Read Tzotzil Zacarías 7 Bible Online

Zacarías 7 - Tzotzil bible

Zacarías 7

¹Ti ta xchanibal (4) c'ac'al yu'un ti sbalunebal (9) u ti sbiinoj Quisleue, ti ta xchanibal (4) xa ox jabil yochel ta ajvalilal ti Darioe, tal c'oponatuc yu'un Dios ti j'alc'op Zacariase.

²Ti jech yorail taje, jech ti jteclum Betele laj stac batel ti Sarezere xchi'uc ti Regem-méleque, ti jmoj batic xchi'uc svinictac ta sc'anel coltael ta stojol ti Diose.

³Xi bat sjaq'uic ta stojol ti j'alc'opetique, xchi'uc ta stojol ti paleetic ti oyic ta xch'ulna ti Dios ti scotol xu' yu'une: “¿Mi jech ta xicomcutic o ti ta xcac'cutic ta ilel ti oyuncutic ta vul o'nton yu'un ti comtsanej vaj ti c'alal ta sta ti yo'obal (5) u yu'un ti jujun jabil jech c'u cha'al liquem talele?”

⁴Va'i un, ti Dios ti scotol xu' yu'une xi laj yal ti laj sc'oponun talele:

⁵“Xi xavalbe ya'i scotol ti jteclumetic yu'un ti muc' ta lume, xchi'uc ti paleetique: ‘Yu'un ti vo'oxuque, le' xa talel ta slajunebal xchanvinic (70) jabil aliquelic talel ti ta xacomtsan avotic ti ta xavaq'uic ta ilel ti oyoxuc ta vul o'nton ti c'alal ta sta ti jujun vo'ob (5) ue, xchi'uc ti jujun vucub (7) u yu'un ti jujun jabile. C'u stu un, ma'uc quich'el ta muc' avu'unic ti jech ta xapasique.

⁶C'alal ta xapasic ti ve'ele xchi'uc ti uch'obajele, ja' no'ox ta xapasic ti c'usi lec ta xava'iic atuquique.’ ”

⁷¿Mi mu ja'uc ono'ox jech laj yal ti Dios ta sventa ti vo'neal j'alc'opetic ti c'alal lamajem c'op ta stojol ti jteclum Jerusalene, ti noj no'ox ti jnaclejetic yu'un xtoque, ti ja' jech oyic ec ti jteclumetic ti oy ta spat ta xocone, ti oy ta yosilal ti Néguev xtoque, xchi'uc ti oy ta stenlejale?

⁸Ti Diose xi c'opoj talel ta stojol ti j'alc'op Zacariase:

⁹“Ti c'usi tsots sc'oplal ta jc'an ta xapasique, xi s'elane: Oyuc lec ach'ulelic ta snopel ti c'usitic lec tuq'ue. Oyuc yutsilal slequilal avo'ntonic. Oyuc syail xc'uxulil xava'i abaic ta jujun tal.

¹⁰Mu xavilbeic svocol ti me'unal antsetique, ti me'un mu'natetique, ti jyanlumetique, ti buch'utic mu'yuc jutebuc c'usi x'ayan yu'unique. Mu xlic ajolic ta snopel ti ta xasoques abaic ta jujun tale.”

¹¹C'u stu un, ti jnaclejetique mu'yuc xaq'uic ta venta ti va'i s'elan albatic taje. Yu'un scotolic laj svalopatinic comel. C'ajomal no'ox laj smac xchiquinic.

¹²Tsatsub yo'ntonic ta j'ech'el jech c'u cha'al junuc saquil xixib ton ti xjaxluj no'ox ta xjelav yu'unic ti chanubtasele, xchi'uc ti mantaletic ti laj sc'uban ta sbijil stuc ti Dios ti scotol xu' yu'un ta sventa ti vo'neal j'alc'opetique. Jech o xal un, ilin ta j'ech'el ti Diose.

¹³Va'i un, xi laj yale: “Jech c'u cha'al laj spasbeicun ti mu'yuc laj xchiquintabeicun ti jc'op ti xivulvun yu'unique, ja' jech ta jpasbeic ec ti mu'yuc ta jchiquintabeic ti sc'opic ti c'alal ta xistaicun ta c'oponele.

¹⁴Ja' yu'un un, co'ol j'elan junuc sutub ic', tan puc laj jtaniic batel ti ta muc'tiquil lum ti mu ja'uc jutebuc xojtiquinique. Sts'ijlajan xa com, joybijem xa ta sbajtical banomil com ta spatic ti slumalic ti c'alal loq'uic batele, ti c'ot ta pasel ti mu'yuc xa xnaqui teye. ¡Ja' ta scoj stuquic ti jeche' xa xme'inaj com yu'unic ti c'upil sba jteclum to oxe!”