Read Tzotzil Zacarías 1 Bible Online

Zacarías 1 - Tzotzil bible

Zacarías 1

¹Ti ta xvaxaquibal (8) u yu'un ti xchibal (2) xa jabil yochel ta ajvalilal ti Darioe, ti Diose xi laj yalbe ya'i ti j'alc'op Zacariase, xnich'on ti Berequiase, ti ja' smom xtoc ti Idoe:

²“Ti jech Diosun ti scotol xu' cu'une, toj ep li'ilin yu'un ti atot ame'ic ta vo'nee.

³Ja' yu'un avi tana li' une, xi xavalbe ya'iic ti jteclumal ti vu'un laj cale: ‘Ti Dios ti oy smuc'ul stsatsale, xi ta xale: Sutanic talel ta jtojol, jech ti vu'une ta xisut talel ta atojolic. Mu me lo'iluc no'ox ta xcal ti vu'un Diosune.

⁴Mu me jechuc xapasic jech c'u cha'al laj spasic ti atot ame'ic ta vo'nee, ti albatic yu'un ti ba'yel j'alc'opetic ti c'opojic ta jventae, ti ac'o yicta sbaic ta spasel ti c'usi mu lecuc ta q'uelele, ti c'usitic chopol ta spasique. C'u stu un, ti stuquique mi ja'uc laj xchiquintabeicun, mi ja'uc laj xch'unbeicun. Mu me lo'iluc no'ox ta xcal ti vu'un Diosune.

⁵Avi tana le' une, ¿bu oyic ti atot ame'ic ta vo'nee? ¿Mi yu'un sbatel osil cuxulic ti j'alc'opetic xana'ique?

⁶Ja'uc ti jc'ope, ti jmantaltaque, ti laj cac'be sbainic ti cajtunel j'alc'optaque, laj yalic ta stojolic ti atot ame'ic ta vo'nee. Jech ti stuquique sutic talel ta jtojol, yu'un laj sna'ic ti vu'un Diosun ti scotol xu' cu'une, ti jech laj jpasbeic ta stojolic jech c'u cha'al ti c'u s'elan loc' ta nopel yu'unique xchi'uc ti c'usitic laj spasique.’ ”

⁷Ti ta xchanibal xcha'vinic (24) c'ac'al yu'un ti sbuluchibal (11) ue, (ti sbiinoj yual Sebate) ti ja' xa xchibal (2) jabil yochel ta ajvalilal ti Darioe, xi s'elan ti Dios tal yalbun ti vu'un j'alc'op Zacaríasune, xnich'onun ti Berequiase, smomun xtoc ti Idoe.

⁸Oy jun ac'ubal ti xi s'elan li'ac'bat quil ti jam ti jba jsat ta yilele: Laj quil ti oy buch'u cajal ta jcot tsajal ca' ti cotol ta jun stenlejaltic ti sucul ta yut te'tic ti sbiinoj arrayanetique. Ti xjelav ech'el ta spat xtoque, oy jtsop ca'etic ti ja' tsojique, ti ja' ic' pojan sba stsajale, ti saquic ta q'uelele.

⁹Va'i un, xichi laj jaq'ue: “Cajval, ¿buch'uic ti jcajlejetic ta ca' le'e?” Ti ánjel ti yacal ta xic'opoj xchi'uque, xi laj stac'bune: “Ta xcac'bot avil buch'uic le'e.”

¹⁰Va'i un, ti buch'u sucul ta yut te'tique, xi laj yale: “Le'e, ja'ic ti buch'utic tacbilic batel yu'un Dios ta xaniel ti banomile.”

¹¹Jech ti buch'u cajalic ta ca'e, xi laj yalbeic ya'i ti yaj'ánjel Dios ti sucul ta yut te'tic ti sbiinoj arrayanetique: “Laj xa jxanicutic scotol ti banomile. Laj quilcutic ti mu'yuc c'usi sna'ique, jun yo'ntonic.”

¹²Jech ti yaj'ánjel Diose xi laj yale: “Cajval Dios ti scotol xu' avu'une, oy xa ta lajunebal xchanvinic (70) jabil ti ilinemot yu'un ti jteclum Jerusalene xchi'uc ti jteclumetic yu'un ti Judae. ¿C'u to sjalil sc'an xtoc un ti ta xlic ayanuc ti syail xc'uxul avo'nton ta stojolique?”

¹³Ti Diose, patob o'ntonal xal yutsil ti sc'op laj stac'be talel ti ánjel ti yacal ta xic'opoj xchi'uque.

¹⁴Laj taj une, laj yalbun mantal ti ánjel ti ac'o xi lic jcaj'ale: “Ti Dios ti scotol xu' yu'une xi ta xale: ‘Ta j'ech'el mu xtuch' ta co'nton ti jteclum Jerusalene xchi'uc ti vits Sione.

¹⁵Jech o xal un, til xa sc'ac'al co'nton yu'unic ta scontrainel ti jteclumetic ti mu'yuc no'ox c'usi xal ti yo'ntonic ta j'ech'ele. Yu'un ja' o lic stic' sbaic ta spasel ti c'usitic chopol c'alal ja' o stac' to ox ts'iquel ti sc'ac'al co'ntone.

¹⁶Ja' yu'un un cha'e, ti jech Diosune xi ta xcale: Avi tana li'e, lic xa ayanuc syail xc'uxul co'nton yu'un ti jteclum Jerusalene, ac'o licuc xcha'meltsanel ti jch'ulnae xchi'uc ti jteclume.’ ”

¹⁷Ti ánjele xi laj yalbun no'ox xtoque: “Li'e, xi xacaj'al xtoque: ‘Ti Dios ti scotol xu' yu'une xi ta xale: Yu'un mu no'ox albajuc liquel ti oy c'usi ta sta cu'un ti jteclumale, ti yan velta caj tsacal ta xc'otic cu'une. Ta ach' ta jpatbe liquel yo'nton ti vits Sione. Ta ach' ta jvinajesbe liquel sc'oplal ti jteclum Jerusalén ti ja' jteclum ti t'ujbil cu'une.’ ”

¹⁸Yan to velta laj quil ti jam ti jba sate, laj quil ti vinaj chanib (4) xulubiletique.

¹⁹Ti ánjel ti yacal ta xischi'inun ta lo'ile, lic jac'be c'usi smelol ti chanib (4) xulubiletique. Xi laj stac'bun une: “Ti xulubiletic le'e, ja' ta xac' ta na'el ti ja' to ox jech s'elan smuc'ul stsatsalic ti jteclumetic ti tan puquic loq'uic batel ti jnaclejetic yu'un ti jteclum Judae, ti Israele, ti Jerusalene.”

²⁰Ts'acal to un, laj yac'bun quil ti Dios ti vinaj talel yu'un chanib (4) jten-taq'uine.

²¹Va'i un, xi lic jac'bee: “¿C'usi tal spasic ti chanib (4) jten-taq'uinetic le'e?” Ti stuque xi laj stac'bune: “Ti xulubiletic ti laj avile, ja' ta xac' ta na'el ti buch'utic tan puc loq'uic batel yu'un ti jnaclejetic yu'un ti jteclum Judá ti mu cha'beluc stoy ti sjolique. Avi tana le' xtoc une, talic ti jten-taq'uinetic li'e, ti ta xniquic ta xi'el yu'unic ti muc'tiquil lum ti tuch'bat ti yipique, ti xluchumaj to ox ta xluchel ti jteclum Judá ti tan puc bat ti jnaclejetic yu'une.”