Read Tzotzil Números 22 Bible Online

Números 22 - Tzotzil bible

Números 22

¹Ti israeletique laj stam batel sbeic, c'ot slaman sbaic ta stenlejal yu'un Moab ti oy ta sloq'ueb c'ac'al yu'un ti uc'um Jordane, ta yeloval ti Jericoe.

²Ti Balac ti ja' xnich'on ti Zipore, stuc'ulanoj lec ti c'u s'elan laj spasic ti israeletic ta stojol ti amorreoetique.

³Jech xtoc xi'ic ti jnaclejetic ta Moab ti c'alal laj yilic ti mu albajuc yepalic ti israeletique.

⁴Va'i un, ti jnaclejetic ta Moabe xi laj yalbeic ti moletic yu'un ti Madiane: “Scotol ti jteclum le'e, ta jc'utel no'ox ta xu'ninic ti jbanomiltic jech c'u cha'al junuc vacax ti jc'utel no'ox ta xac'be ti yaxal ti oy ta osiltic ti c'alal ta slo'e.” Ti jech yorail ta vo'ne taje, ja' o ochem ta ajvalil yu'un Moab ti Balaque.

⁵Laj stac ta iq'uel ti Balaam xnich'on ti Beore, ti oy ta Petor ta ti' uc'um Eufrates ta jteclum Amave. Ti Balaque laj yalbe mantal ti yajtacbolaltaque ti xi ac'o yalbeic ya'i ti Balaame: “Yu'un ta Egipto to, liquemic talel jteclumetic ti tanijemic talel ta scotol lume. Avi tana xtoc une, li' xa lamalic ta jlumale.

⁶Mu xajalij, la' ta anil no'ox. La' c'anbo slajelic stubelic ti lumetic ta jventae. Yu'un toj ech'em tsotsic ti stuquique, ja' mu sta ti vu'uncutique. Ja' to nan jech tsalbil ta xc'ot cu'un ti ta jnuts loq'uel ta jteclume. Yu'un mi slajelic stubelic ta xac'an, mi xc'uxubinelic ta xac'an, jna' lec ti ta ono'ox xc'ot ta pasel avu'une.”

⁷Ti moletic yu'un ti Moabe xchi'uc ti Madiane xtuchojic batel taq'uin yo' ta stojic ti lajel tubel sc'anique. C'alal c'otic ti bu oy ti Balaame, laj yalbeic ya'i ti c'u s'elan ti a'yej ti ja' yaloj ech'el ti Balaque.

⁸Va'i un, xi albatic yu'un ti Balaame: —Ti ac'ubaltic tana li'e, comanic. Ta xcalboxuc ava'iic ti c'u s'elan ta xalbun ca'i ti Diose. Jech ti moletic yu'un ti Moabe comic xchi'uc.

⁹Va'i un, ti Diose laj yac' sba iluc ta stojol ti Balaame ti xi laj sjac'bee: —¿Buch'u ti viniquetic ti li' xchi'inojote?

¹⁰Ti Balaame xi laj stac'bee: —Ti Balac xnich'on ti Zipore, ja' ti ajvalil yu'un ti Moabe, ja' stacojan talel ti tal yalbeicune

¹¹ti oy la lumetic ti liquemic talel ta Egiptoe, ti tanijemic xa la talel ta scotol ti lume. Va'i un, ti Balaque ta sc'an ti mu la xijalije, ti ac'o la batcun ta anil ta sc'anbel slajelic stubelic yo' jech ta xil mi xu' la yu'un ta stsalele, yo' la jech ta snuts loq'uel ti ta slumale.

¹²Va'i un, ti Balaame xi albat yu'un ti Diose: —Mu xachi'in ech'el ti viniquetic le'e. Mi ja'uc xac'anbe slajel stubelic ti lum taje. Yu'un ti lum taje, laj xa jva'an jba ta stojolic.

¹³Jech ti Balaame lic ta yoc'omal ti xi laj yalbe ya'i ti banquilaletic ti tacbilic ech'el yu'un ti Balaque: —Sutanic ech'el ta alumalic. Yu'un ti Diose mu xac' ye ti ta jchi'inoxuc batele.

¹⁴Ti banquilaletic yu'un ti Moabe sutic ech'el ti bu oy ti Balaque, ti xi laj yalbeic ya'ie: —Ti Balaame mi ja'uc sc'an xischi'inuncutic talel.

¹⁵Ja'uc ti Balaque mu x'ech' yo'nton. Laj no'ox xcha'tac ech'el moletic ti x'ech xa yepalique, ti x'ech' to ich'bil yeique, ti ja' mu sta ta ba'yele.

¹⁶Ja' xa bat sq'uelic ti Balaame, ti xi laj yalbeique: —Ti Balac ti ja' xnich'on ti Zipore xi la ta xalbot ava'i ti mantal ti laj stacbot talele: “Avocoluc, mu xajalta aba ti xtal aq'uelune.

¹⁷Yu'un ta j'ech'el ta xquich'ot ta muc'. Ta xcac'bot scotol ti c'usi ta xac'ane. La' me un, ch'ul abolajan cu'un ti c'anbo slajelic stubelic ti lum ti laj calbot ava'i sc'oplale.”

¹⁸Ja'uc ti Balaame xi laj stac'anbee: —Ti Balaque, ac'o mi ta xiyac'bun jbej na ti noj ta oroe, ta platae, ja' no'ox un, mu jtselbun comel smantal ti Ajvalil Dios cu'une ta spasel jset'uc ti c'usi tsots sc'oplale, mi ja'uc ti yamal sc'oplale.

¹⁹Manchuc mi jech un, comanic ti ac'ubaltic tana li' xtoque, xquil quic c'usi ta xalbun ti Dios tana taje.

²⁰Ta yac'ubalil un, laj yac' sba iluc ti Dios ta stojol ti Balaame ti xi albate: —Ti viniquetic le'e tal yic'ot batel, batan, ba chi'ino ech'el. Ja' no'ox me, tsots sc'oplal ta xapas ti c'u s'elan ta xcac'bot ana'e, ma'uc yan.

²¹Jech ti Balaame lic ta yoc'omal. Laj slapbe siya ti sburroe, batic xchi'uc ti banquilaletic yu'un ti moabitaetique.

²²Ti Balaame cajal ech'el ta sburro. Chi'inbil ech'el yu'un cha'vo' smosov. Ja' no'ox un, ti Diose ilin ta stojolal yu'un lec laj ya'i ti bate. Jech xtoc tal macatuc ta be yu'un ti yaj'ánjel Diose yo' jech mu xjelav ech'el.

²³C'alal laj yil ti burro ti va'al ta o'lol be ti yaj'ánjel ti Dios ti stsacoj ti yespada ta xmacune, laj sq'uejbun sba ta be. Och batel ta osiltic. Ja' no'ox un, ti Balaame laj smaj yo' jech ta stam yu'un ti bee.

²⁴Va'i no'ox xtoc un, ti yaj'ánjel ti Diose bat sva'an sba ti bu chucul ti be ti ta x'ech' ta sc'al chib latsbil tone, smocal ti ts'unubil uvae.

²⁵C'alal ti burro laj yil ti yaj'ánjel ti Diose, tsots laj snaban sba jelavel ti ta latsbil tone, ti laj snet'be yacan ti Balaame. Ja' yu'un un, ti Balaame laj sjisbe majel xtoc.

²⁶Ja'uc ti yaj'ánjel ti Diose jelav ech'el ti bu oyique, ti c'ot sva'an sba ti bu xa mu stac' ti oy buch'u ta sq'uej sba ta jujujote.

²⁷C'alal ti burro laj yil yaj'ánjel Diose, lic slucan sba ta banomil. Va'i un, ti Balaame soc sjol, lic sc'am ta majel ta vach'.

²⁸Ti jech taj une, ta jech to yepal ti Diose lic c'opojuc yu'un ti burro ti xi laj yalbe ti Balaame: —¿C'usi laj jpasbot ya'luc li'e? Ja' xa yoxibal velta laj amajun avie.

²⁹—Yu'un c'ajomal no'ox ta xatoy aba ta jtojol —xi tac'bat yu'un ti Balaame—. Ti oyuc junuc cuchilu ta jc'obe, li' no'ox ta jmilot ava'i ti jechuque.

³⁰Ja' no'ox xi tac'bat yu'un ti burroe: —Ti c'u xa sjalil talel ti ach'iel ac'opojele, xana' lec ti acajleb burro ono'oxe. Mi junuc velta laj jpas ta atojol jech c'u cha'al avie. —Melel ava'uc —xi laj stac' ti Balaame.

³¹Jech ti Diose laj sjambe sba sat ti Balaame yo' jech ta xq'uelbat ti yaj'ánjel ti va'al ta o'lol be xchi'uc ti yespadae. Ti Balaame snupilan xa banomil laj spatan sba ta lumtic.

³²Ja'uc taj une, xi albat yu'un ti yaj'ánjel Diose: —¿C'u cha'al ti yoxibal xa velta laj xa amaj ti sme' aburroe? Yu'un vu'un tal jmacot ta be. Yu'un ti bu ta xabate toj chopol ta xca'i.

³³Ja'uc ti aburro une laj yilun. Jech o xal oxib velta laj sq'uejbun sba ta jtojol. Ti manchucuc laj sq'uejbun sba oxib velta ta jtojole, laj xa jmilot ti jechuque, ja' cuxul ta xquicta comel ti stuc jechuque.

³⁴Ti Balaame xi laj stac'be ti yaj'ánjel ti Diose: —Laj xa jta jmul. Yu'un mu laj jna' mi li' oyot ta xamacun ta bee. Mi yu'un toj chopol ta xavil ti ta xibate, ta xisut ech'el.

³⁵Ja'uc le' une, xi tac'bat yu'un ti yaj'ánjel Diose: —Xu' xabat xchi'uc ti viniquetic li'e. Ja' no'ox c'ajomal ta xaval ti c'u s'elan ta xcalbot ava'ie. Ti Balaame batic xchi'uc ti banquilaletic ti tacbilic ech'el yu'un ti Balaque.

³⁶Va'i un, ti Balaque, ti c'alal laj ya'ibe sc'oplal ti Balaam ti ta xa xc'ote, loc' batel ta snupel ta be ta jun jteclum yu'un ti Moab ti bu oy ti uc'um yu'un ti Arnón ti ja' sts'aquil ti jteclume.

³⁷Ti Balaque xi laj yalbe: —Mu xlaj co'nton staquel mantal ta aviq'uel. ¿C'u cha'al ti mu xac'an xatale? ¿Mi xavac'touc ti jutuc no'ox ac'oplal ta xca'i ti avaloje?

³⁸Xi tac'bat yu'un ti Balaame: —Avie, li' xa oyune yu'un tal xa jq'uelot. Ja' no'ox mu'yuc c'usi ta xcal mi ta yip no'ox jc'op jtuque. Ja' no'ox xu' ta xcalbot ava'i ti c'u s'elan ta xalbun ti Diose.

³⁹Laj taj une, jech ti Balaame batic xchi'uc Balac ta Quiriat-husote,

⁴⁰ja' ti bu stacoj batel mantal ti Balac ta smilel ti vacaxe, xchi'uc ti chije, xchi'uc ti ac'o yiq'uic ech'el ti Balaame xchi'uc ti moletic ti xchi'inojan ech'el ti bu taje.

⁴¹Sob ta yoc'omal un, ti Balaque bat sa' ti Balaame. Jech muy ech'el ta Bamot-baal ti bu xvinaj lec ta q'uelel ti lamalic ta joylej yaxibal naic ti israeletique.