Read Tzotzil Números 18 Bible Online

Números 18 - Tzotzil bible

Números 18

¹Ti Diose xi laj yalbe ti Aarone: “Ti vo'ot xchi'uc ti anich'nabe, jmoj xchi'uc ti jvoc' nitilulil yu'un ti Levi ti ja' ats'unubaltaque, mi oy c'usi mu lecuc ta xc'ot ta ch'ulnae, cajal me ta xc'ot ta abaic. Yu'un ja' no'ox vo'ot xchi'uc ti anich'nabe, cajal ta xc'ot ta aba mi oy c'usi mu lecuc ta xc'ot ta pasel yu'un ti avabtelic ti jech ochemoxuc ta paleale.

²Yu'un c'otuc ta pasel avu'un ti ac'o xa scoltaot ta abtel xchi'uc anich'nabe ti jvoc' snitilul ti Levi ti ja' ats'unubaltac ti c'usi sc'an pasel ta stojol ti Axibalna yu'un ti tratee.

³Yu'un ti stuquique ta xc'otic ta avajtuneltac, ti ta xtunic ta Axibalnae. Ja' no'ox un, mu me xnopajic ech'el ta sts'el ti c'usitic oy ta Axibalnae, ti ta stojol ti altare. Yu'un mi mu jechuque, xu' ta xchamic xchi'uc ta xachamic ec.

⁴Xu' xaschi'inot ti c'usitic tsots sc'oplal sc'an spasel ta Axibalna ti bu nupel ta bee, xchi'uc scotol ti c'usi jujutos sc'an pasele. Ja' no'ox un, mu me xu' xaschi'inoxuc yan ti mi mu'yuc yich'oj yabtelique.

⁵Yu'un vo'oxuc abainojic ta spasel ti abtel ti c'usi sc'an pasel ta ch'ul cuartoe xchi'uc ti ta altare. Ti mi jech taj une, mu xa soc jol xchi'uc ti israeletic yan veltae.

⁶Yu'un vu'un ta jt'uj loq'uel ti avinquileltac levitaetic ta stojol ti yan israeletique yo' jech ta xc'ot ta avajtuneltac ti c'usi sc'an pasel yu'un ti Axibalna ti bu nupel ta bee.

⁷Ja'uc ti c'usi sc'an pasel ta stojol ti altare, xchi'uc ti c'usi sc'an ta spat ti bu lich'il ti muc' ta poc' ta sventa ti paleale, ja' me avabtelic ta xapasic xchi'uc ti anich'nabe. Taje, ja' avabtelic ta sbainel. Yu'un c'ot ta nopel cu'un ti ta xa'abtejic ta paleale. Mi oy buch'u ta x'abtej ta paleal s'elan ti c'alal ma'uc yabtele, chapal sc'oplal ta xich' milel.”

⁸Ti Diose xi laj yalbe ya'i ti Aarone: “Yu'un ta xc'ot ta pasel cu'un ti ta xcac'bot abain ta stuc'ulanel ti matanaletic ti ta xi'ac'bate. Yu'un scotol matanaletic ti c'ot ta t'ujel yu'un ti israeletic ti c'ot ta nopel yu'unic ti ta xac'beicune, ja' ta xc'ot ta avu'un ec xchi'uc ti anich'nabe, ti ja' jun mantal bejel ta xcom ta sbatel osile.

⁹Yu'un ti matanaletic ti oy sc'oplal ta xich' svocol ta chiq'uele, oy jch'ac ta xc'ot ta avu'un. Ja' avu'un scotol ti matanal sat ts'unubaletique, ti yan matanaletic ti ta xich' svocol ta scoj ti mulile, mi ja' ti colo'il ti ta xaq'uic ti israeletique. Scotol ti matanaletic taje, ja' ta xc'ot ta avu'un ec xchi'uc ti anich'nabe.

¹⁰Scotol ti viniquetic ti oy ta atojolique, xu' ta sti'ic ti matanaletic taje, ti tsots sc'oplal ta xich' ti'el ti bu tuc'ulanbil leque, yu'un ja' jun matanal ti ac'bil xa jelavel ta ventainele.

¹¹“Ja' jech xtoc ti matanaletic ti jelavem stunel ta j'ech'el ti laj yac'beicun ti israeletique, ta xcac'bot avich' xchi'uc ti avalab anich'nab ti oy ta atojole. Taje, bejel ta xcom o ta jbel ti c'usi tsots albile. Buch'uuc no'ox ti avuts' avalal ti mu'yuc soquesoj sbaic xchi'uc jtosuc ti albil sc'oplal ti mu staq'ue, xu' ta sti'ic ec.

¹²Ja' jech xtoc ta xcac'bot avich' ti sba sat ts'unubil ti xi s'elan sc'oplal ta xiyac'beic jujun jabil ti israeletique, ja' ti lequil t'ujbil aceitee, ti lequil t'ujbil vinoe, xchi'uc ti lequil t'ujbil trigoe.

¹³Ja' jech xtoc ti sba sat te'etic ti c'usi stac' lo'el ti ta xiyac'beicune, ja' ta xc'ot ta avu'un ec. Buch'uuc no'ox ti avuts' avalal ti mu'yuc soquesoj sbaic xchi'uc jtosuc ti albil sc'oplal ti mu staq'ue, xu' ta stun slajes ec.

¹⁴Scotol ti matanal ti c'ot ta t'ujel yu'un ti israeletic ti oy sc'oplal ta xiyac'beicune, ja' ta xc'ot ta avu'un ec.

¹⁵“Scotol sba xnich'nab ti israeletique, mi ja' ti sba yoltac ti xchon sbolomic ti oy sc'oplal ta xiyac'beique, ta xc'ot ta aventa. Ja' no'ox un, ti sba xnich'nab ti viniquetique, yan xa sc'oplal c'u s'elan ta chapel unbi, yu'un tsots sc'oplal ta stoj comel spojel scolelic ti ja' xc'ot ta q'uexolil yu'unique. Jech ti sba yoltac ti yan chon bolom ti albil sc'oplal ti mu stac' lajesele, yu'un ja' no'ox ta xac'anbe yan xq'uexol ti ac'o yac'bote.

¹⁶Ti xq'uexolil ti ta stojic comele, ja' o ti c'alal ech'em xa ox jun u svoq'uele, ta xaq'uic vo'sep plata taq'uin, ja' ti c'u s'elan liquem sbisel yu'unic ta ch'ulnae, ti yich'oj buluchib (11) gramo ti yalale.

¹⁷Yan ti mi ja' ta xac'beic comel yan xq'uexol sba yoltac ti me' vacaxe, ti me' chije, ti me' tentsune, mu xavac' ave ati' yu'un. Taje, yu'un ja' c'otemic ta cu'untac. Tsots sc'oplal ta xamil. Ti xch'ich'ele, ta xamal ta sba altar. Ja'uc ti xepu'ale, ta xachic' ta jun smuil matanal ti ta xc'ot ta jtojole.

¹⁸Ja'uc ti sbec'tale, ti xpechel sti' yo'nton ti chon bolom ti tsots sc'oplal c'ot ta matanale, jech c'u cha'al ti sbec'tal yo'e, ja' ta xc'ot ta avu'un.

¹⁹Yu'un scotol matanaletic ti ye'bil laj yich' aq'uel ti laj st'ujbeicun ti israeletique, ta xc'ot ta avu'un ec xchi'uc ti anich'nabe, xchi'uc ti avantsiquil nich'nab ti achi'ucanoj ta nacleje. Taje, ta xc'ot ta jbel c'usi tsots albil ti bejel ta xcom ta j'ech'ele. Ja' jun trate ta xc'ot ta atojolic xchi'uc ti anitilultac ti mu stac' jelel sbatel osil ta j'ech'ele.”

²⁰Ti Diose xi laj yalbe ti Aarone: “Ti vo'ote, Aarón, c'ajomal no'ox vu'un avosilun, abanomilun, yu'un ch'abal ti avosil abanomil ta xac'ote. Ja'uc ti yan israeletique, oy yosil sbanomilic une'.

²¹Ti jvoc' levitaetique, ja' xc'ot ta xrextoic cu'un ti c'usitic xloc' x'ayan yu'unic ti israeletic ti tsots sc'oplal ta xaq'uic ti jun ta jujun lajunebe, ti ja' xc'ot ta stojolic ti buch'utic ta xac' sbaic ta tunel ta Axibalna ti bu nupel ta bee.

²²Ja'uc ti yan israeletique mu stac' xnopajic ech'el ti ta Axibalnae. Yu'un xu' sta smulic ti ta xchamic o xchi'uquique.

²³Yu'un c'ajomal no'ox xu' ta xtunic ti levitaetic ta abtel ta Axibalnae. Jech xtoc cajal ta xc'ot ta sbaic ti bu mu lecuc ta xbat yu'unique. Taje, ta xc'ot yu'unic ta jbel c'usi tsots albil ti bejel ta xcom o ta stojol ti totil me'ile, xchi'uc ti alab nich'nabe. Ti levitaetic une mu'yuc yosil sbanomilic ta stojol ti israeletique.

²⁴Yu'un ti stuquique, ja' ta xc'ot ta xrextoic cu'un ti jujun ta jujun lajlajuneb ti matanal ti tsots sc'oplal ta xac'beicun ti israeletic ti c'usi ta xloc' x'ayan yu'unique. Jech o xal laj calbeic ya'iic ti ch'abal ta xc'ot yosil sbanomilic ta stojol ti israeletique.”

²⁵Yu'un ti Diose xi laj yalbe ti Moisés ti c'alal laj sc'opon talele:

²⁶“Albo ya'i ti levitaetic ti c'alal ta xich'ic ti jun ta jujun lajlajuneb ti ta x'ac'batic yu'un ti israeletic ti c'usi ta xloc' yu'unic ti ja' ta xc'ot ta xrextoique, tsots sc'oplal ac'o xch'aquic loq'uel jbusuc ti ta lajunch'ac yo' ta xiyac'beicune.

²⁷Ti jech ta xaq'uic ti patan taje, ja' co'ol jech c'u cha'al ti israeletic ta xaq'uic o'lol jvoc'uc ti sat strigoique, mi ja' ti vinoe.

²⁸Ti jech ta xaq'uic ta jujun lajlajuneb ti israeletique, jech ti levitaetique ta xch'aquic loq'uel ec ta sventa ti Diose, ti ta xac'beic yich' ti pale Aarone.

²⁹Yu'un scotol ti c'usi ta x'ac'batique, tsots sc'oplal ac'o xch'aquic loq'uel j'o'loluc ti ta xc'ot ta jtojole. Ti j'o'lol ti c'ot ta nopel yu'unic ti ta xiyac'beique, ja' me ti x'ech' to slequil ta scotole.

³⁰“Xi xavalbe ya'iic xtoque: ‘Mi c'ot ta nopel yu'unic ti laj xa xch'aquic loq'uel ti ta xc'ot ta cu'une, jech ti scomelale, xu' xa ta xanopic ti ja' xa atrigoique, avinoique.

³¹Va'i un, ti bu xal avo'ntonic xave'ique, ve'anic xchi'uc ti avalab anich'nabique. Yu'un ja' stojol avabtelic ti jech ta xatunic ta Axibalna ti bu nupel ta bee.

³²Yu'un mi c'ot ta nopel avu'unic ti laj ach'aquic loq'uel ti bu x'ech' to slequil ti ja' ta xc'ot ta cu'une, jech ti scomelale, xu' xave'ic ti mu ja'uc xa ta amulique. Yu'un ti va'i s'elan taje, mi ja'uc ta xasoquesic ti t'ujbil matanaletic ti laj yaq'uic ti israeletique. Mi ja'uc xtoc ti oy ac'oplalic ta xavich'ic milele.’ ”