Read Tzotzil Números 14 Bible Online

Números 14 - Tzotzil bible

Números 14

¹Va'i un, ti israeletique xvochetic liquel, ti x'oc'lajetic ech' yu'unic ti ac'ubaltic taje.

²Scotolic lic chopol c'opojicuc ta stojol ti Moisese xchi'uc ta stojol ti Aarón ti xi ta xalique: “¡Ti oc no'ox la ta alele teyuc lijchamotic ta Egiptoe, mi mo'oje, li'uc no'ox la ta sbajtical banomile!

³¿C'u cha'al ya'yel laj yic'otic talel ti Dios ta jteclum li'e? ¿Mi yu'un naca tal yac' lajcutic ta leto yo' ta x'och ta c'abal yu'un cajcontratic ti cantsiltique, ti jnich'nabtique? ¡Ja' xloc' venta ti sutcutic batel ta Egiptoe!”

⁴Xi lic yalanbe sbaic ta jujun tale: “¡Jva'antic junuc banquilal cu'untic, sutcutic ech'el ta Egipto!”

⁵Ti Moisese xchi'uc ti Aarone snupilan xa banomil laj spatan sbaic ta lum ta sba ta sat scotol ti jteclume.

⁶Jech xtoc ti Josuee, ti Calebe, ti ja'ic ti buch'utic ay smucul xchajic ta q'uelel ti jteclume, laj xch'i'ic ta jatel ti sc'u'ique, svinajeb ti c'ux ta xa'i ti svocolique.

⁷Xi laj yalbeic xtoc scotol ti israeletique: —¡Ti banomil ti ay jmucul jchajcutic ta q'uelele, spajebal yutsil ta j'ech'el!

⁸Mi ta spas ti cajal ta xc'ot jc'oplaltic yu'un ti Diose, ta xiscoltaotic c'u s'elan xu' ta xij'och batel ta banomil ti bu ta xijyac'botique. Ti bu taje, ja' jun jteclum ti co'ol s'elan vo' ta xbein ti chu' vacaxe, ti ajapome.

⁹Ti c'usi no'ox ta sc'ane, mu xatoy abaic ta stojol ti Diose. Ja' jech xtoc mu xaxi'ic yu'un ti jnaclejetic ta jteclum taje. Yu'un ti stuquique, co'ol s'elan jbej pan ti ta jxumel no'ox ta stsuts cu'untic ta ve'ele, yu'un mu'yuc yajpojelic. Ja'uc ti vo'otique, yac'oj sba ta jpojeltic ti Diose. ¡Mu xaxi'ic!

¹⁰Ac'o mi jech taj une, ti jnaclejetique ja' xa no'ox ta spujic ya'iic ton ta j'ech'el. Ja' yu'un un, ti c'alal jech taje, laj svinajes yutsil slequilal ti Dios ta sba ta satic scotol ti israeletic ta Axibalna ti bu nupel ta bee.

¹¹Jech o xal ti Diose xi laj yalbe ti Moisese: —¿C'usi to ora ta spajes sbaic ta sbajelun ti jnaclejetic li'e? ¿C'usi to ora ta spajes sbaic ti xna'etic ta jtojole, manchuc mi laj xa yilic ti jlequilal cutsilal ta stojolique?

¹²Ta xcac' taluc jtsutsesvanej chamel ta stojolic yo' jech ta xmacatic ta be ta yu'ninel ti banomil taje. Yan ti vo'ote ta xa'epajic cu'un yo' jech ta xac'otic ta jun muc' ta jteclum ti x'ech' to xu' avu'unique, ti ja' mu sta ti stuquique.

¹³Ja' no'ox un, ti Moisese xi laj stac'be ti Diose: —Ta amuc'ul, ta atsatsal laj aloq'ues talel ta Egipto ti jteclum li'e. C'alal ta xa'i ti egipcioetic ti c'usi anopoj ta xapase,

¹⁴ta slo'iltabeic ya'i ti jnaclejetic ti oy ta jteclum Canaane. Yu'un ti stuquique ya'binojic ac'oplal ti vo'ote, Dios, ti oyot ta o'lol yu'un ti jteclum li'e, ti ta xavac' aba ta ilel ta stojolic ti volol ta sbaic ti toc avu'une, ti jba'beot batel yu'unic ta jun voletel toc ti ta c'ac'altique. Ja'uc ti ta ac'ubaltique, oyot ta jun muc' ta voletel leb c'oc'.

¹⁵Mi jloq'uel abtel avu'un ta ora no'ox ta xamil ti jteclum li'e, va'i unbi, xi ta xalic ti muc'tiquil jteclum ti ya'binojic ac'oplale:

¹⁶‘Ti Diose mu'yuc c'usi laj yut laj yac' ochuc batel ta banomil ti jteclum li'e ti yaloj ta jamal ta xac'bee. Jech o xal un, laj smil ta sbajtical banomil.’

¹⁷Jech o xal un, Cajval, ava'i tana li' une, vinajeso ti amuc'ul atsatsale jech c'u cha'al loq'uem ta ave ati'e. Yu'un avaloj

¹⁸ti mu xana' xacap ta anile, ti jelavem ti xc'uxul avo'ntone, ti xana' xatub ti toyobbaile, ti c'usi chopole, ac'o mi ta ono'ox xavac'be stoj ti buch'u chopole. Yu'un ta ono'ox xavac'be stoj smulic ti totil me'ile, ti ta sta ta maquiel xtoc ti nich'nabile, ti momiletique, ti yialmomiletique, ti smomic xtoc ti yialmomiletique.

¹⁹Yu'un ti jech ech'em xc'uxul avo'ntone, ch'aybo ti xchopolalic ti jteclum li'e. Yu'un ts'ic xa talel avu'un ti staoj o yav ti c'u s'elan stalelic ti loq'uic talel ta Egiptoe, ti jech to yacalic ti bu xa xtalic avi tana li'e.

²⁰Ti Diose xi laj staq'ue: —Lec, ta jch'aybe smulic jech c'u cha'al laj ac'ane.

²¹Ja' no'ox un, ti jech cuxulun ta melele, ti jech ta xvinaj ti cutsilal ta scotol banomile,

²²ti buch'utic laj yilic ti jlequil cutsilale, xchi'uc ti jchop o ti laj yilic ti c'u s'elan laj jpas ta Egiptoe xchi'uc ti ta sbajtical banomile, ti ja' no'ox oy ta yo'ntonic ti jayib velta ta sq'uelic ya'iic ti co'nton ta sbajtical banomil ti mu sc'an xch'unic ti jmantale, ti buch'utic jech taje,

²³mi junicuc ta xilic ti banomil ti calojbe ya'i ta xcac'beic ti smolmuc'totique. Ti buch'u laj xa sbajicune, mi junuc ta xilic.

²⁴Ja' no'ox ta xil ti cajtunel Calebe. Yu'un yan o ti c'u s'elan ti xcuxlejal ta stojole, yu'un jbel yo'nton xch'unojbun ti jmantale. Jech o xal ti stuque, ta xcac' ochuc ech'el ti ta jteclum ti ay smucul xchaj ta q'uelele, xchi'uc j'ech'el ta xcom nacliicuc ti snitilultac ti bu taje.

²⁵(Ti amalecitaetique xchi'uc ti cananeoetique nacalic ta stenlejal.) Yan ti vo'oxuque joyic batel abeic oc'om, yu'un ech'anic ta sbajtical banomil ta stuq'uil Tsajal Nab.

²⁶Ti Diose xi laj yalbe ti Moisese xchi'uc ti Aarón ti c'alal laj sc'opon talele:

²⁷—¿C'u to sjalil ta jts'ic ti xvulajetic ti jsoquesvanej israeletic li'e? Ca'binoj xa ti ta xischopol-c'optaique.

²⁸Va'i un, xi jch'amuntic ave ati' xavalbe ya'iic ta jventae: “Ti vu'un Diosune ta jbain jtuc ta spasel ta stojolic ti joybijuc ta sba stuquic jech c'u cha'al yeinojic ta yalel ta xca'ie.

²⁹Scotol ti buch'u chopol c'opojic ta jtojol ti x'ech' ta jtob (20) jabil ti laj yich' tsacbel ti sbiique, ta xchamic. Busul ta xcom yu'unic ti lum ach'el li' ta sbajtical banomile.

³⁰Mi junuc ta xa'ochic batel ta banomil ti laj calboxuc ta jamal ti ta xacac'beique. Ja' no'ox ta x'ochic batel ti Calebe xchi'uc ti Josuee.

³¹Ja'uc ti anich'nabic laj avalic ti ta x'ochic ta c'abal yu'un ti avajcontraique, ja' ta xquic' ochel ta jteclum ti laj abajique. Jech ti stuquique ta xilic ta sc'upinel ti yutsilale.

³²Ti lum ach'el yu'un ti abec'talique, busul ta xcom li' ta sbajtical banomile.

³³Yu'un ti avalab anich'nabique, cha'vinic (40) jabil co'ol s'elan j'il-chij ti yalel muyelic ta sbajtical banomile. Ti jech taj une, ta sbainic stojel ti jech mu'yuc stuq'uil avo'ntonique, ja' to ta xlaj c'op mi lacham acotolic li' ta sbajtical banomile.

³⁴Yu'un ti cha'vinic c'ac'al sjalil laj amucul chajic ta q'uelel ti lume, xi s'elan ta xc'ot ta atojolic ti tsitsel cu'une. Yu'un ti cha'vinic c'ac'ale, ta spas jujun jabil, ja' jech xana'ic ti mu lecuc ti ja' no'ox ta xacontrainicune.

³⁵Ti vu'un Ajvalilune, mu me lo'iluc no'ox ti xi ta xcale. Ja' jech ta jpasbeic ti chopol jteclum ti svoloj sbaic ta scontrainelune. Yu'un li' ta sbajtical banomil ta xc'ot ta tsutsel ti yuni c'oplalique. Li' ta xcham ta xlajique.”

³⁶Ti viniquetic ti tacbilic batel yu'un Moisés ta smucul chajel ta q'uelel ti banomile, ti xvochvun xa liquel ti jnaclejetic yu'unic ti mu lecuc c'usi vul yalique, ta sventa ti c'usi x'ayan yu'un ti jteclume,

³⁷ti viniquetic taje, ti vul yalbeic sc'oplal ti chopol ti banomile, j'ech'el abtel chamic ta sba ta sat ti Diose.

³⁸Ti ta scotolic taje, ja' xa no'ox cuxul com ti Josuee xchi'uc ti Calebe.

³⁹C'alal chapbatic yu'un Moisés ti israeletic ti oy c'usi albil yu'un ti Diose, scotolic ochic ta at-o'nton xchi'uquic.

⁴⁰Ta yoc'omal un, sob xa liquic. Laj stam muyel sbeic ta toyol vitstic ti xi laj yalique: —¡Li' xa oyotique! Ba ochcutic xch'a ti bu loq'uem ta ye ti Dios ta xijyac'botique. Melel oy ti jmultique.

⁴¹Ja' no'ox un, xi laj yal ti Moisese: —¿C'u cha'al mu xach'unbeic smantal ti Diose? ¡Yu'un ta me xich' tabel stojolal ti ta yip no'ox o'ntonal ta xich' pasele!

⁴²Mu xajelavic ech'el. Yu'un mu'yuc sva'anoj sba ti Dios ta atojolique. Ta xastsaloxuc ti avajcontraique.

⁴³Ti li' xjelav ech'ele, malabil ta xac'otic yu'un ti amalecitaetique xchi'uc ti cananeoetique. Ta xastsacoxuc ta leto. Ta xasmiloxuc. Yu'un ti vo'oxuque laj xa atenic comel ti Diose. Jech ti stuque mu'yuc xa oy ta atojolic.

⁴⁴Manchuc mi jech laj ya'iic ti stuquic ti va'i s'elan taje, sjunul yo'ntonic ochic batel ta stoyolal vitstic. Ja' no'ox un, ti xcaxail ti trate yu'un ti Diose, xchi'uc ti Moisese, mu'yuc stotsic loq'uel ti bu lamalic ta nacleje.

⁴⁵Ava'i un, loq'uic talel ti amalecitaetique xchi'uc ti cananeoetic ti oyic ta naclej ti bu taje. Nutsbil ech'el ti israeletic c'alal to Horma, ti tsalbil c'otic ta jyalel ti bu taje.