Read Tzotzil Sofonías 2 Bible Online

Sofonías 2 - Tzotzil bible

Sofonías 2

¹Volo abaic, tsobo abaic, jnaclejetic ti vo'oxuc ti mu xa xava'iic ti q'uexlal apune,

²yo' to mu ta xavich'ic jipel batel jech c'u cha'al junuc taquin jobel ti oy bu jun c'ac'al tub xi ac'oplalique, ti lamal ta xvul ta atojolic stilemal sc'ac'al yo'nton ti Diose, yo' to mu ta xvul ta atojolic ti sc'ac'alil soquemal sjol ti Diose.

³Sa'ic ti Dios acotolic ti vo'oxuc ti biq'uit avac'oj abaic li' ta banomile, ti buch'utic ta xch'unbeic ti smantaltaque. Nijil chimil xavac' abaic, lecuc ti c'usi ta xapasique, xu' to nan ta xataic ti pojel coltael c'alal ta xc'ot sc'ac'alil ti ti'em capem sjol ti Diose.

⁴Ta xc'ot ta jun sts'ijlajan banomil ti jteclum Gazae; jeche' pochol ta xcom xtoc ti jteclum Ascalone. Ta c'ac'altic lec bec'bil ta xbatic ti buch'utic nacalic ta Asdode; j'ech'el ta stsutsesatic ti buch'utic nacalic ta jteclum Ecrone.

⁵Mu xa ono'ox cha'belucoxuc un, jnaclejetic yu'un ti jteclum Cretae, ti nacaloxuc ta ti' nabe. Xi xa s'elan chapbil ac'oplalic yu'un ti Diose: “Banomil Canaán, steclumalot ti filisteoetique, mi junuc jnaclejetic ta xquictabot comel, yu'un ta jtubbot ac'oplal.

⁶Ta xjoybij ta jun pulem yaxaltic ti muc' ta lum ti oy ta ti' nabe, ti bu ta svol sbaic ti jq'uel-chijetique, ti bu ta spasbeic scorral ti xchijique.”

⁷Ti c'u yepal cuxul ta xcom scomelal ti jnaclejetic yu'un ti jteclum Judae, ta xu'ninic ti banomil taje, c'alal ta xtal pojaticuc yu'un ti Diose, ti ta xjeltabat ti yorailic xtoque. Ti bu taje, ta xlic sq'uel ti xchijique, ja'uc ti ta ac'ubaltic xtoque, ta x'och xcuxiic ta naetic yu'un ti jteclum Ascalone.

⁸Xi ta xal ta jamal ti Diose: “Laj ca'i ti c'usi chopol ta xloc' ta yeic ti moabitaetique, ti chopol ta xc'opojic ti amonitaetic ti ja'ic laj soquesic ti jteclumale, ti caj tsacal xa'i sbaic c'otic yu'un ti jteclum taje.

⁹Manchuc mi jech un, yu'un ti cuxul Diosun scotol xu' cu'une, ti Diosun yu'un ti Israele, ti jteclum Moabe, jech ta xc'ot cu'un jech c'u cha'al ti jteclum Sodomae. Ti jnaclejetic yu'un ti jteclum Amone, jech ta xc'ot cu'un jech c'u cha'al ti jteclum Gomorrae ti pochol ta xcom sbatel osile. Ta xjoybij ta ch'ieb ch'ixtic, ta xminaxil ats'am; ti c'u yepal scomelal ti jteclumale ta spojic ti c'usitic oy yu'unique, ta xu'ninbeic ti yosilique.”

¹⁰Ti va'i s'elan taj une, ja' me stojol ta xich'ic ti jteclum Moabe xchi'uc ti jteclum Amone ta scoj ti chopol c'opojic yu'un steclumal ti Diose, ta scoj ti oy c'usi laj staic ti laj yilbeic svocol steclumal ti Dios ti scotol xu' yu'une.

¹¹Ti Diose, toj xi'bal sba ta j'ech'el ti c'usi ta spas ta stojolique. Ta j'ech'el ta stubbe sc'oplal scotol ti sbiinoj diosetic yu'un ti jteclume yo' jech ti stuque ich'bil ta muc' ta xc'ot yu'unic scotol ti buyuc no'ox oyique.

¹²Ja' jech ti vo'oxuc nacaloxuc ta jteclum Etiopiae, q'uiil ta xacomic ta milel yu'un yespada ti Diose.

¹³Ta syales yoc sc'ob ta scontrainel ti buch'u xi oyic ta stuq'uil ti yolon xocon sloq'ueb c'ac'ale yo' jech ta stubbe sc'oplal ti muc' ta lum Asiriae, sts'ijlajan ta xicta comel ti muc' ta jteclum Ninivee, ta sjoybin ta jun taquin sbajtical banomil.

¹⁴Ta xlilinbat loq'uel ti ste'eltac snaique, ja'uc ti spac'balile, ta xcom ta corral chij yu'unic, ti c'usuc xa no'ox chon bolomalile. Ti mutal bolome, ti ch'ix-uche luchajtic no'ox ta xvayic ta yoyaltac ti naetique, yan to s'elan ta vochetel ti jojetic ti x'avlajetic no'ox ta caj ti' ventanaetique, ta caj ti'naetique.

¹⁵Taj une, ja' jech ta xc'ot ta stojol ti jteclum ti spajeb xa no'ox jelavem ti stoyobbaile, ti snopoj mu'yuc c'usi ta xc'ot ta stojole, ti ta xalic ti jnaclejetic yu'une ti stuc xa no'ox lec oy ta xa'iic ta banomile. C'u stu un, c'ot ta stojol ti sts'ijlajan come, ti joybij ta yavil c'usiuc no'ox te'tical chone. Ti buch'utic nopol ta x'ech'ique, sjic' xa yo'ntonic, sjim xa sjolic ta slabanel comel.