Read Tzotzil Zacarías 4 Bible Online

Zacarías 4 - Tzotzil bible

Zacarías 4

¹Va'i un, ti ánjel ti yacal ta xilo'ilaj xchi'uque laj sjoybin talel sat ta jtojol ti toj viq'uel c'ot ti jsat yu'un jech c'u cha'al ta xich' tijel ti buch'u vayale, ti xi laj sjac'bune:

²“¿C'usi ta xavil yilel?” Xichi laj jtac'bee: “Ja' jun pajleb cantila ti meltsanbil ta oroe, ti yich'oj xch'amleb aceite ta sbae. Yu'un ti ta toyole yich'oj vucub (7) lámpara ti oy jujun sbetac ti aceite ti ta xlic talel ta yavile.

³Ti bu oy ti pajleb cantilae, oy cha'tec' (2) olivo te', ti teq'uel jun ta stuq'uil bats'i c'obile, ti teq'uel jun ta stuq'uil ts'et c'obile.”

⁴Xichi laj jac'be ti ánjel ti yacal ta xilo'ilaj xchi'uque: “¿C'usi smelol ti vi s'elan le' une, yojtot?”

⁵Xi laj stac'bun ti ánjele: “¿Mi mu xana' c'usi smelol?” Xichi laj jtac'bee: “Bats'i mu jna' ma' taje, Yojtot.”

⁶Jech ti stuque xi laj sts'ac batel ta yalel ti lo'ile: “Ti le'e, ja' slo'il ya'yej ti Dios ti xi ta xalbe ya'i ti Zorobabele: ‘Ma'uc xa tsots sc'oplal ti epal soldadoetique. Ma'uc xa tsots sc'oplal ti yipal yu'un ta j'ech'ele. Ti le'e, ja' xa ta xc'ot ta pasel ta jcuxlej jtuc, xi ti Dios ti scotol xu' yu'une.

⁷¿Buch'uot la ya'yel ta xabis aba le' une, muc' ta vits? ¡Yu'un mesel ta xacom yu'un ti Zorobabele! Yu'un ti stuque ta xlic sloq'ues talel ti sliquebal tone, ti c'alal xi x'avlajetic liquel ti jnaclejetique: ¡Toj c'upil sba! ¡Yu'un toj c'upil sba ta j'ech'el!’ ”

⁸Ts'acal to xtoc un, ti Diose xi to laj yalbun talel yan slo'ile:

⁹“Ti Zorobabele laj xa xchotanbe sliqueb yoctac ti ch'ulna li'e. Ja' ta xc'ot ta stsutsel yu'un xtoc.” Ja' to jech ta xana'ic ti ja' tacbilun talel yu'un ti Dios ti scotol xu' yu'une.

¹⁰“Ti buch'utic mu'yuc xaq'uic ta venta ti c'u s'elan uni juteb lic talele, xmuyubajic no'ox ti c'alal ta xilic ti ta xc'ot ta tsutsel ti abtel yu'un ti Zorobabele”, xi ti Diose. Laj taj une, xi to laj sts'ac batel slo'il ti ánjele: “Ti vucub (7) lamparaetic le'e, ja' me sat ti Dios ti xchajoj ta q'uelel sbejel ti banomile.”

¹¹Xichi laj jac'be xtoque: “¿C'usi sventa ti cha'tec' (2) olivo te' ti oy ta jujot xocon ti spajleb cantilae?”

¹²Ma'uc no'ox taje, yu'un xichi to laj jac'be xtoque: “¿C'usi smelol ta xac' ta na'el ti cha'chex sc'ob olivo te' ti jmoj oy xchi'uc ti bu ta x'ech' ti aceite ti ta xc'ot ta lamparaetic ti meltsanbil ta oroe?”

¹³Xi laj stac'bun xtoc ti ánjele: “¿Mi mu xana' c'usi smelol?” Xichi laj jtac'bee: “Bats'i mu jna' ma' taje, Yojtot.”

¹⁴Xi laj stac'bun ti stuque: “Ti le'e, ja'ic ti cha'vo' ti laj yich'ic t'ujel ti c'otic ta yajtunel Dios ta sbejel banomile.”