Read Tzotzil Hageo 1 Bible Online

Hageo 1 - Tzotzil bible

Hageo 1

¹Ti ta xchibal (2) xa ox jabil yochel ta ajvalilal ti Darioe, ti ta sliqueb c'ac'al yu'un ti svaquibal ue, ta sventa ti j'alc'op Hageoe, tal c'opojuc Dios ta stojol ti ajvalil yu'un ti jteclum Judae, ja' ti Zorobabel ti ja' xnich'on ti Salatiele, xchi'uc ta stojol ti banquilal yu'un ti paleetique, ja' ti Josué ti ja' xnich'on ti Josadaque.

²Va'i taj une, xi ta xal ti Dios ti scotol xu' yu'une: “Ti jteclum li'e xi ta xalique: ‘Mu to ta xc'ot sc'ac'alil yorail ti ta xlic yich' cha'va'anel xch'ulna ti Diose.’ ”

³Ja' jech xtoc un, xi c'opoj talel ti Dios ta sventa ti j'alc'op Hageoe:

⁴“Ja'uc ti vo'oxuc une, ¿mi ja' xa yorail avalojic ti nacaloxuc xa ta jun yutsiquil c'upil sba naetic ti c'alal ja' stuc slilijemal busul ti jch'ulnae?

⁵Ti vu'un Diosun ti scotol xu' cu'une, ta xcalboxuc ava'iic ti nopo ava'iic lec ti c'u a'elanique.

⁶Ti vo'oxuque, ep ti c'usitic ta xats'unique, c'u stu un, mu epuc ta xloc' c'alal ta xatsobique. Ac'o mi lec ta xave'ic, mu xanojic lec ta xava'iic. Ac'o mi lec ti c'usi ta xataic ta uch'ele, oy no'ox taqui ti'il ta xava'iic. Ac'o mi oy lec ti ac'u' apoq'uique, mu'yuc no'ox xq'uixnal ta xava'iic. Ja' jech xtoc ti buch'u ta sa' tojele, ta jatal coxtal ta stic' ti yuni tojol ta abtele.

⁷Ti vu'un Diosun ti scotol xu' cu'une, ta xcalboxuc ava'iic ti nopo ava'iic ti c'u a'elanique.

⁸Batanic ta te'tic. Sa'ic talel ti te'etique. Ochuc sc'oplal avu'unic ta xcha'meltsanel ti ch'ulnae. Ximuyubaj no'ox tey oyun, ta xcac' ta ilel ti jlequilal cutsilale.

⁹“Ti vo'oxuque, ep ti c'usi ta xatsob ava'iique. C'u stu un, uni juteb c'o ta xataic. Ti c'usitic ta xaq'uej ta anaique, ta ic' ta maj no'ox ta xbat cu'un. ¿C'u cha'al un? ja' ta scoj ti tey no'ox aq'uelojic ti stuc slilijemal busul ti jnae. C'ajomal atijoj avo'ntonic ti avac'ojbeic yipal ta sva'anel ti anaique. Ti vu'un Diosune, mu me lo'iluc no'ox ta xcal.

¹⁰Jech o xal un, mi ja'uc ta xtal ti vo' ta atojolique. Mi ja'uc ta xac' ti c'usitic xloc' x'ayan yu'un ti banomile.

¹¹Vu'un ta jmantal ti laj cac' taluc ti muc'ul corixma ta stojol ti avosil abanomile, xchi'uc ti ta vitsetique, ti ta trigoetique, ti ta uvaetique, ti ta olivo te'etique, xchi'uc ti c'usitic xloc' x'ayan yu'un ti osile, xchi'uc ta stojol ti jnaclejetique, ti chon bolometique, xchi'uc scotol ti avabtelique.”

¹²Jech ti Zorobabele, ti Josuee, ti c'u to yepal oy ti jnaclejetique, och xi'el ta yo'ntonic c'alal laj ya'iic ti va'i s'elan laj yal ti Dios ta sventa ti j'alc'op Hageoe, ti jech ac'bat sbain ta yalel yu'un ti Dios ti ja' Ajvalile.

¹³Ja' yu'un un, ti Hageo j'alc'op yu'un ti Diose, xi xvulvun liquel ta yalel ta sventa ti Diose: “Ti Diose xi ta xale: ‘Ti jech Diosune, li' jchi'inojoxuque. Mu me lo'iluc no'ox ta xcal.’ ”

¹⁴Ja' jech s'elan c'ot ta pasel yu'un ti Dios ti laj yac'be yip yo'nton ti Zorobabel ti ja' ajvalil yu'un ti jteclum Judae, xchi'uc ti Josué ti ja' banquilal yu'un ti paleetique, xchi'uc ti c'u yepal ti jnaclejetique.

¹⁵Ta xchanibal xcha'vinic (24) c'ac'al yu'un ti svaquibal (6) u ti ja' xchibal (2) jabil yochel ta ajvalilal ti Darioe, ja' o lic xcha'meltsanbe xch'ulna ti Dios yu'une, ti ja' Ajvalil ti scotol xu' yu'une.