Read Tzotzil Números 2 Bible Online

Números 2 - Tzotzil bible

Números 2

¹Ti Diose xi laj yalbe ti Moisese xchi'uc ti Aarone ti c'alal laj sc'opon talele:

²“Ti israeletique, tsots sc'oplal sc'an ti nom nomtic ta sjoy sbaic ta naclej ti bu ta sbejanic ti Axibalna ti bu nupel ta bee, yu'un vololic ta jujuchop ta yolon ti bu pajal ti sbanderaique, ti xvinajic lec ta q'uelel buch'uic ti jujuvoq'ue.

³“Ta yeloval sloq'ueb c'ac'al, ja' tey ta svol sbaic ti jvoc' ti sts'acliojic ta xanobal sbandera ti Judae. Ti jvoc' ti ja' snitilultac ti Judae, ti ja' banquilal yu'unic ti Naasone, xnich'on ti Aminadabe,

⁴loc' ta chapel ti chanlajuneb xchanvinic ta mil xchi'uc vaquib ciento (74,600) ta vo' viniquetic ti c'alal laj yich' tsaquel ti biile.

⁵Ti ta svol sbaic ta sts'elic xtoque, ja' ti jvoc' snitilultac ti Isacare, ti ja' banquilal yu'unic ti Natanaele, xnich'on ti Zuare,

⁶ti loc' ta chapel chanlajuneb yoxvinic ta mil xchi'uc chanib ciento (54,400) ta vo' viniquetic ti c'alal laj yich' tsaquel ti biile.

⁷Ja' jech xtoc nopol ta xchi'in sbaic ta volej xchi'uc ti jvoc' ti ja' snitilultac ti Zabulone, ti ja' banquilal yu'unic ti Eliabe, xnich'on ti Helone,

⁸ti loc' ta chapel vuclajuneb yoxvinic ta mil xchi'uc chanib ciento (57,400) ta vo' viniquetic ti c'alal laj yich' tsaquel ti biile.

⁹Ti jech taj une, ta xc'ot ta oxvoc' yu'un ti Judae, ti ja' vaquib slajunvinic ta mil xchi'uc chanib ciento (186,400) ta vo' viniquetic ti loc' ta chapel ta scotole, ti ja' jba'be ta xanav ech'el yu'unic ti israeletique.

¹⁰“Ta yolon ti yac'ol xocon sloq'ueb c'ac'ale, laj svol sbaic ta naclej ti jvoc' ti sts'acliojic ta xanobal sbandera ti Rubene. Ti jvoc' ti ja' snitilultac ti Rubene, ti ja' banquilal yu'unic ti Elisure, xnich'on ti Sedeure,

¹¹loc' ta chapel vaquib yoxvinic ta mil xchi'uc vo'ob ciento (46,500) ta vo' viniquetic ti c'alal laj yich' tsaquel ti biile.

¹²Ti ta svol sbaic ta sts'elic xtoque, ja' ti jvoc' ti ja' snitilultac ti Simeone, ti ja' banquilal yu'unic ti Selumiele, xnich'on ti Zurisadaie,

¹³ti loc' ta chapel balunlajuneb yoxvinic ta mil xchi'uc vo'lajunvinic (59,300) ta vo' viniquetic ti c'alal laj yich' tsaquel ti biile.

¹⁴Ti ta svol sbaic ta sts'elic xtoque, ja' ti jvoc' ti ja' snitilultac ti Gade, ti ja' banquilal yu'unic ti Eliasafe, xnich'on ti Reuele,

¹⁵ti loc' ta chapel vo'ob yoxvinic ta mil xchi'uc o'lol yucubal ciento (45,650) ta vo' viniquetic ti c'alal laj yich' tsaquel ti biile.

¹⁶Ti jech taj une, ta xc'ot ta oxvoc' yu'un ti Rubene, ti ja' buluchib xvaxacvinic ta mil xchi'uc o'lol yo'obal ciento (151,450) ta vo' viniquetic ti loc' ta chapel ta scotole, ti ja' xa xcha'voc'al ti xvoletic batel ta patile.

¹⁷“Ja'uc ti levitaetic une volibilic ech'el ta xanobal ta chanvoc' ti xcuchojic batel ti Axibalna ti bu nupel ta bee. Jech ti chanvoq'uique, lec svoc'ol voc'ol ta xanavic batel ta be jech c'u cha'al svoc'ol voc'ol ti lamalic ta naclej ti bu pajal ti sbanderaique.

¹⁸“Ta yeloval ti smaleb c'ac'ale, ja' ta svol sbaic ta naclej ti jvoc' ti xvoletic ti bu lich'il sbandera ti Efraine, ti ja' banquilal yu'unic ti Elisamae, xnich'on ti Amiude,

¹⁹ti loc' ta chapel cha'vinic ta mil xchi'uc vo'ob ciento (40,500) ta vo' viniquetic ta scotolic ti laj yich' tsaquel ti biile.

²⁰Ti ta svol sbaic ta sts'elic xtoque, ja' ta svol sbaic ta naclej ti jvoc' ti ja' snitilultac ti Manasese, ti ja' banquilal yu'unic ti Gamaliele, xnich'on ti Pedasure,

²¹ti loc' ta chapel lajcheb xcha'vinic ta mil xchi'uc lajunvinic (32,200) ta vo' viniquetic ti c'alal laj yich' tsaquel ti biile.

²²Ti ta svol sbaic ta naclej ta sts'elic xtoque, ja' ti jvoc' snitilultac ti Benjamine, ti ja' banquilal yu'unic ti Abidane, xnich'on ti Guidonie,

²³ti loc' ta chapel vo'lajuneb xcha'vinic ta mil xchi'uc chanib ciento (35,400) ta vo' viniquetic ti c'alal laj yich' tsaquel ti biile.

²⁴Ti jech taj une, ta xc'ot ta oxvoc' yu'un ti Efraine, ti ja' vaxaquib svacvinic ta mil xchi'uc vo'vinic (108,100) ta vo' viniquetic ti loc' ta chapel ta scotole, ti ja' xa yoxvoc'al ta vo' xvoletic batel ta xanvil ta patile.

²⁵“Ta yolon ti yolon xocon sloq'ueb c'ac'ale, ja' ta svol sbaic ta naclej ti jvoc' ti xvoletic ti bu lich'il sbandera ti Dane. Ti jvoc' ti ja' snitilultac ti Dane, ti ja' banquilal yu'unic ti Ahiezere, xnich'on ti Amisadaie,

²⁶loc' ta chapel chib xchanvinic ta mil xchi'uc vucub ciento (62,700) ta vo' viniquetic ti c'alal laj yich' tsaquel ti biile.

²⁷Ti ta svol sbaic ta sts'elic xtoque, ta svol sbaic ta naclej ti jvoc' ti ja' snitilultac ti Asere, ti ja' banquilal yu'unic ti Pagiele, xnich'on ti Ocrane,

²⁸ti loc' ta chapel jun yoxvinic ta mil xchi'uc vo'ob ciento (41,500) ta vo' viniquetic ti c'alal laj yich' tsaquel ti biile.

²⁹Ti ta svol sbaic ta sts'elic xtoque, ta svol sbaic ta naclej ti jvoc' ti ja' snitilultac ti Neftalie, ti ja' banquilal yu'unic ti Ahirae, xnich'on ti Enane,

³⁰ti loc' ta chapel oxlajuneb yoxvinic ta mil xchi'uc chanib ciento (53,400) ta vo' viniquetic ti c'alal laj yich' tsaquel ti biile.

³¹Ti jech taj une, ta xc'ot ta oxvoc' soldadoetic yu'un ti Dane, ti ja' vucub xvaxacvinic ta mil xchi'uc vaquib ciento (157,600) ta vo' viniquetic ti loc' ta chapel ta scotole, ti smacojic batel ta xanvil ta spat ti sbanderaique.”

³²Ti tsacob-biil ti ech' ta stojol ti yalab xnich'nabic ti israeletique, ti ja' sc'oplal ti epal jnaclejetique, loc' ta chapel ta scotol oxib yucubal ciento ta mil xchi'uc o'lol svaquibal ciento (603,550) ta vo' viniquetic.

³³Ti jech laj spas ti Moisés jech c'u cha'al albat yu'un ti Diose, mi ja'uc laj stsaquic ta atel ti levitaetique.

³⁴Ti israeletique jech laj spasic scotol jech c'u cha'al ti xi s'elan albat mantal yu'un Dios ti Moisese. Yu'un ta jujuvoc' laj slaman sbaic ta naclej ti vololic ti bu oy ti sbanderaique, xchi'uc ta jmoj xcholetic batel ta xanobal ta jujuchop ti totil me'il yu'unique.