Read Tzotzil Números 8 Bible Online

Números 8 - Tzotzil bible

Números 8

¹Ti Diose xi laj yalbe ti Moisés ti c'alal laj sc'opon talele:

²“Albo ya'i ti Aarone, ti c'alal ta sa'anbe yaviltac ti bu ta xcom ti lamparaetique, ac'o yac'be batel xojobal sat ta yeloval ti bu oy ti pajleb cantilae.”

³Ti Aarone jech laj spas jech c'u cha'al albat yu'un Dios ti Moisese. Laj sa'ananbe yavil bu ta xcom yo' jech ta xac' batel xojobal ta yeloval ti bu oy ti spajleb cantilae.

⁴Ti pajleb cantilae, meltsanbil ta oro, ti anbil ta yanobil ti nitil ta jun xchi'uc ti xchotlebe, xchi'uc ti xnichimaltaque. Ti pajleb cantilae, ja' jech s'elan laj smeltsan ti Moisese jech c'u cha'al ac'bat yil yu'un ti Diose.

⁵Ti Diose xi laj yalbe ti Moisés ti c'alal laj sc'opon talele:

⁶“Ch'aco loq'uel ti levitaetic ta stojol ti yan israeletique, xchi'uc meso tuso.

⁷Ti smelol ti mesel tusele, xi s'elan jech c'u cha'al li'e: Ta xavijbe ti jmesvanej jtusvanej vo'e. Ts'acal to un, ta xch'ul sbaic lec sjunul. Ta xchuc' sc'u'ic. Va'i un, mesbil tusbil ta xc'otic.

⁸Ts'acal to un, ta stsaquic talel jcot ch'iom tot vacax, jopuc juch'bil trigo ti lec t'ujbile ti vots'bil ta aceitee, xchi'uc ti sat ts'unubaletic ti ja' xa sts'aquebtac ti matanaletique, xchi'uc jcot ch'iom tot vacax ta xich' svocol ta scoj ti mulile.

⁹Ta xavic' batel ti levitaetic ta sts'el ti Axibalna ti bu nupel ta bee, ac'o stsob sbaic scotol ti israeletique.

¹⁰Mi laj une, ta xava'an ta jtojol ti levitaetique, ac'o scajan sc'obic ti israeletic ta sjolique.

¹¹Ja'uc ti Aarone sye'ilan xa sc'ob ta xalbe sc'oplal stunelic ti c'alal ta xnabanatic yu'un ti israeletic ta jtojol ti levitaetique. Jech bi'inemic ta x'ochic ta cajtunel ti levitaetique.

¹²Ts'acal to un, ti levitaetique ta scajan sc'obic ta sjol ti vacaxetique. Ti jun ta scotol ti vacaxe, ta xich' svocol ta scoj ti mulile. Ja'uc ti jcote, ta xich' chiq'uel ta sventa smesel stusel ti levitaetique.

¹³Mi laj une, ta xava'anic ta sts'el ti Aarón xchi'uc ti xnich'nabe, ti xaye'ilan xa ac'ob ta xavalbe sc'oplal stunelic ti ta xanabanbun ta cajtunele.

¹⁴Ja' jech ch'acbil ta xc'ot ti levitaetic ta stojol ti yan israeletique yo' jech ta xc'otic ta cu'un.

¹⁵C'alal mi mesbil tusbil xa avu'une, xchi'uc ti laj xa avac' ta jtojol jech c'u cha'al junuc t'ujbil matanale, ta xlic abtejicuc ti ta Axibalnae.

¹⁶Yu'un ti c'u yepal oyic ta stojolic ti israeletique, biinemic ti c'otemic ta cu'une. Jech ti vu'une mu'yuc ta jbajic ti ja' c'otic ta q'uexolil yu'unic ta sventa scotol sba xnich'nabtac ti israeletique.

¹⁷Yu'un scotol sba xnich'nabtac ti israeletique, ja' cu'un, xchi'uc xtoc ti sba yoltac ti xchon sbolomique. Ti c'alal laj cac' chamicuc sba xnich'nabic ti egipcioetique, ja' laj jpojic yo' jech ta xc'ot ta cu'un ti sba xnich'nabic ti israeletique.

¹⁸Yan ti stuquique, ja' c'ot ta q'uexolil yu'unic ti levitaetique.

¹⁹Vu'un laj jt'uj loq'uel ti levitaetic ta stojol ti israeletique. Laj cac'be sbain ti Aarón xchi'uc ti xnich'nabe yo' jech ta xc'ot ta q'uexolil yu'unic ti israeletic ti ta xac' sbaic ta tunel ta Axibalna ti bu nupel ta bee, ti ta stabeic talel ti ch'aybil ta xc'ot smulic ti israeletic ta stojol ti Diose. Ti va'i s'elan taj une, yo' jech mu xnopajic batel ti israeletic ta stojol ti ch'ul cuartoe, yo' jech mu'yuc c'usi chopol ta xc'ot ta stojolic.”

²⁰Jech ti Moisese, ti Aarone, xchi'uc scotol ti israeletique, laj xch'unic ta spasel jech c'u cha'al ti Dios laj yalbe mantal ti Moisés ta sventa sc'oplal ti levitaetique.

²¹Va'i un, ti levitaetic une laj yich'ic mesel tusel. Laj xchuc' sc'u'ic. Jech ti Aarone laj sva'an laj yac' jelavel jech c'u cha'al junuc lequil matanal ta stojol ti Diose ti c'alal sye'ilan xa ti sc'ob ti ja' sc'oplal yu'un ti mesel tusele.

²²Laj scotol taj une, jech ti levitaetique bat yabtelanic ti c'usi sc'an pasel ta Axibalna ti bu nupel ta bee, ti ja' q'uelbilic yu'un ti Aarón xchi'uc ti xnich'nabe. Jech c'u cha'al albat ti Moisés yu'un ti Diose, ja' jech laj spasic ta stojol ti levitaetique.

²³Ti Diose xi laj yalbe ti Moisés ti c'alal laj sc'opon talele:

²⁴“Ti levitaetique, sc'an ti yich'ojic xa ox vo'ob xcha'vinic (25) jabil ti c'alal ta xlic yac' sbaic ta tunel ta Axibalna ti bu nupel ta bee.

²⁵Va'i un, ja' to xu' ta xicta comel yabtel ta tunel ti mi yich'oj xa ox lajuneb yoxvinic (50) jabile.

²⁶C'alal ta xa xicta comel yabtel ti jech yich'oj xa ti lajuneb yoxvinic (50) jabile, xu' to ta scolta ti xchi'ilic ti ta xtunic ta Axibalna ti bu nupel ta bee. Ja' no'ox un, ma'uc xa ta sbain ta spasel ti c'usi tsots sc'oplale. Ja' jech ta xachapbe sc'oplal stunelic ti levitaetique.”