Read Tzotzil Números 21 Bible Online

Números 21 - Tzotzil bible

Números 21

¹Ti cananeo ajvalil yu'un ti jteclum Arade, ti nacal ta Négueve, laj ya'ibe sc'oplal ti israeletic ti xvoletic xa talel ta sbelel Atarime. Jech o xal loc' batel ta stsacan ta leto, ti oy jayibuc laj xchuc ech'ele.

²Va'i un, ti israeletique laj yac' yeic ta stojol Dios mi ta xcoltaatic ta stsalel ti muc' ta lume, j'ech'el ta slilinic comel ti jteclumetique.

³Jech ti Diose laj yac' ye sti' ti va'i s'elan c'anbat yu'un ti israeletique. Coltaatic yu'un ta stsalel ti cananeotique. Jech xtoc ti israeletique laj stsutsesic ta j'ech'el ti cananeotique. Yu'un laj slilinbeic ti jteclumetic yu'unique. Jech ti bu taje, laj yac'beic sbi Horma.[5]

⁴Ti israeletique loq'uic batel ta vits Hor. Laj stamic batel ta stuq'uil Tsajal Nab, ti laj sjoy sbeic yo' mu x'ech'ic ta yosilal ti Edome. Ti jech oyic xa ta bee, tub ti smuc'ul yo'ntonic ti jteclume.

⁵Jech o xal un, lic sjolic ta scontrainel ti Diose xchi'uc ti Moisese, ti xi lic yalilanique: —¿C'u cha'al laj aloq'uesuncutic talel ta Egipto? ¿Mi yu'un tal amiluncutic ta sbajtical banomil ya'yel? Yu'un ch'abal xa ti ca'alcutique, mi ja'uc jve'elcutic. ¡Yu'un xtaet xa ta slajesel ta xca'icutic ti ve'lil ti mu'yuc smuile!

⁶Tacbatic talel jti'oval venenoal chon yu'un ti Diose yo' jech ta xlajic ta ti'el yu'un. Ep israeletic chamic.

⁷Va'i un, batic ti bu oy ti Moisese ti xi laj yalbeique: —¡Laj xa jta jmulcutic ti chopol lic'opojcutic ta stojol ti Diose, xchi'uc ti chopol lic'opojcutic ta atojole! ¡C'anbo ti Diose ti ac'o sloq'ues ech'el ti jti'oval chon ta jtojolcutique! Ti Moisese laj sc'anbe ti Diose ti ac'o xch'aybe smul scolo'ic ti israeletique.

⁸Xi albat yu'un ti Diose: —Loc'tao sloc'obbail jcotuc chon jech c'u cha'al ti jti'oval taje. Joc'ano ta junuc te' ti co'oluc s'elan junuc ste'el banderae. C'alal mi oy buch'u ta xlaj ta ti'el ta chone, ac'o sq'uel ech'el sloc'obbail ti chon ti joc'ol ta co'ol s'elan ste'el banderae. Yu'un ja' jech mu xcham xtoc.

⁹Jech ti Moises une laj smeltsan sloc'ol chon ta jun c'anal taq'uin. Laj sjoc'an ta jun te' ti co'ol s'elan ste'el banderae. C'alal oy buch'u ta xlaj ta ti'el yu'un ti chone, ja' ta sq'uel ech'el ti sloc'obbail ti meltsanbil ta c'anal taq'uine, jech ta xcol.

¹⁰Ti israeletique laj stam ech'el sbeic, c'ot slaman sbaic xtoc ta Obote.

¹¹Loq'uic ech'el ti ta Obote, c'ot slaman sbaic xtoc ta sbajtical banomil yu'un Iie-abarim ta yeloval sloq'ueb c'ac'al ti bu oy yosilal ti Moabe.

¹²Loq'uic batel xtoc, c'ot slaman sbaic ta biq'uit uc'um yu'un Zered.

¹³Loq'uic ech'el xtoc, c'ot slaman sbaic ta jot uc'um yu'un Arnón. Ti uc'um taje, oy ta sbajtical banomil ti ech'em yoc ta sbanomil ti amorreoetique, ti c'otem ta ts'ac yu'un ti Moabe xchi'uc ti amorreoetique.

¹⁴Ti va'i s'elan taje, ja' tey lic talel ti bu xi ta xalbe sc'oplal Slibroal Leto yu'un ti Diose: “Li'ech'cutic ta bic'tal uc'umetic xchi'uc ta uc'um Arnón, ti ta x'ech' ta Vaheb ti oy ta Sufae.

¹⁵Li'ech'cutic ta sti'il bic'tal uc'umetic ti ta x'ech' yoc ti bu oy ti Are, ti ta xc'ot c'alal to ta sts'ac ti Moabe.”

¹⁶Loq'uic ech'el ti ta uc'um Arnone, c'otic ta Beer.[6] Ti bu taje, oy jun joc' ti bu xi albat ti Moisés yu'un ti Diose: “Tsobo talel ti jteclume, yu'un ta xcac'beic yuch' vo'.”

¹⁷C'ot ta pasel ti bu taje, ti xi lic q'uejinicuc ti israeletique: “Ta xtuc talel vo' ta joc'. Q'uejinanic yu'un ti joq'ue.

¹⁸Ti banquilaletique ja' laj sjoq'uic xchi'uc ti spasob mantal te' ti oy ta sc'obique; ti ajvaliletic yu'un ti jteclume laj sjots'ic o xchi'uc ti svaxtonique.” Loq'uic ech'el ta sbajtical banomil ti israeletique, c'otic c'alal ta Mataná.

¹⁹Loq'uic ech'el ta Mataná, c'otic c'alal to ta Nahaliel. Loq'uic ech'el ta Nahaliele, c'otic c'alal to ta Bamot.

²⁰Loq'uic ech'el ta Bamote, c'otic c'alal to ta stenlejal ti oy xa ta yosilal ti Moabe, ta yac'ol ech'el ti Pisgae, ti bu xvinaj xa ta q'uelel ech'el ti sbajtical banomile.

²¹Ti israeletique laj staquic ech'el jun chibuc j'al-mantal j'ich'-c'opetic ta stojol ti Sehone, ti ja' ajvalil yu'un ti amorreoetique, ti xi ta xalbeique:

²²“Ac'buncutic ave ati' ti ta xi'ech'cutic ta avosil abanomile. Mi ja'uc ta x'ech' jtec'cutic ti avosilic ti bu ts'unbil ti ats'unubique, xchi'uc ti bu ts'unbil ti a'uvaique. Mi ja'uc ta x'ech xcuch'cutic ti ava'alic ti oy ta joq'uetique. C'ajomal no'ox ta xi'ech' ta abanomil ti tuc' ta jtamcutic ech'el ti bee.”

²³Ja'uc ti Sehón une mu'yuc xac' ech'uc ti ta sbanomile. Yu'un c'ajomal no'ox lic stsob scotol ti svinictaque, ti loc' batel ta snupel ta be ta sbajtical banomil ti israeletique. C'alal c'ot xtoc ta Jahase, laj stsac ta leto.

²⁴Ti israeletique laj spac ti sc'oplalique, tsalbil c'ot yu'unic. Laj yu'ninbeic xtoc ti yosil sbanomile, ti lic ech'el yu'unic ta uc'um Arnone, ti c'ot c'alal to ta uc'um Jaboque. Ti lec ta alele, c'alal to ta sts'ac ti amonitaetic ti bajal lec yu'unique.

²⁵Ja' jech laj spasic. Jech o xal ti israeletique laj yu'ninbeic scotol sbanomilic ti amorreoetique. Ti lec ta alel xcaltique, ja' ti Hesbone xchi'uc ti jteclumetic ti c'u yepal smacoje. Comic ta naclej xtoc.

²⁶Ti Hesbone, ja' ti jteclum ti bu nacal to ox ti Sehone, ja' ti ajvalil yu'un ti amorreoetique. Ti Sehón taje letovajic to ox ta vo'ne xchi'uc ti ajvalil yu'un ti Moabe. Laj yu'ninbe ta spojbel scotol ti sbanomil ti ic'ot c'alal to uc'um Arnone.

²⁷Jech o xal ja' c'ot ta pasel ti xi ta xalic ti viniquetic ti buch'u sna'beic lec yalel ti nichimal c'opetique: “La'ic ta Hesbón, ti ta muc' ta lum yu'un ti ajvalil Sehone. Va'anic ta ach', ac'beic smocal xtoc.

²⁸Yu'un ta Hesbón ti ja' muc' ta lum yu'un ti Sehone, ta xtil talel nich c'oc' ti ta stsutses ti Ar yu'un ti Moabe, xchi'uc ti muc' ta vitstic ti oy ta Arnone.

²⁹Mu xa ono'ox cha'belucot un, Moab. Steclumal dios Quemos, ch'ayemot xa ta j'ech'el, yu'un ti stuque laj xa yac' ye sti' ti xvilic no'ox loq'uel ta jatobal ti avinictac yu'une, ti ta x'och ta c'abal ti avantsilelic yu'un ti Sehone.

³⁰Yu'un lilij xa yip ti Hesbone, lic talel ta Dibón, c'ot c'alal ta Nofah ti soquem com ta j'ech'ele. Yu'un ti c'oc' xtoque c'ot c'alal ta Medeba.”

³¹Ti jech taj une, ti israeletique laj yu'ninbeic sbanomil ti amorreoetique.

³²Ma'uc no'ox taje, yu'un ti Moisese laj stac ech'el jun chibuc viniquetic ta smucul xchajel ta sq'uelel ti jteclum Jazere. Ti israeletique xtoque laj yu'ninic ti jteclumetic ti nopol no'ox oyique, xchi'uc laj xujic loq'uel ti amorreoetic ti nacalic teye.

³³Ts'acal to un, ochic ech'el ti bu stuq'uil ti jteclum Basane. Ja' no'ox un, ti Og ti ja' ajvalil yu'un ti Basane, loc' ech'el xchi'uc scotol ti yajsoldadotac ta stsaquel ta leto ti ta Edreie.

³⁴Va'i un, ti Diose xi laj yalbe ti Moisese: “Mu xaxi' yu'un le'e. Yu'un ta xcac'bot ta avoc ta ac'ob jmoj xchi'uc ti yajsoldadotaque, ti sbanomile. Jech xapasbe jech c'u cha'al laj apasbe ti Sehón ti amorreo ajvalil ti nacal to ox ta Hesbone.”

³⁵Ti jech taj une, ti israeletique laj smilic ti Oge, ti xnich'nabe, xchi'uc scotol ti yajsoldadotaque. Mi junuc cuxul laj yictaic comel. Laj yu'ninbeic ti yosil sbanomile.