Read Tzotzil Zacarías 3 Bible Online

Zacarías 3 - Tzotzil bible

Zacarías 3

¹Laj taj une, jech ti Diose laj sjambun jba jsat ta sq'uelel ech'el ti Josué ti ja' banquilal pale ti va'al ta sts'el ti yajánjel Diose. Ta jot xocon ti oy ta stuq'uil sbats'i c'ob ti Josuee, va'al ec ti jtic'mulil ánjel ti chapal xa yu'un ti c'u s'elan ta stic'be ti smule.

²Va'i un, ti yaj'ánjel Diose xi laj yalbe ti jtic'-mulil ánjele: “¡Dios ac'o xasvulot ava'i! ¡Ac'o xasvulot ava'i ti Dios ti oy syail xc'uxul yo'nton yu'un ti jteclum Jerusalene! Ti vinic le'e, co'ol s'elan jun tilem ac'al ti laj yich' loq'uesel talel ta yavil ti bu ta xc'aq'ue.”

³Ti Josuee mu'yuc smelol yic'obal sc'u' slapoj ti va'al ta sts'el yaj'ánjel ti Diose.

⁴Va'i un, ti ánjele laj yalbe mantal ti yajcoltaobbataque, ti ac'o sloq'uic ti c'u'il ti jech mu'yuc smelol xchi'uc yic'obal slapoj ti Josuee. Ts'acal to un, xi albate: “Ti jech le'e, ja' smelol ti laj jtub laj jch'ay ti amule. ¡Avi tana li' une, ja' ta jpas ta atojol ti ac'o yaq'uic alap ti c'u'il sventa pasob q'uine!”

⁵Laj taj xtoc une, laj yalbe mantal ti yajcoltaobbataque, ti ac'o yac'beic lequil poc' sts'ot sjol ti Josuee. Jech ti stuquic une laj sts'otbeic ti sts'ot sjole. Laj taj xtoc une, laj yac'beic slap ti pasob-q'uin c'u'ile. Jech ti ánjel eque, ch'an xi va'al o ta sts'el.

⁶Ts'acal to taj xtoc une, ti yaj'ánjel Diose xi laj yalbe ti Josuee:

⁷“Xi s'elan ta xal ti Dios ti scotol xu' yu'une: ‘Tamo batel ti jbe ti bu jtamoj batele. C'otuc ta pasel avu'un scotol ti c'u yepal laj cac' abain ta spasele. Ti mi jech ta xapase, ta xacom ta sbainel ti jch'ulnae. Ta xatuc'ulan ta sq'uelel lec ta sjoylej xchi'uc ti yamaq'uiltaque. Jech ta xcac'bot avich' cajal avabtel jech c'u cha'al ti ánjeletic ti ta xtunic cu'une.

⁸Josué ti banquilal paleote, a'yio ava'i lec li'e. Ac'o ya'iic lec xtoc ti achi'iltac ta abtel ti yich'oj yabtelic ta paleale. Acotolic ti vo'oxuque c'otemoxuc ta senyail c'op ti xi ta xale: Ta xcac' vuluc ta loq'uel ti cajtunele, ja' ti Sq'uelomal Ts'unubile.[1]

⁹Ta jbejan ta stojol Josué ti jbej ton ti yich'oj vucjot (7) yelove, ti ta jluch ta ts'ibael ti c'usi sc'an ta xale. Mi laj taj une, ta jun no'ox c'ac'al, ta jtub ta jch'aybe smul ti muc' ta lum li'e.

¹⁰C'alal mi c'ot ti sc'ac'alil taj une, xu' ta xavalbe abaic ti mu'yuc c'usi xana'ique, ti jun xa avo'ntonic ta xave'ic ta xavuch'ic vo' ta jujun tal ta yolon yaxinal ti a'uvaique, ti a'icuxique. Ti vu'un Diosun ti scotol xu' cu'une, mu me lo'iluc no'ox ta xcal.’ ”