Read Tzotzil Números 28 Bible Online

Números 28 - Tzotzil bible

Números 28

¹Ti Diose xi laj yalbe ti Moisés ti c'alal laj sc'opon talele:

²“Albo ya'iic ti israeletique ti mu me xicta sbaic ta yac'belun ti pane, xchi'uc ti chic'bil matanal ti ta xaq'uic ta jujun q'uin ti bu tsots sc'oplale, ti ja' ta xc'ot ta jun matanal ti jun yutsil smuil ta xquich' ac'bele.

³“Albo ya'iic xtoc ti xi s'elan sc'an ti matanal ta xchiq'uic sventa quich'el ta muq'ue: Tsots sc'oplal ta xaq'uic cha'cot tot chij jujun c'ac'al ti yich'oj jun jabile, ti mu'yuc jutebuc ti xchopolale.

⁴Ti jcote, ta xich' svocol ta milel ta sob ic'luman. Ti jcote, ta smalil to c'ac'al ta xich' svocol ta milel.

⁵Ja'uc ti matanal sat ts'unubil ti ta xich' aq'uele, ja' chib kilo ti lec t'ujbil ninal trigo ti vots'bil ta jun litro aceite olivoe.

⁶(Ti matanal taje, ja' me ta xalbe sc'oplal ti mu'yuc spajeb laj yich' chiq'uel ta vits Sinaie, ti c'ot ta jun matanal ti jun yutsil smuil ta xa'i ti Diose.)

⁷Ti jujucot chije, ta xich' ac'bel sts'aquebtac ta matanal jun litro vino. Ti vino taje, ta xich' malel ta Axibalna ti ja' sventa yich'obil ta muc' ti Diose.

⁸Ja'uc ti xcha'cotal chije, ta xich' svocol ta milel ta smalil to c'ac'al, xchi'uc ta xich' ac'bel sts'aquebtac ta matanal sat ts'unubal, xchi'uc ti matanal vinoe, co'ol jech c'u cha'al ti matanal ti laj yich' aq'uel ta sobe. Ti matanal taje, ja' jun muil matanal ti ta xich' chiq'uel ta sventa yich'el ta muc' ti Diose.

⁹“Ti ta sc'ac'alil cuxob o'ntonale, ta xavaq'uic cha'cot ch'iom tot chij ti yich'oj jun jabil ti mu'yuc jutebuc xchopolile. Jech xtoc ta xavaq'uic chanib kilo ninal trigo ti lec t'ujbil ti vots'bil ta aceitee, ti ja' matanal sat jchop o ta trigoe, xchi'uc xtoc ti vino ti ja' sts'aqueb ti matanale.

¹⁰Ti chic'bil muil matanal taje, ja' o ta xich' aq'uel ta sc'ac'alil ti cuxob o'ntonale, xchi'uc ti vino ti ja' sts'aqueb ti matanale, xchi'uc xtoc ti matanaletic ti oy sc'oplal ta xich' aq'uel ti jujun c'ac'ale.

¹¹“Ti sba c'ac'al yu'un ti sliqueb jujun ue, ta xavac'beic chic'bil matanal ti Diose, cha'cot ch'iom tot vacax, jcot tot chij, xchi'uc vuc-cot ch'iom tot chij ti yich'oj jun jabil ti mu'yuc jutebuc ti xchopolile.

¹²Ti jujucot ch'iom tot vacaxe, ta xavac'beic sts'aqueb ta matanal vaquib kilo t'ujbil ninal trigo ti vots'bil ta aceitee. Ti jujucot chije, ta xavac'beic sts'aqueb ta matanal chanib kilo ninal trigo ti vots'bil lec ta aceitee.

¹³Ja'uc ti ch'iom chijetique, ta xavac'beic sts'aqueb ta matanal chib kilo ninal trigo ti vots'bil lec ta aceitee. Ti matanal taje, ja' jun muil chic'bil matanal ta xich' aq'uel sventa yich'el ta muc' ti Diose.

¹⁴Ti vinoetic ti ja' sts'aqueb ti matanale, ja' ta xich' ac'bel chib litro ta jujucot ti ch'iom vacaxe. Ta xich' jun litro xchi'uc o'lol ti jujucot chije. Jun litro ta xich' ac'bel ti jujucot ch'iom chije. Taje, ja' me sc'oplal ti matanal ti ta xich' chiq'uel ta jujun u yu'un sjunul ti jabile.

¹⁵Ma'uc no'ox taje, yu'un ti chic'bil matanal ta xich' aq'uel ta jujun c'ac'ale, tsots sc'oplal ta xich' svocol ta milel jcotuc tentsun ta stojol Dios ti ta xich' svocol ta scoj ti mulile, xchi'uc ti vino ti ja' sts'aqueb ti matanale.

¹⁶“Ta xchanlajunebal sc'ac'alil ta sliqueb u yu'un ti jabile, ta xich' pasel ti q'uin Colele ta sventa yich'el ta muc' ti Diose.

¹⁷Ta yo'lajunebal sc'ac'alil ti u taje, ja' o yutsilal ti q'uin ta j'ech'ele. Vucub c'ac'al sjalil xtoc ta xich' ve'el ti pan ti mu'yuc ac'bil ti spajubtasobile.

¹⁸Ti sliquebal c'ac'al yu'un ti yucubal c'ac'ale, ta xich' pasel jun ch'ul tsoblej. Ti jech c'ac'al taje, mi ja'uc xavabtelanic jtosuc abtel.

¹⁹Ta sventa ti chic'bil matanal ta xich' aq'uele, ta xavaq'uic cha'cot ch'iom tot vacax, jcot tot chij, xchi'uc vucub ch'iom tot chij ti yich'oj jun jabil ti mu'yuc jutebuc xchopolile.

²⁰Ti matanaletic ti ta xich' svocol ta milele, xchi'uc ti sts'aquebtac ninal trigo ti vots'bil ta aceitee, xi s'elan sc'an ta xich' aq'uele: Vaquib kilo ninal trigo ta xich' ac'bel ta jujucot ti ch'iom tot vacaxe. Chanib kilo xtoc ta xich' ac'bel ta jujucot ti tot chije.

²¹Ja' jech xtoc chib kilo ta xich' ac'bel ta jujucot ti ch'iom chije.

²²Ta xaq'uic no'ox xtoc jcot tentsun ti ta xich' svocol ta milel yo' jech ta xich' tael talel ti ch'aybil ta xc'ot ti mulile.

²³Ma'uc no'ox taje, yu'un ta xaq'uic xtoc ti chic'bil matanal ti oy sc'oplal ta xich' chiq'uel ta jujun sob ic'lumane.

²⁴Ja' jech ta xapasic ta jujun ti vucub c'ac'al ti q'uine, ti ja' jun matanal ti jun yutsil smuil ta xich' chiq'uel sventa yich'el ta muc' ti Diose. Taje, ta me xich' aq'uel xtoc sts'aquebtac ti matanale, ti vinoe, xchi'uc xtoc ti chic'bil matanal ti ta xich' aq'uel jujun c'ac'ale.

²⁵C'alal ta sta ti yucubal c'ac'ale, ta xapasic jun ch'ul tsoblej. Yu'un ti jech c'ac'al taje, mi jtosuc tsots abtel ta xich' pasel.

²⁶“Ti c'alal ta xc'ot sc'ac'alil sq'uinal ti sba sat ts'unubal ti c'alal ta xavac'beic Dios ti ach' sba sat ti jchop o ta trigoe, ti xcaltique, ja' ti q'uinetic ta x'ech' sjunul xemunae, ta xapasic jun ch'ul tsoblej xtoc. Yu'un ti jech c'ac'al taje, mi jtosuc tsots abtel ta xich' pasel.

²⁷Ta xavaq'uic ta stojol ti Dios ta sventa ti ta xc'ot ta jun yutsil smuil chic'bil matanale, ja' cha'cot ch'iom tot vacax, jcot tot chij, xchi'uc vucub ch'iom tot chij ti yich'oj jun jabile.

²⁸Ti sts'aquebtac ti matanal ta xich' aq'uel ti ninal trigo ti vots'bil ta aceite, ja' vaquib kilo ninal trigo ta xich' ac'bel ti jujucot ch'iom tot vacaxe, chanib kilo ta xich' ac'bel ti jujucot tot chije.

²⁹Chib kilo xtoc ta xich' ac'bel ti jujucot ch'iom tot chije.

³⁰Ta xaq'uic xtoc jcot tot tentsun ti ta xich' svocol ta milele yo' jech ta xich' tael talel ti ch'aybil ta xc'ot ti mulile.

³¹Ti matanaletic ti ta xich' aq'uel ta chiq'uel taje, ti sts'aquebtac ti jchop ta trigoe, ti vinoe, ta xaq'uic xtoc ti matanal ti albil sc'oplal ta xich' chiq'uel ta jujun c'ac'ale. Tsots sc'oplal ti mu jutebuc xchopolil ti chon bolometique.