Read Tzotzil Números 23 Bible Online

Números 23 - Tzotzil bible

Números 23

¹Va'i un, ti Balaame xi laj yalbee: —Meltsanbeicun vucub altar li'e. Chapanic vuc-cot vacax xchi'uc vuc-cot chij.

²Ti c'u s'elan laj yal ti Balaame, jech laj spas ti Balaque. Jech xchibalic laj yaq'uic yich' svocol jcot ch'iom vacax, jcot ch'iom chij ti ta jujun altare.

³Ts'acal to un, ti Balaame xi laj yalbe ya'i ti Balaque: —Coman li' ta sts'el ti c'usi laj yich' svocole. Ja'uc ti vu'une xbat jq'uel quic mi ta xtal snupun ta be ti Diose. Mi laj une, ta jcholbot ava'i ti c'u s'elan laj yalbun ca'i ti Diose. Jech ti Balaame bat ta stselejal sbajtical banomil ti sts'ijlajane,

⁴ti laj yac' sba iluc ti Dios ti bu taje. Va'i un, ti Balaame xi laj yalbee: —Laj xa jchapan ta meltsanel vucub altar. Ti jujune, laj xa cac'anbe jujucot vacax xchi'uc jujucot chij.

⁵Va'i un, ti Balaame ac'bat ta ye sti' yu'un Dios ti c'u s'elan ta sc'an alele, ti xi albate: —Sutan ech'el ti bu oy ti Balaque ti ja' no'ox jech xavalbe ya'i jech c'u cha'al laj cale.

⁶Jech ti Balaame sut batel. Va'al c'ot sta ti Balac ta sts'el ti matanal jmoj xchi'uc scotol ti moletic yu'un ti Moabe.

⁷Va'i un, ti Balaame xi xcholet laj scaj'al jech c'u cha'al li'e: “Ta vitstic to yu'un Aram ti oy ta sloq'ueb c'ac'ale, laj staun talel ta iq'uel ti Balac ti ajvalil yu'un ti Moabe. ‘La' li'e, la' c'anbo slajelic ti israeletique —xiyut—. c'anbo ti oyuc c'usi chopol c'otuc ta stojol xnich'nab ti Jacobe.’

⁸Ja' no'ox un, ¿mi yu'un stac' la c'anbel slajelic stubelic ti c'alal mu'yuc bisbilic ta cotol chaval yu'un ti Diose? ¿C'usi ono'ox la ta utel ti juteb ta o'ntonal ti chopol c'otuc ta stojolique? ¿C'usi ono'ox la ta utel ti c'alal mu'yuc loq'uem ta yo'nton ti Dios ti mu jechuc ta spase?

⁹Ti li' to ta toyol tontique, quilojic lec batel. Yu'un ti li' to ta stselejale, xi s'elan xvinajic ta q'uelel batele: yu'un ja' jun jteclum yan ti c'u s'elan cuxulique, ti mu xco'olaj xchi'uc ti yan lumetique.

¹⁰Yu'un co'ol s'elan pucuquil banomil ti yepalique, ti mu junuc buch'u xu' xchap yu'une. ¿Mi yu'un la oy buch'u sna' c'u yepalic ta j'ech'el? Oc la ta alel ti jechuc la chamcun jech c'u cha'al ti viniquetic le' ti xa'ibeic xchiquinale, ti jechuc la c'otuc ta jtojol jech c'u cha'al ta xc'ot ta stojol ti stuquique.”

¹¹Va'i un, ti Balaque xi laj stic'be ta sat ti Balaame: —¿C'usi la ta xapas ya'yel tana le' une? Yu'un ti laj quic'ot talel li'e, ja' tal ac'anbe slajelic stubelic ti jcontrataque. Ja'uc ti vo'ot une, ja' no'ox tal ac'anbe slequilal ti Dios ta stojolique.

¹²Jech ti Balaame xi laj stac'bee: —Laj cal ti ja' ono'ox ta xcal ava'i ti c'u s'elan ta xac' jna' ti Diose.

¹³Xi xvulvun xa liquel ti Balaque: —Batic le' ta jote, ti bu ja' no'ox ta xc'ot asat ta sq'uelel spat xocon ti bu lamalique. Ma'uc ta xata ta q'uelel scotol ti bu lamalique. Ti teyuc to c'alal xu' xac'anbe ech'el ti slajel stubelique.

¹⁴Jech ti Balaque laj yic' ech'el ti Balaam ta yosilal Zofim ta jun toyol vits yu'un Pisga ti bu laj xchapanic ta meltsanel vucub altare. Laj yac'beic yich' svocol jcot ch'iom vacax xchi'uc jcot chij ti jujune.

¹⁵Ti bu taje, ti Balaame xi laj yalbe ti Balaque: —Coman to li' ta sts'el ti c'usi yich'ojan svocole. Ja'uc ti vu'une xba jnup jbacutic ta be xchi'uc ti Diose.

¹⁶Jech ti Diose tal snup ta be ti Balaame. Ac'bat ta ye ta sti' ti c'u s'elan xu' ta xale, ti xi albat xtoque: —Sutan batel ti bu oy ti Balaque. Ja' no'ox xavalbe ya'i jech c'u cha'al laj calbot ava'ie.

¹⁷Ti Balaame sut ech'el. Va'al c'ot sta ti Balac ta sts'el ti milbil matanal ti chi'inbil yu'un ti banquilaletic yu'un ti Moabe. Ja'uc ti Balaque xi laj sjaq'ue: —¿C'u xayut ti Diose?

¹⁸Ti Balaame xi xcholet laj scaj'al jech c'u cha'al li'e: “Balac, xnich'onot ti Zipore, ts'et chiquintao ava'i li'e.

¹⁹Yu'un xi s'elan ti Dios ti mu co'oluc s'elan jech c'u cha'al ti buch'u sna' xcham xlaje: mu sna' sjut, mi ja'uc xtal xbat ti snopobil yu'une. Mi yu'un oy c'usi ta sc'an ta spase, ta xc'ot ono'ox ta pasel yu'un. Mi yac'oj sc'op ti ta spase, ta xc'ot ono'ox ta pasel yu'un.

²⁰Yu'un albilun ti ta xcac' yich'ic ti slequilal yutsilique. C'alal ti Dios ta xac' ti slequil yutsilale, mi ja'uc ti vu'un cajal xa xca'i ta spasel ti c'alal mu'yuc c'usi albilune.

²¹Yu'un mu'yuc ta xvinaj ti oy c'usi chopol ta snope, mi ja'uc ta xlo'lavanic ti israeletic ti ja' steclumal ti Jacobe. Yu'un chi'inbilic yu'un ti Ajvalile, ti ja' sDiosique, yu'un ta xalbeic sc'oplal ti ja' c'otem ta Ajvalil yu'unique.

²²Yu'un ti Diose laj sloq'ues talel ta Egipto, ti ja' c'otem ta jpojvanej yu'unic jech c'u cha'al ta spoj sba xchi'uc xulub ti te'tical vacax ti ja' bufalo sbie.

²³Yu'un ti Jacobe, mu'yuc c'usi xavut xamets'ta, mi ja'uc ta xc'ot ta stojolic ti slajel stubelic ta xich' c'anbel ti Israele. Avi tana le'e, tsots sc'oplal ti ac'o xi yich' alel ta stojol ti Israele: ‘Mu no'ox albajuc yepal ti c'usitic jun yutsiquil laj yac' ta ilel ti Dios ta atojolique.’

²⁴Yu'un ti jteclum le'e, co'ol s'elan jcot jti'oval león ti syolinoj sba talele, mi ja'uc spajes sbaic ja' to ti c'uxi laj sbal ta ti'el ti sve'ele, ti ta xuch'be xch'ich'el ti smilbene.”

²⁵Va'i un, ti Balaque xi laj yalbe ti Balaame: —Ti mi jech mu stac' xac'anbe slajel stubel ti jteclum le'e, sbalin to ya'yel ti mu xavac'be yich' slequilal yutsilal ti Diose.

²⁶Ti Balaame xi laj stac'bee: —¿Mi mu lajuc ono'ox cal ti ja' no'ox xu' ta xcal ava'iic ti c'u s'elan ta xac'bun jna' ti Diose?

²⁷Va'i un, ti Balaque xi laj yalbee: —La', batic, yu'un ta xquic'ot ech'el li' ta jote. Xu' nan ti mu colo'uc ta xa'i ti Dios mi tey to c'alal ta xac'anbe ech'el slajel stubel ti israele.

²⁸Jech ti Balaque laj yic' batel ti Balaam ta svitsal yu'un Peor ti xvinaj lec sjunul ti sbajtical banomil ti bu taje.

²⁹Ti bu taje, ti Balaame xi laj yalbe ti Balaque: —Chapano ta smeltsanel vucub altar li'e. Chapano xtoc vuc-cot ch'iom vacax xchi'uc vuc-cot chij.

³⁰Ti Balaque laj spas jech c'u cha'al albat yu'un ti Balaame. Laj yac'be yich' svocol jcot vacax xchi'uc jcot chij ti ta jujun altare.