Read Tzotzil Zacarías 13 Bible Online

Zacarías 13 - Tzotzil bible

Zacarías 13

¹“Ti jech yorail taje, ta xvul ta t'omel jun sat vo' yo' jech ta spoquic ta smesic loq'uel smulic, ta smesel stusel loq'uel xchopolal snitilultac ti Davide xchi'uc ti jnaclejetic yu'un ti jteclum Jerusalene.

²Ti ta scotol ti jteclum li'e, ta xc'ot ta pasel ti ta jtubbe sc'oplal sbitac ti loc'obbailetique yo' jech mu'yuc no'ox staoj yav ti c'oponbil ti'inbile. Ja' jech xtoc ti li' ta jteclume, ta jtubbe sc'oplal ti sbisoj sbaic ta j'alc'opetic yilele xchi'uc scotol ti jyanijes jol o'ntonale. Jech ta xc'ot ta pasel cu'un ti vu'un Diosune.

³“Va'i un, c'alal mi oy buch'u oy c'usi sc'an ta scaj'ale, xi ta x'albat yu'un ti stot sme'e: ‘¡Ta xavac' o ajol abaquil xchi'uc. Ta xajoybin ta sc'op Dios ti c'alal naca no'ox jutbil ti c'usi ta xacaj'ale!’ ¡Ta xmile ta cuchilu yu'un stot sme' ti c'alal ta sbis sba ta jun j'alc'op yilele!

⁴Ti jech yorail taje, ti j'alc'opetique ta xq'uexavic xchi'uquic ta yalel ti c'alal ta xalic ti oy c'usi laj yilic ti ta to xc'ot ta pasele. Mi junuc ta xlajic ta lo'lael yu'un manchuc mi slapic c'u'il ti meltsanbil ta nucul ti ja' c'u'il yu'un ti j'alc'opetique.

⁵C'ajomal no'ox xi ta xalbe sbaic ti jujune: ‘Ma'ucun ma' ti j'alc'opune, c'ajomal no'ox jun jchabajelun. Ta jbic'tal no'ox lic cabtelan talel ti osile.’

⁶Ti mi oy buch'u xi ta sjaq'ue: ‘¿C'usi c'ot ta pasel ti oy senyail yayijemot une?’, xi ta stac' ti stuque: ‘Oy buch'u laj syayijesun ta sna ti buch'u lec xquil jba xchi'uque.’ ”

⁷Ti Dios ti scotol xu' yu'une xi ta xale: “Va'lan, tec'lan un, espada, tsaco ta milel ti caj'il-chije. Tsaco ta milel xtoc ti caj'coltaobbae, milo ti j'il-chije, jech ti jvoc' chijetique, tan puc ta xbatic, yu'un ti vu'un eque ta jcontrain ti uni ch'iom chijetique.

⁸Ti oxvoc' jnaclejetic ti li' ta muc' ta lume, ta xc'ot ta pasel ti ta xchamic cha'voq'ue, c'ajomal xa no'ox jvoc' ti cuxul ta xcome.

⁹Jech ti jvoc' ti cuxul to ta xcome ta jtiq'uic ya'iic ochel ta c'oc' yo' jech ta xich' lecubtasel jech c'u cha'al ta xich' lecubtasel ta c'oc' ti plata ti oroe. Jech ti stuquic une ta xlic vocoleticuc ta jtojol. Ti vu'un ec une ta jtac'beic ti sc'opique. Ta xcalbeic ya'iic ti ja' jteclumaltaque. Ti stuquic une xi ta staq'uique: ‘Ti Ajvalile ja' ti Dios cu'untique.’ Jech ta xc'ot ta pasel cu'un ti vu'un Diosune.”