Read Tzotzil Números 17 Bible Online

Números 17 - Tzotzil bible

Números 17

¹Ti Diose xi laj yalbe ti Moisés ti c'alal laj sc'opon talele:

²“Albo mantal ti israeletique ti ac'o yich'ic talel jujun namte'il yu'unic ti banquilaletic yu'un ti jujuvoq'ue, ti ta xc'ot ta lajcheb namte'il ta scotole. Ti vo'ote ta xats'ibabe sbiic ta namte'il ta jujun yu'unique.

³Ja'uc ti namte'il ti ta xc'ot yu'unic ti jvoc' snitilultac ti Levie, ja' xatsacbe sbi ti Aarone. Yu'un tsots sc'oplal ti oyuc namte'il yu'unic ti jujun banquilaletic yu'un ti jujuvoq'ue.

⁴Ta xatic' ochel ta Axibalna ti bu nupel ta be ta yeloval xcaxail ti tratee, ja' ti bu ta xcac' jba iluc ta atojolique.

⁵Yu'un ta xc'ot ta pasel cu'un ti ta xcac' q'uelomajuc snamte' ti buch'u t'ujbil cu'une. Ja' to jech ta xicta sbaic ta chopol c'opojel ta atojol ti israeletique.”

⁶Ti va'i s'elan taje, jech ono'ox laj yal ti Moisés ta stojol ti israeletique. Jech laj yac'be jujun snamte'ic ti banquilaletic yu'unic ti jujuvoq'ue, ti c'ot ta tsobel ta lajcheb (12) namte'il ta scotole. Ta scotol ti va'i yepal taje, tey oy xtoc snamte' ti Aarone.

⁷Jech ti Moisese laj yac' ti namte'iletic ta stojol ti Dios ta Axibalna yu'un ti tratee.

⁸Ta yoc'omal un, c'alal bat ta ch'ulnae, laj yil ti q'uelomajem xa snamte' ti Aarone, ti ja' c'otem ta yu'unic ti jvoc' snitilul ti levitaetique, yu'un q'uelomaj xa. Yac'oj xa xnich. Toc'onic xa sat ti almendroe.

⁹Va'i un, ti Moisese laj stam loq'uel talel ta sba ta sat Dios scotol ti namte'iletique. Laj yac'be yil ti israeletique. C'alal laj sq'uelique, ta jujun laj stamic ech'el ti snamte'ique.

¹⁰Va'i un, ti Moisese xi albat yu'un ti Diose: “Bat ac'o yan velta ta xcaxail yu'un trate snamte' ti Aarone. Q'uejo ti bu taje, ti ja' ta xtun ta sventa sbijubtaselic ti toyobba jteclume. Ti jech taj une, ja' to ta xicta sbaic ta xchopol c'optaelun, mi ja'uc ta xchamic.”

¹¹Ti Moisese jech laj spas scotol jech c'u cha'al albat mantal yu'un ti Diose.

¹²Ja'uc ti israeletic une, xi laj yalbeic ti Moisese: “¡Mu ono'ox cha'bel un, yu'un ch'ayemuncutic ta be, yu'un jcotolcutic ta xichamcutic!

¹³Yu'un scotolic ti buch'u ta xnopajic ech'el ta xch'ulna ti Diose, ta xchamic. ¿Mi yu'un ta xc'ot ta pasel ti ta xijchamotic jcotoltique?”