Read Tzotzil Zacarías 11 Bible Online

Zacarías 11 - Tzotzil bible

Zacarías 11

¹Jamo ti ti'naetic avu'une, Líbano, ac'o lajuc ta c'oc' ti ch'ut te'etic avu'une.

²Oq'uitao aba tojal te', yu'un lom xa ta lum ti ch'ut te'e, yu'un ti c'upil sba te'etique tusul xa com ta lum. Tulanetic yu'un jteclum Basán, me'inal oc'anic, yu'un tusul xa com ta lum ti pimil muc' ta te'tique.

³Avetanic ta yoq'uitael abaic, jq'uel-chijetic, yu'un stuc xa banomil t'ajal com ti bu yavil ti jun yutsiquil xch'iem yaxaltique. Vinaj xa ti xloquet no'ox snuc' ti leone, yu'un tusul xa ta lum com ti c'upil sba pimil te'etic yu'un ti uc'um Jordane.

⁴Ti Cajval Diose xi s'elan ti oy c'usi laj yalbune: “Ba chabio ti chijetic ti chapal sc'oplal ta xbat ti ta smilobiltaque,

⁵yu'un ti jmanolajeletique ma'uc smul ta xa'iic ti ta smilique. Jech ti jchonolajeletique xi ta xalique: ‘Coliyal ti Dios ti jech lic'ot ta jc'uleje.’ Ti j'il-chijetique, mi ja'uc xa oy syail xc'uxul yo'nton yu'un ti chije.

⁶Ja' yu'un un cha'e, ja' no'ox jech ta jpas ta stojolic, laj to sc'oplal ti oy syail xc'uxul co'nton yu'un ti jnaclejetic ti li' ta muc' ta jteclume. C'ajomal no'ox ta xcac' ochicuc ta c'abal yu'un ti slac'nataque xchi'uc ta yoc ta sc'ob ti ajvalil yu'une. Taje, ta stubbe sc'oplal ti muc' ta lume, mi junuc ta jpoj mi ochic ta c'abale. Ti vu'un Diosune, mu me lo'iluc no'ox ta xcal.”

⁷Va'i un, lic jbain ta sq'uelel ti chijetic ti chapal sc'oplal ta xbat ta smilobile. Lic jbain ti c'u s'elan sventainojic to ox ti buch'u oy to ox ta yoc ta sc'obique. Ja' jech xtoc xi s'elan laj jsa' chib namte'aletique. Ti june, laj cac'be sbiin “C'uxubinvanej”. Ti jun xtoque, laj cac'be sbiin “Jpasvanej ta Jun”.

⁸Ta jun no'ox u, laj jtuch'be yabtel oxib j'il-chijetic ta scoj ti xcapet no'ox sjolic ta jtojole, yu'un laj ti sts'iquemal xcuchemal cu'une.

⁹Ti chijetique xi laj calbe ya'iique: “Ta j'ech'el mu'yuc xa ta jtic' jba ta aq'uelelic. Ti mi oy bu ta xachamique, chamanic. Ti mi oy buch'u ta smiloxuque, ac'o smiloxuc. Mi oy to bu cuxul lacomique, tsutseso abaic ta ti'el.”

¹⁰Laj jtsac ti jnamte' ti sbiinoj “Jc'uxubinvaneje”. Laj jc'as ti ja' svinajeb ti mu'yuc xa stu c'ot ti trate ti laj spas ti Dios ta stojol scotol ti muc'tiquil lumetique.

¹¹Ti jech c'ac'al taje, mu'yuc xa stu com ti tratee. Ti buch'utic oy ta yoc ta sc'obic ti chije, yac'oj satic ta jtojol. Lic yaq'uic ta venta ti ja' stuc ti Dios ta xc'opoj ta sventa ti oy c'usi ta xcale.

¹²Va'i un, xi laj calbeic ya'iique: “Ti mi lec ta xava'iique, tojic ti jc'ac'ale. Yan mi mu lecuc ta xava'iique, ch'an chanic.” Va'i un, laj yac'beicun lajuneb xcha'vinic (30) ta sep plata taq'uin.

¹³Ti Diose xi laj yalbune: “Tsaco ti sepequil taq'uin ti stuc xa no'ox jech jun yutsil jtojol ti laj xchapic ta yalel ti c'u yepal xitojolin oe. Tic'o ochel ta xcaxail yavil taq'uin yu'un ti ch'ulnae.” Laj jtsac batel ti lajuneb xcha'vinic (30) ta sep taq'uine. Laj jtic' ochel ta xcaxail yavil taq'uin yu'un ti ch'ulnae.

¹⁴Ts'acal to un, lic jc'as ti xchibal namte'il ti sbiinoj “Jtsobvaneje”. Ja' jech c'ot ta pasel ti mu'yuc xa stu c'ot ti jun xil sbaic ti jteclum Judae xchi'uc ti jteclum Israele.

¹⁵Ti Diose xi laj yalbune: “Avi tana li'e, c'otan jech c'u cha'al junuc j'il-chij ti mu sventain ta sq'uelel ti xchije.

¹⁶Ti ta jteclum li'e, ta jva'an jun j'il-chij ti mu ja'uc jutebuc ta svul yo'nton yu'un ti jcotcovil chije. Mu ja'uc ta sa' xtoc ti ch'ayem xa batele. Mu ja'uc ta xpoxta xtoc ti yayijemique. Mi ja'uc ta xac'be sve'el ti ch'abal xa yipe. Ja' no'ox lec ta xa'i ta sti'be sbec'tal ti bu lec jubeme. Mi ja'uc oy c'usi ta xictabe comel ti svoy xtoque.

¹⁷Mu xa ono'ox cha'bel un, ti uni pochan j'il-chij ti lamal ta xicta comel ti c'u yepal volol ti chije. Ac'o jimbatuc espada ya'i ta sc'ob xchi'uc ti sbats'i sbec' sate. Ch'ayuc sc'oplal ta j'ech'el ti sc'obe. T'usuc ta j'ech'el ti sbec' sate.”