Read Tzotzil Números 6 Bible Online

Números 6 - Tzotzil bible

Números 6

¹Ti Diose xi laj yalbe ti Moisés ti c'alal laj sc'opon talele:

²“Xi xcholet xavalbe ya'i ti israeletic jech c'u cha'al li'e: Mi ja' jun vinic, mi ja' jun ants ti ta xac' ye sti' ta xac' sba ta tunel yu'un ti Diose, ti ja' nazareo[1] sbie,

³mi ja'uc xu' ta xuch'ic ti vinoe, mi ja'uc jtosuc ti c'usi pasemic xae, mi ja'uc yan ti c'usi pasem xae, mi ja'uc ti ya'lel uvae. Mi ja'uc xu' ta slo' ti sat uvae, mi ja'uc ti taquintasbile.

⁴C'alal mu to xc'ot ta sts'aqui sc'ac'alil yu'un ti c'u sjalil yac'oj ye sti'e, mu xu' ta slo' ti c'usiuc ta xloc' ta xich' meltsanel ta sat uvae, mi ja' ti c'uc no'ox s'elane.

⁵Ja' jech xtoc mi ja'uc xu' ta sloc' ti sjole. Yu'un c'ajomal no'ox ta sts'ites ta ch'iel ja' to ti c'uxi sta sc'ac'alil ti yac'oj ye sti' xchi'uc ti sc'ope. Yu'un xch'acoj sba ta sventa jtunel yu'un ti Diose.

⁶Ti c'u sjalil taje, mi ja'uc xu' ta xnopaj batel ti bu tuts'ul ti animae.

⁷Mi ja'uc xtoc xu' ta sq'uel mi c'ot ta pasel mi cham ti stote, mi ja' ti sme'e, mi ja' jun xchi'il ta voq'uel, mi vinic, mi ants, yo' jech mu soques sba. Yu'un tsots sc'oplal ta stuc'ulan sba ti jech c'otem ta jtunel yu'un ti Diose.

⁸Yu'un ti c'u sjalil yac'oj ti ye sti'e, yu'un c'otem xa ta yajtunel ti Diose.

⁹“Mi oy buch'u ta xcham ta anil no'ox ti xchi'inoje, ti c'ot ta sts'i'lejel ti stsotsil sjol ti yaloj ti ta xc'ot ta stunel yu'un ti Diose, ta yucubal c'ac'al yech'el un, ti xcaltique, ja' ti c'alal nopol xa batel yorail ti mesel tusele, ac'o xt'axbun ta loq'uel ti sjole.

¹⁰Ta xvaxaquibal c'ac'al un, ta xich' batel ta stojol ti palee cha'cot tórtola, mi mo'oje, cha'cot ch'iom paloma ta ochebal sti' ti Axibalna ti bu nupel ta bee.

¹¹Jech ti pale une ta xac' jcotuc ti ta xich' svocol ta scoj ti mulile. Ja'uc ti jcote, ta xich' xchiq'uel yo' jech ta xich' tael ti ch'aybil ta xc'ot ti mulil ti jech laj sta ti anil soquesel ta scoj ti animae. Ti jech c'ac'al taje, ja' o ta xlic ochuc ta yaq'uel ta tunel ta stojol ti Dios ti stsotsil sjol yan veltae.

¹²Yu'un ta ach' ta sliques ti ta xac' sba ta tunel yu'un ti Diose. Ja'uc ti c'u s'elan laj sliques ta ba'yele, mu'yuc xa tsacbil c'ot ta venta. Yu'un ti stsotsil ti laj xch'acbe sc'oplal ti ta xc'ot ta tunel yu'un ti Diose, yu'un c'ot ta soquel. Ja' jech xtoc ac'o yic' batel jcotuc chij ti yich'oj jun jabil ti ta xich' svocol ta scoj ti mulil colo'ile.

¹³“C'alal ta stsuts sc'ac'alil ti c'u sjalil ti mesel tusele, jech ti buch'u ta x'och ta nazareoe, ta xbat ta ochebal sti' ti Axibalnae.

¹⁴Yu'un ta xac' ta stojol Dios jcot ch'in tot chij ti mu'yuc jutebuc ti xchopolile, ti jun yutsil smuil ta xich' chiq'uele. Ta xac' xtoc jcot me' chij ti mu'yuc jutebuc ti xchopolile, ti yich'oj xa jun jabile, ti ta xich' svocol ta scoj ti mulile. Ta xac' xtoc jcot to tot chij ti mu'yuc jutebuc ti xchopolile, ti ta xich' svocol ta sventa ti lajesobil o'ntonale.

¹⁵Ja' jech xtoc ta xac' junuc biq'uit moch pan ti pasbil ta lequil t'ujbil harina ti vots'bil ta aceitee, ti mu'yuc ac'bil ti spajubtasobile. Ta xac' xtoc ti bacubtasbil jayal harina ti vijbil aceite ta sbae. Ti jujune, ta xich' ac'bel ti matanal sat ts'unubale xchi'uc ti vinoe.

¹⁶Va'i un, ti palee ta xac' ta stojol Dios ti matanal ti ta xich' svocol ta scoj ti mulile, xchi'uc ti chic'bil matanale.

¹⁷Ta xac' ti jcot chij ti ta xich' svocol ta sventa ti lajesobil o'ntonale jmoj xchi'uc ti jun biq'uit moch pan ti mu'yuc ac'bil ti spajubtasobile. Ta xac' xtoc ti matanal sat ts'unubale xchi'uc ti vinoe.

¹⁸Ta sloc' sjol ta ochebal sti' ti Axibalna ti bu nupel ta be ti buch'u ta x'och ta nazareoe. Ta stsob ti stsotsil sjol ti xc'ot ox yu'un ta tunele. Ta stic' ochel ta c'oc' ti ta xtil ta yolon scajleb ti matanal ta sventa ti lajesobil o'ntonale.

¹⁹Va'i un, ti palee ta stsac sbaquil spat ti chij ti ta'ajem xae, xchi'uc ti jbej pan ti mu'yuc ac'bil ti spajubtasobil ti tiq'uil ta biq'uit moche, xchi'uc ti jayaquil harina ti bacubtasbil ti mu'yuc ac'bil ti spajubtasbile. Scotol ta xac'be jelavel ta sc'ob ti buch'u ta x'och ta nazareoe, ti c'alal mi laj xa ox sloc' ti stsotsil sjole.

²⁰Va'i un, ti pale une ta xlic sye'ilan yo' jech ta xac' ta stojol ti Diose. Ti sti' yo'nton ti chon bolom ti ja' laj yich' ye'ilanele, ti sbec'tal yo' ti c'ot ta matanal yu'un ti Diose, ja' ta xc'ot ta spuculal ti palee, yu'un ac'bil c'ot ta ventainel. Mi laj ti va'i s'elan taj une, jech ti buch'u laj sts'ites ti sjole, xu' xa xlic yuch' ti vinoe.

²¹“Taje, ja' sc'oplal ti oy c'usi jbel tsots albil ta sventa ti buch'u ta xal sc'op ti ta x'och ta nazareoale. Ja' jech s'elan ti smatanalil ti tsots sc'oplal ta xaq'ue, ti mu'yuc xa tsacbil ta venta mi oy to c'usi yan ti xu' yu'un ta yaq'uel yane. Yu'un tsots sc'oplal ti c'otuc ta pasel yu'un co'ol jech c'u cha'al ti nopbil albil sc'oplale.”

²²Ti Diose xi laj yalbe ti Moisés ti c'alal laj sc'opon talele:

²³“Xi xavalbe ya'i ti Aarón xchi'uc ti xnich'nabe ti c'alal ta sc'anbeic ti ac'o yaq'uic ti slequilal Dios ta stojol ti israeletique, ac'o yalic jech c'u cha'al li'e:

²⁴‘Ac'o sva'an sba ti Dios ta atojolique, ac'o xa xchabioxuc.

²⁵Lecuc xayiloxuc ti Diose, ac'o yac' avilic ti slequil yutsil yo'ntone.

²⁶Lecuc xayiloxuc ti Dios ta sventa ti syail xc'uxul yo'ntone, ac'o yac'boxuc ti lamajemuc ti ajol avo'ntonique.’

²⁷“Jech ti stuquic une ta staicun ta biiltasel ta stojol ti israeletique. Jech ti vu'un ec une ta jva'an jba ta stojolic.”