Read Tzotzil Nahúm 2 Bible Online

Nahúm 2 - Tzotzil bible

Nahúm 2

¹Ti buch'u ta stub ac'oplale, jteclum Nínive, xvoletic xa talel ta atojol. Va'anano jq'uel-osiletic ti ta nac'obbailetic avu'une. Va'anano jq'uel-osiletic ta beetic. Chuco xa ta achucbenal ti avespadae. Volo xa ta tsobel ti avinictac ti ja' yipal avu'une.

²Ti Diose ta xlic xcha'meltsan ta ach' ti yutsilal slequilal ti Israele, ti c'u to ox s'elan ta ba'yele, ti c'alal mu to ox jechuc s'elan ti sc'ob-c'obtac uva ti taquichivan laj yictaic comel ti yajcontraique.

³Naca tsoj smaquic ti yaj'ac'-letotaque; naca tsoj sc'u'ic ti yajsoldadotaque. Chapalic xa ta stsacvanic ta leto. Co'ol s'elan ta xtil sc'ac'al ti scarretaique; ti sca'ique mu xa stac' pajesel.

⁴Ti carretaetique, ta scapemal xa xjipet ta anil ti ta bebetique, ti xtal xbat xa ta jujujot ta o'lol ti yutil lume. Co'ol s'elan tilemal leb c'oc' ti xjipluj xa jelavel jech c'u cha'al ti sac tsele.

⁵Ti ajvalile ta sta ta iq'uel ti yaj'opisialtaque. Jech ti stuquique stacoltaan xa sbaic ti jech xbitetic no'ox batel ta ba moc yo' ta stsacvanic ta letoe.

⁶Ta xich' jambel smac yoctac ti uc'ume, jech ti muc' ta na yu'un ti ajvalile, ta xlom yalel.

⁷Ti me' ajvalile, bec'bil ta xbat, ti chi'inbil ech'el yu'un ti smosovtaque, ti xme'inal oq'uic xa jech c'u cha'al ta spas ti palomae. Ja' jech xtoc smajilan xa sti' yo'ntonic ta x'oq'uic.

⁸Jech c'u cha'al xq'uechomaj no'ox loq'uel ti vo' ti c'alal ta xt'om ti bu macbile, ja' jech xbitic no'ox loq'uel ta jatvil ti jnaclejetic yu'un ti jteclum Ninivee. Manchuc mi xi ta x'avtaatique: “Va'lanic to, sutanic talel”, mi x'utatique, c'u stu un, mu'yuc buch'u ta sut ech'el.

⁹Elc'anic batel ti platae. Elc'anic batel ti oroe. Spajeb xa no'ox busul sc'ulejal ti jteclum Ninivee.

¹⁰Tub xa sc'oplal, yu'un sicotan xa com, stuc xa pochol com ti jteclum Ninivee. Juteb xa tsacal ta xcom o'ntonal yu'un ti xi'ele, jeche' xa xt'elt'un ti oquile, scotolic ch'abal ti yipic ta xa'iique, ti sac pac'an xa ti satil yu'une.

¹¹¿Mi yu'un la oy to c'usi x'ayan ta xcom ti bu snail-ch'enic ti leonetique, ti snac'obbailic ti ch'in leonetique? Ti leonetic xchi'uc ti yalabique, mu'yuc c'usi sna'ic ti lec staoj ti snac'lebique, yu'un mu'yuc to ox bu staojic sibtasel.

¹²Yu'un ti leone laj smil ti sve'ele; laj xch'acanbe ti me' leonetic xchi'uc ti yalabtaque. Noj no'ox yu'un ta xch'en ti c'usi laj sta batele.

¹³Ti Dios ti scotol xu' yu'une, mu stselbuj ti xi ta xale: “Xi s'elan jnopoj ti jech li' va'alun ta scontrainelote: xtomet no'ox liquel xch'ailal ta jchic' ti acarretatac yu'un ti ac'ob-letoe. Ta jmil ti ch'in jti'oval soldadoetic avu'une, j'ech'el ta jtubbe sc'oplal ti avelec'al ta abanomile, mi ja'uc xa xvinaj liquel sc'opojel ti j'al-mantal j'ich'-c'op avu'une.”