Read Tzotzil Zacarías 10 Bible Online

Zacarías 10 - Tzotzil bible

Zacarías 10

¹C'anbeic Dios ti ac'o yac' talel chaquilo' ta yorail ta xlic yaxubuc ti banomile. Ti Dios ti xc'avlajet no'ox yu'un ti chauque ta xac' taluc vo' ti bu c'alal ta xtune. Yax ju'an no'ox liquel ti momol abnal ta avosil abanomilique.

²Ti oy xa c'usi laj yal yalojic ti meltsanbil loc'obbailetique, naca jutbil, ti c'usi ta xilic yalojic ti jt'unvanejetique, naca yesomal jolil no'ox. Ti c'usitic ta xaq'uic ta na'ele co'ol s'elan vaichil ti mu'yuc c'usi ta xc'ot ta pasel yu'une, jeche' no'ox ta ic' ta xbat ti patob o'ntonal ta xalic xtoque. Jech o xal un, ti jteclume xtal xbat no'ox ta jujujot ti sjolic jech c'u cha'al epal chij ti oyic ta vocol ta scoj ti ch'abal ti jq'uelvanej yu'unique.

³Jech o xal xi ta xal ti Diose: “Mu xa sts'ic cu'un ti sti'emal jol yu'un ti jq'uel-chijetique, ta jtsits ya'iic ti buch'utic sbainojic ta svolel ta tsobel ti jteclumale.” Ti Dios ti scotol xu' yu'une, ti Buch'u sbainoj ta sq'uelel ti xchijtac ti ja' snitilultac ti Judae, ja' ta xc'ot ta tsatsaquil ca' yu'un ti ac'-letoe.

⁴Ti ta stojolique, ta xvul ta loq'uel jbej ton ti tsots sc'oplale, ti Pajob-te' yu'un ti Axibalnae, ti Yolob yu'un ti Ac'ob-letoe. Yu'un ti ta stojolique, ta xlic vuluc ta loq'uel scotol ti jpojvanejetique.

⁵Co'ol s'elan soldadoetic ta xc'otic ti ta sjuy sba comel yu'unic ta teq'uel ti ach'el ta bebetique; ta stsalvanic ta j'ech'el, yu'un chi'inbilic yu'un ti Diose, q'uexlal ta xc'ot yu'unic ti jcajlejetic ta ca'e.

⁶Xi ta xal ti Diose: “Ta xcac'be yipic ta j'ech'el snitilultac ti Judae, ta jtic' jba ta spojel snitilultac ti Josee. Ta jcha'volic talel xtoc ta slumalic, ja' ti oy syail xc'uxul co'nton ta stojolique. Ta xcha'ta yav xtoc ti co'ol xa s'elan ti mu'yuc jipoj jtenojic comel yilele, yu'un Ajvalil Diosun yu'unic ti ta xca'ibeic ti sc'opojel sti'inelique.

⁷Co'ol s'elan jun soldado ta xc'ot ti Efraine, ti mu xa c'usi jech o ta xa'i ti smuyubajel yo'ntone, ti co'ol xa s'elan xq'uixet ta xa'i yu'un ti vinoe. C'alal jech ta xilique, xmuyubajic xa ec ti xnich'nabe. Ti jech laj sta ti xmuyubaj xa ta xa'i ti banomile, ja' ta sventa ti Diose.

⁸“Ta jtaic ta iq'uel, ta jtsobic talel, yu'un laj jtic' jba ta spojelic. Ta xlic epajicuc xtoc jech c'u cha'al epajic to ox ta vo'nee.

⁹Tan puc batic cu'un ta yan muc'tiquil lumetic. Manchuc mi jech un, ti c'alal nom xa oyique, tey ta xlic svulesicun ta yo'ntonic. Oy bu jun c'ac'al ti xvoletic no'ox sutel talel xchi'uc ti yalab xnich'nabique.

¹⁰Ta xquiq'uic talel ti jech oyic ta jteclum Egiptoe, ti jech oyic ta jteclum Asiriae. Ta xquiq'uic batel ta jteclum Galaad xchi'uc ti ta Líbanoe. Ta xc'ot ta pasel ti jun yepalic ta j'ech'el ti mu xa x'ochic ta naclej liquele.

¹¹C'alal ta x'ech' xtuch'ic ti muc' ta nab yu'un ti jteclum Egiptoe, yu'un ta jpajes ti jech xva'i xcoti ti syuc'benale. C'alal to sninabil ta jtaquijes ti uc'um Niloe, ta jlilinbe xtoc stoyobbailic ti jteclum Asiriae, ta jtubbe ti jech cajal sc'oplalic ti jteclum Egiptoe.

¹²Ta xcac'be yipic ti xvoletic no'ox batel ta sventa ti jmuc'ul jtsatsale. Jech me ta xcac' que jti' ti vu'un Diosune.”