inique xi laj staq'uique: —¡Mu xu' cu'untic ta stsalelic ti yajval lumetic taje! Yu'un ti stuquique toj ech'em tsotsic, ja' mu sta ti vo'otique.

³²Va'i un, xi lic yalilanbeic ti israeletique: —Ti jteclum ti bu ay jmucul chajcutic ta q'uelele, toj chopol. Yu'un ti banomil ti bu ay jmucul chajcutic ta q'uelele, naca xch'ay no'ox yu'un ti jnaclejetic ti buch'u ta xc'ot teye. Scotol ti viniquetique toj ech'em xa no'ox smuc'tiquil laj quilcutic.

³³Laj quilcutic xtoc ti inate' viniquetique, ti ja' snitilultac ti Anaque. Co'ol s'elan jcotuc c'ulub ta xca'i jbatic ta stojolic. Ja' jech ta xijyilotic ti stuquic eque.