Read Tzotzil Zacarías 6 Bible Online

Zacarías 6 - Tzotzil bible

Zacarías 6

¹Jam jba jsat no'ox xtoc, laj quil ti vul ta loq'uel chanib carreta yu'un ac'ob-leto ta o'lol yu'un chib vitsetic ti xlaplun no'ox ti sc'anale.

²Ti sba carretae jochbil ta tsajal ca'etic. Ti xchibale jochbil ta ic'al ca'etic.

³Ja'uc ti yoxibale jochbil ta saquil ca'etic. Yan ti ta xchanibale jochbil ta ca'etic ti sac pojantic sba tsajale.

⁴Xichi laj jac'be ti ánjel ti yacal ta xilo'ilaj xchi'uque: “Yojtot, ¿c'usi xa ono'ox smelol ti vi s'elan le' une?”

⁵Xi laj stac'bun ti ánjele: “Le'e, ja'ic ti buch'utic sbainojic ti ic' ti ta xloc' talel ta xchanjotal banomile, ti liquemic talel ta stojol ti Dios yu'un scotol ti banomile.

⁶Ti carreta ti jochbil ta ic'al ca'etique, stamoj batel sbeic ta stuq'uil muc' ta jteclum ti oy ta yolon ti yolon xocon sloq'ueb c'ac'ale. Ti carreta ti jochbil ta saquil ca'etique stamoj batel sbeic ta stuq'uil muc' ta lum ti oy ta stuq'uil smaleb c'ac'ale. Ti carreta ti jochbil ta ca'etic ti sac pojantic sba tsajale stamoj batel sbeic ta stuq'uil muc' ta lum ti oy ta stuq'uil yolon ti yac'ol xocon sloq'ueb c'ac'ale.”

⁷Ja'uc ti carreta ti jochbil ta tsajal ca'etique, mu no'ox ta yocuc ta xa'iic ta xaniel sbejel ti banomile. Va'i un, xi albatic yu'un ti ánjele: “Xaniic sbejel ti banomile.” Ja' jech laj spas ti stuquique.

⁸Laj taj une, xi lic yavtaun ti ánjele: “¡Q'uelo avil, ti jvoc' ti batic ta muc' ta lum ti oy ta stuq'uil yolon ti yolon xocon sloq'ueb c'ac'ale, bat spasic ti c'u s'elan xu' yu'unic ta slamajesbel sc'ac'al yo'nton ti Dios ta stojol ti muc' ta lum taje!”

⁹Xi laj sc'oponun talel ti Diose:

¹⁰“Xi s'elan xatsobbe jujuti'uc sna'obilic ti buch'utic sutic xa talel ti bec'bil to ox batic ta jteclum Babiloniae, ja' ti Heldaie, ti Tobiase, xchi'uc ti Jedaiase. Mi laj taj une, ta sc'ac'alil, batan no'ox me ta sna ti Josías ti ja' xnich'on ti Sofoniase.

¹¹Va'i un, ti c'u yepal laj ata ta tsobel ti platae, ti oroe, meltsano ta ronaetic. Ti mi chapaj une, lapbo junuc ti banquilal pale Josué ti ja' xnich'on ti Josadaque.

¹²Xi xavalbe ya'ie: ‘Xi ta xal ti Dios ti scotol xu' yu'une: Ti vinic ti sbiinoj Q'uelomile,[2] ti ta xvul ta loq'uel ta snitilul stuque, ja' ta xcha'va'anbe xch'ulna ti Diose.

¹³Ta xcha'va'anbe xch'ulna ti Diose. Ta sta xtoc ti stuc no'ox cajal ta xc'ot sc'oplal jech c'u cha'al junuc ajvalil. Ta xlic chotiuc ta muc'ul chotlebal yo' ta spasvan ta mantal. Ti ta xocon ti bu chotole, ta xchoti ec ti palee. Mu'yuc c'op yu'unic ti xchibalique.

¹⁴Ja'uc ti ronaetic com ta xch'ulna ti Diose, ja' ta xc'ot ta sna'obilic ti cajal ta xc'ot sc'oplalic ti Heldaie, ti Tobiase, ti Jedaiase, xchi'uc ti Josias ti ja' xnich'on ti Sofoniase.’ ”

¹⁵Yo' ta xana'ic ti ja' tacbilun talel yu'un ti Dios ti scotol xu' yu'une, ta xc'ot ta pasel ti ta xtalic jnamal-lumetic yo' ta scolta sbaic ta xcha'meltsanel xch'ulna ti Diose. Ti va'i s'elan taje, ja' to me ta xc'ot ta pasel ti mi laj xachiquintabeic lec sc'opojel ti Dios avu'unique, mi ta xach'unbeic ti c'usi ta xale.