Read Tzotzil Zacarías 2 Bible Online

Zacarías 2 - Tzotzil bible

Zacarías 2

¹Jam jba jsat xtoc, laj quil jun vinic ti stsacoj batel ta sc'ob ti sbisobile.

²Va'i un, xichi laj jac'bee: “¿Bu ta xabat?” Jech ti stuque xi laj stac'bune: “Ta xbat jbis ti jteclum Jerusalene yo' jech ta xich' na'el c'u snatil xchi'uc c'u sjamlej.”

³Va'i un, ti ánjel ti laj to ox xchi'inun ta lo'ile, loc' batel, nupbil ta be c'ot yu'un yan ánjel

⁴ti xi albat xtoque: “Batan ta anil, ti xi xba avalbe ya'i ti buch'u yich'ojbe ti sbisobile: ‘Ti jteclum Jerusalene, ta ach' ta xlic ayanuc jnaclejetic ti ep ta j'ech'ele xchi'uc ti chon bolometic yu'unique, laj to ta alel ti ta xich' maquel ta moque.

⁵Ja' no'ox un, ti Diose xi s'elan ti sva'anoj sba ta yalele: Ta joyic ta maquel ta moc ti co'ol s'elan c'oc' ta xtile. Ti ta o'lol ti jteclume, ta xcac' ta ilel ti jlequilal cutsilale.’ ”

⁶Ti Diose xi ta xale: “Jatavanic loq'uel ta anil ti oyoxuc ta yolon ti yolon xocon sloq'ueb c'ac'ale, ti tan puc labatic to ox cu'un ta xchanjechal ti banomile.

⁷Ja' jech xtoc, jteclum Sión, ti alac'nainoj abaic xchi'uc yalab xnich'nabtac ti jteclum Babiloniae, jatavanic loq'uel.”

⁸Ti Dios ti scotol xu' yu'une laj stacun talel ta stojol ti jteclum ti buch'u laj spojboxuc ti c'usitic x'ayan avu'unique, ti xi ta xich' albel ya'i ta sventa ti Diose: “Buch'uuc no'ox ta sta ta tijel ti jteclumale, ja' ta sta ta tijel ti yuninal jsate.

⁹Jech o xal un, ta me jyales coc jc'ob ta stojolic yo' jech ta xpojbat yu'un smosovic ti c'usitic x'ayan yu'unique.” Ja' jech ta svinajes yutsilal slequilal ti Dios ti scotol xu' yu'une. Ti jech taj une, ta xlic ana'ic ti ja' tacbilun talel yu'un ti Diose.

¹⁰Mu lo'iluc no'ox ti xi ta xal ti Diose: “¡Muyubajanic ta q'uejimol, jnaclejetic yu'un jteclum Jerusalén, yu'un ta xtal jchi'inoxuc ta naclej!”

¹¹C'alal jech ta xc'ot ta pasele, ep muc'tiquil lumetic ta xtal stijliic ti Diose, ti xi ta x'albat ti sc'oplalic yu'une: “Ti jteclumetic le' xtoque, ja' cu'untac. Ta jchi'inoxuc ta naclej.” Ti jech taj une, ta xlic ana'ic ti ja' tacbilun talel yu'un ti Dios ti scotol xu' yu'une.

¹²Jech ti Diose, ta ach' ta xlic yu'nin yan velta ti ch'ul banomil ti tsots sc'oplal ta xa'ie, ti ja' sc'oplal ti jteclum Judae. Yu'un ta ach' ta xlic spucbe sc'oplal xtoc ti jteclum Jerusalén ti ja' steclumal t'ujbil yu'une.

¹³¡Scotol banomil, ts'ijlicuc ta stojol ti Diose, yu'un ta xtal ta jtojoltic c'alal to ta xch'ul-avil ti bu ono'ox oye!