Read Tzotzil Malaquías 3 Bible Online

Malaquías 3 - Tzotzil bible

Malaquías 3

¹Ti Dios ti scotol xu' yu'une xi ta xale: “Ta jtac jelavel talel ti caj'al-mantal j'ich'-c'ope yo' jech ta xchapanbun ti jbee. Ti Dios taje, ja' ti Buch'u yacal ta xasa'ilanique. Mu xa jaluc sc'an ti ta x'och ta xch'ulnae. Ta xvul xa ta loq'uel ti j'al-mantal j'ich-c'op yu'un ti trate ti oy ta avo'ntonic amalaojique.”

²Ti sc'ac'alil ti ta xvul ta loq'uele, ¿buch'u la xu' to ta stoy ye sti'? ¿Buch'u la xu' to lec va'al ta xcom? Yu'un co'ol s'elan c'oc' ta xvul ta loq'uel yo' ta spoc stusotic. Yu'un co'ol s'elan xabon ta spoc loq'uel ti c'usitic jsoquesoj jbatic yu'une.

³Ti Diose ta xchotan sba ta spoquel stusel ti paleetic snitilultac ti Levie. Jech ta spas ta stojolic jech c'u cha'al ta xich' lecubtasel ta c'oc' ti platae xchi'uc ti oroe. Mi laj taj une, xu' xa ta xaq'uic ti matanal ta stojol ti Diose jech c'u cha'al sc'an ono'ox pasele.

⁴Ti Diose xmuyubaj xa xchi'uc ti matanal ta xac' ti jteclum Judae, ti jteclum Jerusalene. Ta xc'ot ta pasel jech c'u cha'al xmuyubaj ono'ox xchi'uc le' talel ta vo'nee.

⁵Ti Dios ti scotol xu' yu'une xi ta xale: “Ta xtal jchapanoxuc ava'iic. Ti jech yorail taje, vu'un ta jva'an jba ta rextico ta scontrainelic ti buch'utic yac'ojbeic yipal ta sc'oponel ti sbel banomile, ti buch'utic ta xmulivaj ta yane, ti buch'utic ta jeche' no'ox ti c'usi ta sva'anic ta rexticoe, ti buch'utic ta xilbeic svocol ti j'abteletique, ti me'unal antsetique xchi'uc ti me'un mu'natetique, ti buch'utic mu'yuc stu ta xilic ti jyanlumetique, xchi'uc ti buch'utic mu x'ac'vanic ta ventae.

⁶“Ti vu'un Diosune, mi jutebuc jyanijesoj jba. Ti vo'oxuc snitiluloxuc ti Jacobe, mu'yuc to laj avich'ic tsutsesel.

⁷Ti vo'oxuque laj avalopatinic comel ti c'usitic nopbil cu'une. Jech labatic jech c'u cha'al laj ech'icuc ti amolmuc'totique, ti mu'yuc xac' yo'ntonic ta xch'unele. Ti vu'un Diosun ti scotol xu' cu'une, xichi ta xcale: Cha'sutanic talel ta jtojol. Jech ti vu'une ta xicha'sut talel ta atojolic ec. Ja'uc ti vo'oxuc une xachi ta xavalique: ‘¿C'u cha'al ta xicha'sutcutic talel ta atojol ya'luc?’

⁸Ti vu'un eque xichi ta jaq'ue: ¿Mi yu'un oy la bu xavil jun vinic ti xu' yu'un ta yelc'anbel ti c'usi oy yu'un ti Diose? Ti vo'oxuque laj xa avelc'anicun. Xachi to no'ox xtoc ta xajaq'uique: ‘¿C'usi ti laj quelc'anbotcutic une?’ Laj avelc'anbeicun ti jun ta jujun lajlajunebe xchi'uc ti matanaletique.

⁹Jech, yu'un scotol ti muc'tiquil lume, acotolic ec, yacal ta xavelc'anicun. Ja' yu'un un, ta xa jbisoxuc ava'iic ta cotol chaval. Ti vu'un Diosun ti scotol xu' cu'une, xichi ta xcale:

¹⁰Ti jun ta jujun lajlajunebe, ich'ic talel ta sq'uejobil ti oy ta ch'ulnae. Ja' to jech oy lec c'usi ta tunel ta lajesel ti ta jnae. Ac'beicun ta jba, ja' to ta xavilic mi mu'yuc ta jam talel ti vinajele, ti spajeb xa no'ox yutsil ta xvul ta atojolic ti c'uxubinele.

¹¹Mu jq'uelojuc ma' ti ta xlaj ta xchanul ti ts'unubaletique, ti uvaetic avu'unique.

¹²Scotol ti muc'tiquil lume, mu'yuc c'usi sna'ic le'e, xi ac'oplalic yu'unic. Ti vo'oxuque ta xch'ay o'ntonal ta q'uelel yutsil ti alumalique.” Jech laj xa cal ti vu'un Diosun ti scotol xu' cu'une.

¹³Ti Diose xi ta xale: “Ti vo'oxuque, spajeb xa no'ox ti c'usi ta xavalic ta jtojole. Yu'un xachiic to no'ox xtoc ta xajaq'uique: ‘¿C'usi ti chopol calojcutic ta atojole?’

¹⁴Xi s'elan ma' ti c'usi avalojique: ‘Mu'yuc c'usi xloc' o ti tunel yu'un ti Diose. ¿Mi yu'un oy c'usi ta jtatic o yu'un ti ta xich' pasbel ti c'usi ta xale, ti ta xich' lapel ti at-o'ntonal c'u'il ta sba ta sat ti Dios ti scotol xu' yu'une?

¹⁵Quilojtic lec ta jba ta jsatic ti xmuyubajic no'ox ti buch'utic jtoyobbaetique. Ja' jech no'ox xtoc, ti buch'utic mu'yuc xch'ulel xa'i sbaique, lec ti c'usi ta staique. Ja' jech no'ox xtoc, ti buch'utic ta slajeltsabeic yo'nton ti Diose, mi ja'uc jutebuc ta x'ac'bat stojic.’ ”

¹⁶Ti buch'utic laj snijan xchiman sbaic ta stojol ti Diose, liquic ta slo'iltael. Jech ti Diose laj sts'etan xchiquin ta ya'yiel ti c'usi ta xalique. Ti ta stojol ti Diose, laj yich' ts'ibael jpoc vun ti ta xac' ta na'el ti buch'utic ta xi'taic ti Diose, ti tsots sc'oplal ta xa'iique.

¹⁷Ti Dios ti scotol xu' yu'une, xi ta xale: “Yacalun ta xchapanel jun c'ac'al ti xu' ta xcha'sutic talel yo' ta xc'otic ta jteclumale. Jech c'u cha'al junuc totil ti ta xc'uxubaj yo'nton yu'un ti xnich'on ti yac'oj sba ta tunel yu'une, ja' jech ta x'ayan syail xc'uxul co'nton yu'unic ec.

¹⁸Va'i unbi, ta xlic avilic xtoc ti mu xco'olaj ta q'uelel xchi'uc ti buch'u leque xchi'uc ti buch'u chopole, xchi'uc ti buch'utic ta snijan xchiman sbaic ta yich'el ta muc' ti Diose xchi'uc ti buch'u mu snijan xchiman sbaique.”