Read Tzotzil Sofonías 1 Bible Online

Sofonías 1 - Tzotzil bible

Sofonías 1

¹Ti li'e, ja' jech s'elan c'opoj ti Dios ta stojol ti Sofonías c'alal tiq'uil ta ajvalilal ta jteclum Judá ti Josías ti ja' xnich'on ti Amone. Ti Sofoniase, ja' xnich'on ti Cusie, ti liquem talel ta stojol ti Gedaliase, ti liquem talel ta stojol ti Amariase, ti liquem talel xtoc ta stojol ti Ezequiase.

²Xi s'elan laj yal ta jamal ti Diose: “Ta j'ech'el ta jtubbe sc'oplal scotol ti c'usitic oy x'ayan ta banomile.

³Ta j'ech'el ta jtsutsesbe sc'oplal ti jnaclejetique, ti chon bolometique, ti c'usitic xvilte-viltee, xchi'uc ti choyetique. Ta jtsuculinbe yoquic ti buch'utic toj chopolique; ta jtubbe sc'oplal ta banomil ti jnaclejetique.

⁴“Ta jye' ech'el jc'ob ta scontrainel ti jteclum Judae, ta scontrainel scotol ti c'u yepal nacalic ta jteclum Jerusalene. Ta j'ech'el ta jtubbe sc'oplal li' ta banomil ti loc'obbail dios Baale, ja' to ti c'uxi ch'aybil com sbiic ti yajpaletaque.

⁵Ti buch'utic ta xmuyic batel ta sjol snaic ta snijanel xchimanel sbaic ta yich'el ta muc' ti c'usitic ta xac' xojobal ta vinajele, ta jtubbe sc'oplal ta j'ech'el. Ti buch'utic xquejeletic xa ta sva'anicun ta rexticoe, ti sva'anic xa ta rextico xtoc ti dios Milcome, ta jtubbe sc'oplal xtoc.

⁶Ja' jech xtoc ta jtubbe sc'oplal ti buch'utic ta sq'uej sbaic ta jtojole, ja' ti buch'utic mu xisa'icune, xchi'uc ti mu ta sjac' sbaic ta jtojole.”

⁷Ts'ijlanic ta stojol ti Diose, yu'un ti sc'ac'alil yorail ti c'usi xchapanoj ti Diose, jutuc xa sc'an xvul ta loq'uel. Ti Diose chapal xa yu'un ti milbil matanaletique; t'ujbilic xa yu'un ti buch'utic ta x'abolajique.

⁸Yu'un xi ta xal ti Diose: “Ti sc'ac'alil ti vocolajele, ta jtsits ya'iic ti banquilaletique, xchi'uc xnich'nabtac ti ajvalile, xchi'uc scotolic ti buch'utic yan o ti c'u s'elan slapoj ti sc'u'ique.

⁹Ti jech c'ac'al taj xtoque, ta jtsits ya'iic ti buch'utic mu'yuc smelolic ti xbitic no'ox jelavel ta ti'nae, xchi'uc ti buch'utic ta naca ilbajinvanej jut c'op ta spasic ti noj no'ox sbel sna ti yajvalique.

¹⁰“Ti jech c'ac'al taje, ta xvinaj ti x'avlajetic ta sc'anic coltael ti buch'u xi oy ta stuq'uil ti'na ti sbiinoj Ti'na yu'un ti Choye. X'avlajetic ti jnaclejetic ti xi oy ta Xchibal Barrioe. Ja' jech xtoc xc'ululet ta xjin yalel tal ti banomil ti ta vitstique.

¹¹Ajlajetanic, jnaclejetic ti xi oyoxuc ta barrio ti sbiinoj Barrio yu'un ti Morteroe, yu'un ti jbolomajeletique ta xchamic scotolic; ta xchamic scotolic ti buch'utic lec chapalic ta taq'uin ta xmanolajique.

¹²“Ti jech c'ac'al taje, ta jtsac jlampara yo' jech ta jchaj ta q'uelel ta sa'el ti jteclum Jerusalene. Va'i un, ta jtsits ya'i ti jnaclejetic ti buch'utic mu'yuc c'usi sna'ic ti co'ol s'elan junuc vino ti lec sts'abioj sbae, ti xi ta xalbe sbae: ‘Mu'yuc c'usi ta spas ta j'ech'el ti Diose, mi ja'uc ti leque, mi ja'uc ti chopole.’

¹³Jech o xal ti sc'ulejalique, ta xpojbatic ech'el, ja' jech xtoc ta xlilinbat ti snaique. Ta xlic smeltsan ti snaique, c'u stu un, mi ja'uc xa xu' ta xnaquiic; ta xlic sts'unic ti uvae, c'u stu un, mi ja'uc xa ta xuch'beic ti ya'lele.”

¹⁴Ti muc' ta c'ac'al yu'un ti Diose, nopol xa sc'an xvul ta loq'uel, yu'un ta xvul no'ox ta loq'uel ta anil. Ti sc'ac'alil xvo'o'et no'ox vulel ta loq'uel ti Diose, toj tsots vocol ta j'ech'el ti xi s'elan ta xc'ot ta pasele; ti buch'u spajeb xa no'ox tsots xa'i sbae, ta xlic avanuc.

¹⁵C'ot xa sc'ac'alil ti contrainele, ti vul o'ntone, ti mu xa stac' a'yeluc ti c'usi ta xc'ot ta pasele, ti lajele, ti sts'ijlajan ta xcome, ti ic'uneb ti osile, ti ic'al osil xchi'uc ti yalemal toque, ti mu no'ox albajuc x'ic'ubin xqueovin ti banomile.

¹⁶Ti jech c'ac'al taje, ja' o xa sc'ac'alil ta xich' oq'uisanel ti oq'uese, ti x'avlajet no'ox ta xich' contrainel ti jteclumetic ti oy yu'unic ti pojobbailetique, xchi'uc ti oy yu'unic ti natiquil luchlebale.

¹⁷Ti Diose xi ta xale: “C'ot xa ta pasel cu'un ti mu xa stac' a'yeluc ta xa'iic ti c'usi xu' ta xut sbaic ti jnaclejetique. Co'ol xa s'elan junuc ma'sat ta xanavic, ja' ti laj sa' smulic ta jtojole. Xvajet no'ox batel ti xch'ich'elic jech c'u cha'al ti pucuque, ti busul no'ox ta xcom ti sbec'talic jech c'u cha'al junuc sbel xch'ut ti chon bolometique.”

¹⁸Ti sc'ac'alil yorail ti liquem sc'ac'al yo'nton ti Diose, mu xpojat yu'un yoroic splataic ti jnaclejetique. Ti sc'ac'al stilemal sc'ac'al yo'nton ti Diose, ta stubbe sc'oplal scotol ti jteclume. Scotol ti jnaclejetic ta banomile, ta jliquel no'ox ch'ab xi ti sc'oplalique.