Read Tzotzil San Mateo 15 Bible Online

San Mateo 15 - Tzotzil bible

San Mateo 15

¹Oy jlom fariseoetic xchi'uc jlom jchanubtasvanejetic yu'un ti mantal ti liquemic talel ta jteclum Jerusalene, nopajic ta stojol Jesús ti xi laj sjac'beique:

²—¿C'u cha'al ti avajchanc'optac mu xich'ic ta muc' ti c'u s'elan liquem yu'unic ti jtot jme'tique ti mu xc'ot ta pasel yu'unic ti albil sc'oplal ta spoc sc'obic c'alal mu'yuc to ta x'ochic ta ve'ele?

³Xi jac'batic yu'un ti Jesuse: —¿C'u cha'al ti vo'oxuque ta xabajbeic smantal ti Dios yo' staoj yav atsacojbeic stalel ti atot ame'ique?

⁴Yu'un ti Diose xi laj yale: ‘Ich'o ta muc' atot ame'. Ja'uc ti buch'u ta sbis ta cotol chaval ti stot sme'e, jbel sc'oplal chamuc.’

⁵Ti vo'oxuque jbel xavalic ti xiuc yalbeic stot sme'ic ti buch'uuc no'oxe: ‘Mu xa c'usi xcut xajcolta. Ti c'u yepal oy cu'une, laj xa cac'be smotonin ti Diose.’

⁶Buch'uuc no'ox ta xal ti va'i s'elan taje, laj xi c'op ta scoltael ti stot sme'ique. Ti jech taj une, laj xa avalopatinic comel smantal ti Diose yo' staoj yav ta xapasbeic stalel ti atot ame'ique.

⁷¡Jpac'taejbailetic! Yu'un xi ono'ox laj yal ac'oplalic ti j'alc'op Isaiase:

⁸‘Ti jteclum li'e, jun yutsil ti ye ta xich'icun ta muc' yilele. Ti yo'ntonique nom oy ta jtojol.

⁹Mu'yuc c'usi bal o ma' ti nijil chimilic ta jtojole, yu'un naca smantal viniquetic ti c'usi ta xchanubtasvanique.’ ”

¹⁰C'un to un ti Jesuse laj yic' talel ti jnaclejetique, xi laj yalbee: —Ts'etano achiquinic, a'yio ava'iic ti xi s'elan li'e:

¹¹Ti c'usiuc no'ox ti ta slajes ti vinique, ma'uc ta soquesat o. Ja'uc ti bu ta soquesbat ti vinique, ja' ti c'usi ta xloc' ta yee.

¹²Ti yajchanc'optaque nopajic batel ta stojol ti Jesuse, xi laj sjac'beique: —¿Mi xana' ti soc sjolic ti fariseoetic ti jech laj avale?

¹³Xi tac'batic yu'une: —C'usiuc no'ox te'al ti ma'uc ts'unbil yu'un ti Jtot ti oy ta vinajele, ta xich' bulel loq'uel xchi'uc yibel.

¹⁴Ch'an utic, yu'un ma'satetic ta snitbel batel sc'ob ti yan ma'satetique. Mi co'ol ma'satetic ta snit sbaic batele, xchibal ta xbajic ta lom ch'en.

¹⁵Va'i un, ti Pedroe xi laj yalbe ti Jesuse: —Albun ca'icutic smelol ti va'i s'elan laj avale.

¹⁶Ti Jesuse xi laj staq'ue: —¿Mi mu'yuc laj ava'ibeic smelol ec?

¹⁷¿Mi mu xana'ic c'usiuc no'ox ta slajes ti buch'uuc no'oxe, ta x'och ta ye, ta xbat ta xch'ut? Ts'acal to ta xloc' batel.

¹⁸Ti c'usiuc no'ox ti ta xloc' ta eale, ta x'ayan talel ta yut o'ntonal, ja' ta soquesat yu'un ma' taje.

¹⁹Yu'un ta sjol ta yo'nton ta x'ayan talel ti chopol snopbenale, ti milvaneje, ti yanijem jolile, ta sa'el ti yantsique, ta slo'labe sjol viniquetic ti antsetique, ti elc'ajele, ta sjutel ti c'ope, ta sliquesel ti c'ope.

²⁰Taje, ja' ta soquesat yu'un ti buch'uuc no'oxe. Yan ti mi ja' no'ox mu'yuc ta spoc sc'obic ti c'u s'elan albilic comel c'alal mu to ta x'ochic ta ve'ele, mu soquesatic yu'un.

²¹Ti Jesuse loc' batel, bat bu oy ti chib jteclume, ta yosilal ti Tiroe xchi'uc ti Sidone.

²²Oy jun cananea ants nacal ti bu taje, ti xi x'avet tal ta stojol ti Jesuse: —Cajval, Snitilul David, c'uxubinun. Ti jtsebe, ta x'ilbajinat yu'un ti pucuje.

²³Ti Jesuse mu'yuc c'usi laj stac'be ti antse. Va'i un, ti yajchanc'optaque tal ta stojol ti xi laj sc'anbeic vocole: —Albo ya'i batuc ti ants le'e, yu'un x'avet tal ta jpatic.

²⁴Ti Jesuse xi laj yale: —Ja' no'ox tacbilun talel yu'un Dios ta sventa ti jch'ayel-chijetic ta steclumal ti Israele.

²⁵Ti antse nopaj tal, tal squejan sba ta stojol ti xi laj yalbee: —Cajval, coltaun.

²⁶Xi tac'bat yu'un ti Jesuse: —Mu lecuc ti ta jpojbetic sve'el ti alab nich'nabe, ti ac' xi sve' ti ts'i'etique.

²⁷Xi laj yal ti antse: —Jech xaval ava'uc, Cajval, ja'uc ti ts'i'etique ta stambeic xch'uch'ulil yot yajval ti ta xbaj ta ba mexae.

²⁸Va'i un, xi albat yu'un ti Jesuse: —Yepal no'ox ma' ti oy c'usi ach'unoje, Ants, c'otuc ta pasel jech c'u cha'al oy ta avo'ntone. Ta jech yepal col stseb ti antse.

²⁹Ti Jesuse loc' batel ti bu to ox oye. Ech' batel ta sti'il nab Galilea. Ts'acal to un, muy batel ta vits, c'ot chotluc ti bu taje.

³⁰Yepal no'ox c'otic ti bu oye. Yic'ojanic batel coxovetic, ma'satetic, uma'etic, tuncoetic, xchi'uc yan jchameletic. Laj yaq'uic ta yoc ta sc'ob ti Jesuse, laj scolesan scotol.

³¹Ch'ayal c'ot yo'nton scotolic ti laj yilic ti lic c'opojicuc ti uma'e, ti lecubic ti tuncoe, ti xanavicuc ti coxove, ti lic jamuc sat ti ma'sate. Jech o xal scotolic lequil c'opojic ta stojol Dios yu'un ti Israele.

³²Ti Jesuse laj yic' talel ti yajchanc'optaque, xi laj yalbee: —C'ux ta xca'i ta co'nton ti jnaclejetique. Oy xa ta yoxibal c'ac'al ti li' tsobolic ta jtojole. Mu'yuc c'usi stac' slajesic. Mu jc'an ta jtac batel ta snaic c'alal mu'yuc ve'emique. Mi ta jtac batele, xu' ta slubtsajic ta be.

³³Xi tac'bat yu'un ti yajchanc'optaque: —¿C'usi ta xcutcutic ta jtabecutic sve'el ti c'u yepal volol tsobolic ti c'alal mu jchopuc jnaclejetic li'e?

³⁴Xi laj sjac' ti Jesuse: —¿Jaybej pan oy avu'unic? —Ja' no'ox vucub pan xchi'uc jaycotuc uni choy —xiic.

³⁵Ti Jesuse laj yal mantal ti chotliicuc scotolic ta lumtique.

³⁶Laj stsac ti vucbej pane xchi'uc ti jaycot choye. C'alal laj xa yalbe vocol ti Diose, lic xet' ti pane xchi'uc ti choye. Laj yac'be jelavel ti yajchanc'optaque. Jech ti yajchanc'optaque laj spucbeic ti c'u yepal vololique.

³⁷Laj staic ti bu c'alal xal ti yo'ntonique. Scotol ve'ic, nojic lec. Ts'acal to un, laj stsobbeic vucmoch scomelal ti sve'elique.

³⁸Ti ve'ique, oy nan chanmil (4,000) viniquetic, mu'yuc tsacbil ta chapel ti ololetique xchi'uc ti antsetique.

³⁹Ts'acal to un, ti Jesuse laj sc'opon comel ti c'u yepal vololique. Och batel ta barco, bat ta Magadán.