Read Tzotzil Sofonías 3 Bible Online

Sofonías 3 - Tzotzil bible

Sofonías 3

¹Mu xa ono'ox cha'beluc un, toyobba jteclum Jerusalén, ti asoquesoj aba yu'un ti ilbajinvaneje.

²Mu'yuc laj xchiquintabe sc'op ti Diose, mi ja'uc c'ot ta yo'nton ti tojobtasele, mi ja'uc laj spat yo'nton ta stojol, mi ja'uc laj yich'be ye sti' ti Dios yu'une.

³Ti banquilaletic yu'une, co'ol s'elan león ti xloquet no'ox ti snuq'uique. Ja' jech xtoc ti jchapanvanejetic yu'unique, ja' xchi'ilic jun oq'uil ti oyic ta sbajtical banomile, mu jutebuc sbaquil ta sacub yu'unic ti c'usi ta staic ta nutsele.

⁴Ti j'alc'opetic yu'unique mu xa'i sbaic ta j'ech'el, j'ac'vanejetic ta vocol. Jech ti paleetic yu'unique laj xa soquesbeic sc'oplal ti ch'ulnae; laj sju'ic ta teq'uel ti oy c'usi jbel tsots albil yu'un ti Diose.

⁵Ja' no'ox un, ti Diose li' oy ta jteclume, yu'un ja' yac'ojbe yipal ta spasel ti c'usi leque, ma'uc ti c'usi chopole. Ti jujun c'ac'al ta x'ech'e, mi ja'uc ta xch'ay sc'oplal yu'un, ja' ta xc'ot ta pasel ti lec tuc' snopbenal yu'une. Ja'uc ti buch'u toj chopole mi ja'uc xa xa'i jutebuc ti q'uexlale.

⁶Xi ta xal ti Diose: “Laj xa jlilin ti muc'tiquil lume, laj xa jip yalel ta lum ti toyol luchlebaletic ti stsacoj sba xchi'uc ti moquetique, ti sts'ijlajan xa laj quicta comel ti beetic yu'unique. Mu xa junuc ti jxanvil ta x'ech'e; ti jech sts'ijlajan xa com ti steclumalique, tub sc'oplal ta j'ech'el ti jnaclejetic yu'une.

⁷Xichi laj jnope: ‘Ti jech le'e, ja' to jech ta xlic xi'taicun ti jteclum Jerusalene, ja' to jech ta xc'ot ta yo'nton ti tojobtasele, yo' jech mu pocholuc ta xcom ti snaique, oy tsitsel ta stojolic.’ Bu xa ta un, ti stuquique stoyel laj ya'iic, lic yac'beic yipal ta spasel scotol ti c'usitic chopole.

⁸“Jech o xal un, xamala xa no'ox ava'iic ti yorail sc'ac'alil ti c'alal ta xlic jva'an jba ta acontrainelique. Ti vu'un Diosune, mu me lo'iluc no'ox ti xi ta xcale: Chapal xa cu'un ti ta jtsob ti muc'tiquil lumetique xchi'uc ti ajvaliletique, yo' jech ta jbusanbe ta sbaic ti scapemal jole, ti stilemal sc'ac'al co'ntone. Scotol banomil lilijem ta xcom yu'un ti sc'ac'al sti'emal jole.

⁹“C'alal ta xc'ot ta pasel ti va'i s'elan taje, ta xcac'be yutsil ye sti'ic ta c'opojel ti jteclumetique yo' jech scotolic ta xistaic ta c'oponel ti'inel, yo' jech scotolic ta xac' sbaic ta tunel ta jtojol.

¹⁰Ti jteclumaltac ti xi tanijemic batel ta jot uc'um yu'un ti Etiopiae, ta xich'beicun talel matanaletic ti xvocoletic xa vulel ta jtojole.

¹¹Ti c'ac'al taje, jteclumal, ta xtub sc'oplal avu'un ti q'uexlalot yu'un ti c'usitic chopol laj apas ti laj atoy aba ta jtojol xchi'uque. Ta jch'ac loq'uel ta atojol ti buch'utic toj jchopolique, ti jelavem ti stoyobbailique, ti j'ech'el mi ja'uc xa ta xavac' ta ilel ti atoyobbail ta ch'ul vits cu'une.

¹²Ja' no'ox ta jcomtsan ta atojol ti jnaclejetic ti peq'uel yac'oj sbae, ti xlajetic no'oxe, ti spatoj lec yo'ntonic ta jtojole.

¹³Ti c'u xa yepal cuxul com ti jteclum Israele, mi ja'uc xa ta xlic spasic ti c'usi mu'yuc smelole, mi ja'uc ta sjutic c'op, mi ja'uc xa oy ta ye ta sti'ic ta yalel ti c'usi ta soquesvane. Ta sta lec ti sve'el yuch'omique, mi ja'uc oy xi'el ta xa'iic ti ta xcux yo'ntonique.”

¹⁴Q'uejinan, jteclum Sión. Vochetanic ta muyubajel, jteclum Israel. Muyubajan, jteclum Jerusalén, ta sjunuluc avo'nton, muyubajan.

¹⁵Ti Diose laj xa sten loq'uel ti chapal xa ox ac'oplal ta xavich' yu'une, laj xa sjip loq'uel ti avajcontrataque. Ti Dios Ajvalil yu'un ti Israele, oy ta atojol, ti mu xa c'usi jtosucal chopol ta xaxi' yu'une.

¹⁶Ta yorail ti jech c'ac'ale taje, xi ta x'albat ti jteclum Jerusalene: “Mu xaxi', jteclum Sión, mu teyuc no'ox aq'ueloj aba ti lubtsajem xa ti avoc ac'obe.”

¹⁷Ti Ajvalil ti ja' Dios avu'une, tey oy ta atojol, jelavem ti smuc'ul stsatsale, ta stic' sba ta apojel. Xmuyubaj no'ox ta atojol ti Diose. Ti jech mu xa xtuch'ot ta yo'ntone, ta xac'bot ach' acuxlejal. Ti jech xmuyubaje, ta xlic q'uejinuc

¹⁸co'ol s'elan oy ta jun q'uin ta xa'i. Ti Diose xi ta xale: “Ta jpojot loq'uel ta stojol ti c'usi chopol ta xilbot avocole, ti q'uexlalil ti lamal ta atojole.

¹⁹Ti jech c'ac'al taje, ta jva'an jba ta scontrainel scotol ti buch'u ta xilbot avocole. Ta jtic' jba ta spojel ti coxov chije. Ta jsa' talel ti bu ch'ayeme. Ti bajbil tenbil c'ote, ti tan jpuc batel ta sbejel banomile, ta joybinbe ta slequilal yutsilal.

²⁰Ti jech yorail taje, ta xquic'oxuc talel, ta jtsoboxuc talel, ta jel ti c'usi q'uelel xa ta atojolique, ta jpuc batel ti oy c'usi lec laj ataique, yu'un cajal ac'oplal ta xc'ot ta stojol scotol ti jteclumetic ti oy ta banomile. Jech laj cal ti vu'un Diosune.”