Read Tzotzil Números 16 Bible Online

Números 16 - Tzotzil bible

Números 16

¹Oy jun levita vinic, snitilul ti Coate, ti sbiinoj Coré xnich'on ti Izharee, co'ol c'ot yuni jolic xchi'uc oxvo' viniquetic ti liquelic ta jvoc' snitilul ti Rubene, ti Datane, ti Abirame ti ja' xnich'nab ti Eliabe, xchi'uc ti On ti ja' xnich'on ti Pelete.

²Jmoj lic spay sc'opic ta scontrainel ti Moisés xchi'uc ti lajuneb yoxlajunvinic (250) ta vo' israeletic ti yich'ojic yabtelic yu'un ti jteclume, ti ja' jvolvanejetic ta ya'ibel ye sti'ic ti c'usi sc'an pasele, xchi'uc ti ojtiquinbilic leque.

³Scotolic ti va'i yepal taje laj svol sbaic batel ta stsaquel ta c'op ti Moisese xchi'uc ti Aarone, ti xi laj yalbeique: —¡Li' xa no'ox c'alaluc lajuc sc'oplal ti ich'biloxuc ta muq'ue! Yu'un scotol jteclum t'ujbil ono'ox yu'un ti Diose. Oy ta jtojol jcotoltic ti Diose. ¿C'u cha'al ya'yel un cha'e ti co'ol to s'elan banquilal ajvalil xava'i abaic ta stojol ti xnich'nab Diose?

⁴C'alal jech laj ya'i ti Moisés ti va'i s'elan taje, snupilan xa banomil laj spatan sba ta lum.

⁵Va'i un, xi laj yalbe ya'i ti Coree xchi'uc ti c'u yepal vololic batel ti xchi'iltaque: —Sob oc'om, ta xac' ta na'el ti Dios buch'u ti yu'untaque, ti buch'u ti t'ujbil yu'une, ti xu' ta xac'beic ti matanale. Ja' no'ox xu' ta xaq'uic matanal ti buch'u t'ujbilic ta xc'ot yu'une.

⁶Xi s'elan ti xcholet sc'an xapasique: Ich'beic talel yavil xchic'obil spom ti Coree xchi'uc ti xchi'iltaque.

⁷Va'i un, tic'beic yac'alil. Ac'beic pom. Aq'uic ta stojol Dios ti sob oc'ome. Ti buch'u t'ujbil ta xc'ot yu'un ti Diose, ja' ti buch'u ta stunesate. ¡Ts'ij chianic ca'itic, levitaetic!

⁸Laj taj une, ti Moisese xi laj yalbe ti Coree: —A'yio ava'iic lec ti xi ta xcale, levitaetic:

⁹¿Mi yu'un jutuc xa no'ox sc'oplal ta xava'iic ti laj st'ujoxuc loq'uel ti Dios ta stojol ti jteclum yu'un Israele, ti nabaloxuc ta stojol ti ta xatunic ta abtel ta Axibalna yu'un ti Diose, ti ta xatunic yu'un ti jteclume?

¹⁰Ti Diose loc' ayan ta yo'nton ti ta sc'an ti nopol oyot ta stojole xchi'uc ti jvoc' achi'iltac levitaetique. ¿C'u cha'al ya'yel avi tana le' une ti juteb ta avo'nton ta xa'och ava'i ta paleale?

¹¹¿Buch'u la avalojic ta melel ti chopol ta xac'opojic ta stojol ti Aarone? Yu'un ti vo'ote xchi'uc ti achi'iltaque ta xatoy abaic ta stojol ti Diose.

¹²Laj taj une, ti Moisese laj stac ta iq'uel ti Datane, xchi'uc ti Abiram ti ja' xnich'nab ti Eliabe. C'u stu un, ti stuquique xi laj staq'uique: —Laj to c'op ma' ti ta xibatcutic une.

¹³¿Mi yu'un ch'am xi no'ox la sc'oplal avaloj ti laj aloq'uesuncutic talel ta jun jteclum ti bu co'ol s'elan vo' ta xbein ti chu' vacaxe, ti ajapome, ti c'alal c'ajomal no'ox tal avac' chamcuncutic ta sbajtical banomile? Ma'uc no'ox taj xtoque, yu'un ta xabis aba ava'i ta jun banquilal ajvalil ta jtojolcutique.

¹⁴Yu'un ti vo'ote ma'uc ta xavic'uncutic ech'el ta jun lum ti bu co'ol s'elan vo' ta xbein ti ch'u vacaxe, ti ajapome. Yu'un mi ja'uc ta xavac'buncutic ti osile, ti sts'unubal uvae. ¿Mi yu'un avac'touc xa ti co'oluc s'elan junuc ma'sat ti scotolic xvoletic batel ta apate? Mo'oj un, mu to jc'an jq'uelcutic ma' ti asat une.

¹⁵Va'i un, ti Moisese ep cap sjol ti xi laj yalbe ti Diose: —¡Mu xatsac xavich'be ti matanal ta xaq'uique! Yu'un mi ja'uc jcotuc burro ti laj xa jpojbeique. Mi ja'uc oy c'usi chopol jpasojbeic xtoc ti jujunique.

¹⁶Ts'acal to un, ti Moisese xi laj yalbe ti Coree: —Ti oc'ome, ti vo'ote xchi'uc ti achi'iltaque ta xtal ava'an abaic ta stojol ti Diose. Ta xtal sva'an sba ti Aarón xtoc eque.

¹⁷Jujunic, ac'o yich'ic batel ti yav yac'alique, ac'o yac'beic spomal. Ti vo'ot xchi'uc ti Aarone, ich'ic batel ti yav avac'alique, ti jmoj ta xavaq'uic ta stojol ti Dios xchi'uc ti lajuneb yoxlajunvinic (250) ta vo'e.

¹⁸Va'i un, jujun laj stamic batel ti yav yac'alique. Laj yac'beic yac'alil xchi'uc ti spomale. Jmoj laj sva'an sbaic ta cholej ta sti' ochebal Axibalna xchi'uc ti Moisese, ti Aarone.

¹⁹Va'i un, yo' jech contrainbil ta xc'otique, ti Coree laj stsob batel scotol ti jteclum ta sti' ti Axibalna ti bu nupel ta bee. Ja'uc le' une, vinaj talel yutsilal slequilal ti Dios ta sba ta sat scotol ti israeletique.

²⁰Ja' yu'un un, ti Diose xi laj yalbe ti Moisese xchi'uc ti Aarone:

²¹—¡Q'uejo abaic loq'uel ta stojol ti jteclum li'e, yu'un ta jliquel no'ox ta jtsutsesbeic sc'oplalic!

²²Ja'uc ti stuquic une snupilanic xa banomil laj spatan sbaic ta lumtic ti xi laj yalique: —Ti vo'ote avac'ojbe xcuxlejal scotol ti jnaclejetique, Ch'ul Dios, ¿mi ta xavilta scotol ti jteclum ta scoj no'ox smul ti jun vinique?

²³Xi tac'bat ti Moisés yu'un ti Diose:

²⁴—Albo ya'iic scotol ti israeletique ti ac'o sq'uej sbaic loq'uel ti bu lamalic ta naclej ti Coree, ti Datane, xchi'uc ti Abirame.

²⁵Va'i un, ti Moisese va'i batel, ti tijlibil batel ti moletic yu'un ti israeletique. Batic ti bu oy ti Datane xchi'uc ti Abirame.

²⁶Ja' yu'un un, xi laj yalbe ya'i ti jteclume: —Q'uejo abaic loq'uel ti bu lamalic ta naclej ti chopol viniquetic le'e. Mi ja'uc xatsacbeic ti c'usi x'ayan yu'unique, naca mi chamanic ta scoj ti smulique.

²⁷Jech ti jteclume laj sq'uej sbaic loq'uel ti bu oy ti Coree, ti Datane xchi'uc ti Abirame. Ja'uc ti Datane xchi'uc ti Abirame, oyic ta ochebal sti' snaic xchi'uc ti yajnilique, ti xnich'nabique.

²⁸Va'i un, ti Moises xi lic yalolane: —Ti jech le'e, ta xcac' avilic ti ja' tacbilun talel yu'un ti Dios ta yaq'uel avilic ti c'usi ta xc'ot ta pasele, ti mu ja'uc jutebuc loq'uem ayanem ta co'nton jtuque.

²⁹Ti viniquetic li'e, mi ta xchamic ta lequil chamel jech c'u cha'al ta xchamic scotolique, ja' svinajeb unbi ti ma'uc tacbilun talel yu'un ti Diose.

³⁰Yan ti mi oy c'usi ch'ayal ta xc'ot o'ntonal yu'un ti Dios ta spas ti ta sjav sba ech'el ti banomil yu'une, ti ta xbajic ochel xchi'uc scotol ti c'usi x'ayan yu'unique, ti cuxul ta xc'otic ti bu c'alal spajeb ti snatile, ja' to jech ta xana'ic, ti viniquetic li'e ja'ic laj sjipic laj stenic comel ti Diose.

³¹C'alal laj yo'nton ta c'opojel ti Moisese, jav ech'el ti banomil ta yolonique.

³²Va'i un, scotol ti viniquetic ti svoloj sbaic xchi'uc ti Coree, bajic yalel xchi'uc ti yalab xnich'nabique, xchi'uc ti c'usi x'ayan yu'unique.

³³Cuxajtic c'otic ti bu to c'alal spajeb snatil javem yalel ti banomile, xchi'uc scotol ti c'usi x'ayan yu'unique. Ts'acal to un, lic syub sba talel ti banomile. Ja' jech ch'ay tub sc'oplalic ta stojol ti israeletique.

³⁴C'alal laj ya'iic ti x'avlajetic xae, scotol ti israeletic ti vololic ta joyobe, xvilic xa loq'uel ta anil ti xi ta xalbe sbaique: “¡Ati xijyal la ec ta sjavemal ti banomile!”

³⁵Ma'uc no'ox taje, yu'un ti Diose tal yu'un c'oc' ti laj smil ta j'ech'el ti lajuneb yoxlajunvinic (250) ta vo' viniquetic ti laj yaq'uic ti pome.

³⁶Jech o xal ti Diose xi laj yalbe ti Moisés ti laj sc'opon talele:

³⁷“Albo mantal ti Eleazare, xnich'on ti Aarone, ti ac'o stam loq'uel talel ti yav ac'ale. Ja'uc ti bu com scomelal ti ac'al tile, ac'o sjip ech'el ta nom.

³⁸Yu'un ti yav yac'alic ti viniquetic ti buch'utic chamic ta scoj ti laj sta ti smulique, yu'un c'otem ta tunel ta sventa ti tun ta yac'obil pom ta jtojole. Ja' yu'un cha'e, joybinic ta jun pech-pech taq'uin taje yo' jech ta xc'ot ta xcha'lam smac ti altare, ti ta xc'ot ta scaj-sbijubtaselic ti israeletique.”

³⁹Ti pale Eleazare laj stam ti c'anal taq'uin yav ac'al ti laj yaq'uic ti viniquetic ti chamic ta c'oc' yu'un ti yav ac'ale. Laj yal mantal ti ac'o xpech-c'unic ta stunel ta xcha'lamal smac ti altare.

⁴⁰Ti va'i s'elan taje, ja' c'ot ta scaj-sbijubtaselic ti israeletic ti mu'yuc buch'u junucal xu' ta xnopajic ta yaq'uel pom ta altar ta stojol ti Dios ti mi ma'uc snitilultac ti Aarone. Yan mi mo'oje, jech ta xc'ot ta stojolic jech c'u cha'al ti Coree xchi'uc ti xchi'iltaque. Scotol jech c'ot ta pasel jech c'u cha'al albat mantal ti Eleazar yu'un ti Dios ta sventa ti Moisese.

⁴¹Ta yoc'omal une, scotol ti jteclum Israele xi lic chopol c'opojicuc ta stojol ti Moisese xchi'uc ti Aarone: —¡Ti vo'oxuque yacal ta xamilic steclumaltac ti Diose!

⁴²Yu'un scotolic xtoc xjoyetic ta joyob ta stojol ti Moisese xchi'uc ta stojol ti Aarone. Ja'uc ti stuquique batic ta Axibalna ti bu nupel ta bee. Ti jech taj une, ta yorail no'ox ta anil, tal voliatuc ta toc, vinaj yutsilal slequilal ti Diose.

⁴³Va'i un, ti Moisese xchi'uc ti Aarone batic ta sti' ti ochebal Axibalna ti bu nupel ta bee.

⁴⁴Ja' yu'un un, ti Diose xi laj yalbe ti Moisese:

⁴⁵—¡Q'uejo abaic loq'uel ta stojol ti jnaclejetic li'e, yu'un ta jliquel no'ox ta jtsutsesbe sc'oplalic! Jech ti Moisese xchi'uc ti Aarone snupilan xa banomil laj spatan sbaic ta lumtic.

⁴⁶Va'i un, ti Moisese xi laj yalbe ya'i ti Aarone: —Tsaco talel ti yav avac'ale. Ac'bo yac'alil ti oy ta altare. Ac'bo spomal. Yu'un batan ta anil ti bu volol ti jteclume. C'anbo Dios ti ch'aybatuc ti smul scolo'ique. Yu'un til xa ti sc'ac'al yo'nton Diose. Yu'un ti c'usi chopol ta xc'ot ta pasele, yu'un yacal xa.

⁴⁷Jech laj spas ti Aarone jech c'u cha'al albat yu'un ti Moisese. Yu'un bat ta anil ti bu vololic ti jteclume. Ti vocol ti tacbil talel yu'un ti Diose, yacal xa ta spas yabtel ta stojol ti jteclume. Va'i un, ti Aarone laj stic'be spomal ti yav yac'ale. Laj sc'anbe Dios ti ac'o xch'aybe smul ti jteclume.

⁴⁸Laj taj une, lic stic' sba ochel ta o'lol yu'unic ti buch'u chamemic xae xchi'uc ti cuxulic to ti jnaclejetique. Ja'uc ti yacal ta spas yabtel ti c'usi chopol ta xc'ot ta pasele, lic pajuc.

⁴⁹Ti jech taj une, chamem xa ox yu'un chanlajunmil xchi'uc vucub ciento (14,700) ta vo' ti jnaclejetique. Ja' slecoj xtoc ti laj chamuc ba'yel ti c'alal liquem sjolic ta contrainvanej ti Coree.

⁵⁰C'alal ech' ti c'usi chopol c'ot ta pasele, ja'uc ti Aarone sut ech'el ta ochebal sti' ti Axibalnae yo' ta xchi'in sba xchi'uc ti Moisese.