Read Tzotzil Habacuc 1 Bible Online

Habacuc 1 - Tzotzil bible

Habacuc 1

¹Ti li'e, ja' slo'il ya'yej Dios ti laj svinajes ta yalel ta stojol ti j'alc'op Habacuque.

²Cajval, ¿bu to ono'ox c'alal sc'an xivulvun ta sc'anel ti coltael ta atojole ti mu'yuc no'ox ta avo'nton ta xava'ie? ¿Bu to ono'ox c'alal sc'an ta xime'inal c'opoj ti'in ta sc'oj ti ilbajinele c'alal mi ja'uc ta xtal atic' aba ta jpojelcutique?

³¿C'u cha'al tey no'ox aq'ueloj ti xquil ta jba ta jsat ti ilbajinele xchi'uc ti c'usi chopol ta xc'ot ta pasele? Joyobtabilun yu'un ti ilbajinele xchi'uc ti tsutsesel ta j'ech'ele; buyuc no'ox ta jujujot oy ti letoe xchi'uc ti stsaquel ta c'ope.

⁴Mu'yuc xa ta tunesel ti oy c'usi jbel albil ti tsots sc'oplale; ti lequil chapanele, pech'bil ta teq'uel ta j'ech'el. Ti buch'u oy stuq'uil sjol yo'ntone, ilbajinbil yu'un ti buch'u toj chopole, ta xyanij yu'unic ta j'ech'el ti lequil chapanele.

⁵Ti Diose xi laj stac' sutele: “Q'uelo avilic, ti muc'tiquil jteclumetique, yu'un joyol no'ox ta apat ta axoconic. Q'uelo avilic, yu'un ta xbat ach'ulel ta xi'el yu'un. Ta xa xc'ot ta pasel cu'un ti mu ch'unbaj ta xava'i ti mi oy buch'u ta xayalbote.

⁶Ta xlic jpas ti ta xlic xchapan sbaic ta ac'-leto ti caldeoetique, ti ja' jun jnaclejetic ti mu'yuc xch'ulelic ta j'ech'ele, ti toj lec xa'iic ta xaniel ti banomil ta jujujote, yo' jech ta xu'ninic ti banomil ti c'alal ma'uc yu'unique.

⁷Toj xi'bal sbaic ta j'ech'el; spajebal xa no'ox ti spucujilique, ti ja' no'ox sna'ic spasel ti c'u s'elan ta xac' ta xa'iic ti sjol sbaquilique.

⁸“Ti sca'ique xbitet no'ox ta anil, ja' ta xcom ta be yanilajeb ti jchop o ta bolome, toj ech'em spucujilic, ja' mu sta spucujil ti oq'uil ti oy ta sbajtical banomile. Jun no'ox yepal xbitetic xvoletic ta anil ti jcajlejetic ta ca' yu'une, ta nom no'ox ta xlic tsacvanicuc talel ta leto jech c'u cha'al junuc muc' ta xic ti xchechech to yalel ta stsaquel ti sve'ele.

⁹“Scotol ti c'usi ta sta ta sbee, ta slilin comel ta j'ech'el; ti jech sbusetic no'ox talele, mu no'ox albajuc ta xaq'uic ti xi'ele. Mu no'ox albajuc yepal ta xchuquic ech'el ti jchuqueletique, ja' mu sta yepal syi'al ti muc' ta nabe.

¹⁰Mu'yuc c'usi bal ta xa'i ta yo'ntonic ti ajvaliletique, xchi'uc ti jnaclejetic ti ich'bil ye sti'ique. Tse'ej no'ox ta xa'iic yu'un ti nac'obbailetique; ta spas sbitebic ta spat yo' ta xbitic yalel ta yu'ninel ti jteclume.

¹¹Co'ol to s'elan junuc sutub ic' ti xvoletic no'ox ochele; ja' no'ox xrioxinojic o ta xa'iic ti oy yipal yu'unique.”

¹²Cajval, ¿mi mu ta sliquebaluc ono'ox tey oyot Ch'ul Dios cu'un ti cuxulot oe? Cajval, cajchabivanej, ti vo'ote laj avac'be smuc'ul stsatsalic ti caldeoetique yo' jech ta xc'ot ta pasel yu'unic ti chapanel avu'une.

¹³¿C'u cha'al ta xavac' ave ati' yu'un ti c'usi chopole, c'alal ti vo'ote jelavem ti avutsil alequilale, ti xlaet no'ox ta xava'i yu'un ti c'usi chopol ta q'uelele? ¿C'u cha'al ya'yel un ti tey no'ox ts'ijil aq'ueloj ti j'ilbajinvanejetique, ti mu'yuc no'ox c'usi ta xaval yu'un ti buch'utic toj chopolic ti yacalic ta stubbel sc'oplal ti buch'utic mu xco'olaj ti yo'ntonic xchi'uque?

¹⁴¿C'u cha'al ti co'ol no'ox xchoyal muc' ta nab ta xavil ti jnaclejetique, ti co'ol s'elan junuc chon bolometic ti mu'yuc jpas-mantal yu'unique?

¹⁵Ti caldeoetique ta xu'ninic ti yan jteclumetic jech c'u cha'al junuc jtsac-choy ti xi s'elan ta spasique: ta stsac ta stsacobil ti sbiinoj anzueloe, mi mo'oje, ja' ti yan stsacobile. Mi laj taj une, ti c'alal tey xa busul scotol yu'unique, xmuyubaj no'ox liquel xchi'uquic.

¹⁶Jech o xal ti jtsac-choye ta snijan xchiman sba ta sc'oponel sti'inel ti stsacobil xchoye, xchi'uc ti yan stsacobil ti sbiinoj anzueloe. Ta xac'be milbil matanal, ta xchic'be pom sventa yich'obil ta muc' yu'un, ti col albat ti ja' ta sventaic ti busul no'ox ta sta ti jun yutsil ti c'usi ta stun slajese.

¹⁷Ti jech taj une, ¿mi staoj yav yac'ojbe yipal ti caldeoetic ti tsacbiluncutic ta stsacobil ti xchoye? ¿Mi staoj yav ti mu'yuc syail xc'uxul yo'nton ta smilic ti jnaclejetique?