Read Tzotzil Números 25 Bible Online

Números 25 - Tzotzil bible

Números 25

¹C'alal joc'tsajic ta naclej ta Sitim ti israeletique, ti viniquetic yu'unique lic soquesbe sbaic sc'oplalic xchi'uc ti moabita antsetique.

²Yu'un ta x'ic'atic ech'el ti c'alal oy c'usi ta xac'beic yich' svocol ta smoton ti sdiosique. Jech ti israeletique ta xchi'invanic ta slajesel ti ve'lile, xchi'uc ta snijan xchiman sbaic ta yich'el ta muc' sdiosic ti moabitaetique.

³Ti jech taj une, ic'bat yo'ntonic ta squejanel xchimanel sbaic ta yich'el ta muc' ti Baal-peore. Va'i un, ti Diose cap sjol ta stojol ti israeletique,

⁴ti xi laj yalbe ti Moisese: —Tsobo scotolic ti banquilaletic yu'un ti jteclume. Ta ba ta satil, tubo sc'oplalic ta jtojol. Ja' to jech ich'bil ta muc' ta xic'ot ta stojol ti israeletique.

⁵Ti Moisese xi s'elan laj yalbe mantal ti jchapanvanejetic yu'un ti israeletique: —Ti jujunoxuc ti vo'oxuque, tsots sc'oplal ta xamilic ti viniquetic yu'un ti jujuvoc' avu'unic ti buch'utic laj snijan xchiman sbaic ta yich'el ta muc' ti Baal-peore.

⁶Ja'uc un, oy jun israelal vinic ti yic'oj batel ta sna jun madianita antse, ti laj yic' jelavel ta sba ta sat ti Moisese, xchi'uc ta sba ta sat xtoc scotol ti israeletic ti c'alal ja' o tsobolic ta x'oc' x'avanic ta ochebal sti' ti Axibalna ti bu nupel ta bee.

⁷C'alal jech laj yilic taje, jech ti Fineese, xnich'on ti Eleazare, smom xtoc ti pale Aarone, laj sbev sba loq'uel ti bu tsobolic ti israeletique, ti nax to ti tsac xch'a ech'el ti slanzae.

⁸Stij-patioj ech'el c'alal to sna ti israelal vinic taje, ti tey no'ox laj spajbe ti lanza ta xch'ut ti israelal vinique xchi'uc ti antse. Taj une, ja' to jech paj ti ta xchamic ti israeletic ta scoj ti va'i s'elan toj chopol ta xc'ot ta pasele,

⁹ac'o mi chamic xa ox chanib xcha'vinic ta mil (24,000) ta vo' ti israeletique.

¹⁰Jech o xal ti Diose xi laj yalbe ti Moisés ti c'alal laj sc'opon talele:

¹¹—Ti Fineese laj yac'un ta ich'el ta muc' yo' jech mu teyuc no'ox ta jcontrain ti israeletique. Yu'un ti stuque mu xnel sts'ic ta xa'i jech c'u cha'al ti mu xnel sts'ic ta xca'i ta stojolique. Ma'uc laj yac'un ta vocol xtoc ti jech mu xnel mu sts'ic ta xca'ie, ti jech ta jtsutsesic ti laj ta j'ech'ele.

¹²Ja' yu'un un cha'e, albo ya'i ti ta jpas jtrate xchi'uc ta sventa ti jun jol o'ntonale.

¹³Ta sventa ti jech taje, ta xcac' ochuc sbatel osil ta paleal xchi'uc ti snitilultaque. Yu'un mu xnel ts'icbaj laj ya'i ta jtojol ti c'usitic ta xc'ot ta pasele, ti laj sta ti ch'aybil c'ot smul scolo'ic ti israeletique.

¹⁴Ti israel vinic ti pajbat lanza ta xch'ut jmoj xchi'uc ti madianita antse, ja' sbi Zimri xnich'on ti Salue, ti ja' banquilal xtoc yu'un jvoc' snitilultac ti Simeone.

¹⁵Ja'uc ti madianita antse, ja' sbiinoj Cozbí, yantsil nich'on ti Zure, ti ja' jun banquilal yu'un ti jvoc' Madiane.

¹⁶Ti Diose xi laj yalbe ti Moisés ti c'alal laj sc'opon talele:

¹⁷—Ac'beic tsutsesic ta j'ech'el ya'iic ti madianitaetique.

¹⁸Yu'un ti stuquique laj syacoxuc ta slo'laeloxuc ti c'ot ta pasel yu'unic ta snijanel xchimanel abaic ta yich'bel ta muc' ti Baal-peore, xchi'uc ti c'usi c'ot ta pasel yu'un ti Cozbí yantsil nich'on ti banquilal yu'un ti madianitaetique, ti laj ta milel ta lanza ti c'alal laj jtac talel ti vocol ta scoj ti laj avich'ic ta muc' ti Baal-peor yu'une.